بسم الله بديت وعلى النبي صليت
و ليكم يا حباباتي الغاليات جيت
من خيامتنا ليكم يا الزينين
هدا الطعام العاصمي البنين
من البهجة الغالية عليكم نويتو
لناس بلادي العزاز وين ماكنتو
و بصحتكم و مارسي ………
نبداو بالمسفوف بالجلبانة و الفول
نغسلو الفول مليح الحبات لي كبار نفصصوهم
ولي ملاح نقطعوهم رقاق بعد ما نحيولهم الخيوط
و أحسن طريقة للتقطيع بموس الخبز
و نحطوهم يغلو في ماء مملح باش تتنحى الكحولية ديال الفول
كي يغلى نغسلوه بماء العين و نصفوه
و نحطو الجلبانة تتفور في الكسكاس
كي يدخللها شوية طياب نزيدولها الفول و نخليهم يفورو حتى يطيبو مليح
كي يطيبو نملحوهم و نحطوهم في سحيفة
درك نروحو للطعام أنا نشري الطعام لي يتباع معناها مشي المفتول
و بهد الطريقة ما يتعجنش كامل و يجي كيما المفتول
تدهني الطعام بالزيت و تحطيه يفور
كي يفورلك ديريه تحت العين و اغسليه مليح في الكسكاس و حطي بسينة من التحت باش الطعام لي يطيح
تعاودي ترجعيه للكسكاس
خلي الكسكاس يقطر و من بعد حطي الطعام في الجفنة باش ينشف و فتليه شويا بيدك
حطيلو الملح و خليه يتفور المرة الثانية
و مبعد زيدي بلبخيه بالما و حطيه يفور المرة الثالثة
أنا هنا قسمتو على نص كاين لي درتلو زيت زيتون وزدتو للفول و الجلبانة
و كاين لدرتلو الزبدة ديال البقرة و طيبتلو مرقة حمرة
بالنسبة للمرقة حطيت زوج بصلات كبار مقطعين طوال يتقلاو مع الجاج و ثلاثة سنينات ثوم مسكرفجين رقاق
و التوابل فلفل اسود فلفل عكري و ملح و الزيت
خليتهم يتقلاو على نار دليلة لمدة 15 دقيقة
مرقت و خليتهم غلاو و زدت الخضرة أنا درت زرودية قرعة و لوبيا ماشتو حبة طماطم و ملعقة طماطم مركزة
و خليتهم طابو على نار متوسطة
حتى تجمرت المرقة معناها دارت الوجه تاع لي دام
المرقة مالازمش تجي خفيفة ديري الما بالشويا
متنساوش التعليق و بصحتكم