السّلام عليكم ورحمة الله وبركاته
صباح الخييييير عليكم اخواتي راهو لحق رمضان ربي يعينينا فيه على الطاعة
أخواتي واش رايحين اطيبو للنهار الاول من رمضان ؟ اعطولنا قائمة متكاملة من المقبلات الى التحليات باش ندو افكار
أنا أديت المنيو من عند أمي الله يحفظها ملي كنت صغيرة النهار الأول كيف كيف أمالا حتى أنا اعتمدته في بيتي و هو
شربة فريك
بوراك لحم
مثوم
لحم الحلو
سلاطة مشوية
و خبز مطلوع
أنا قررت اول يوم نطيب
شربة فريك
طاجين زيتون
بوراك بالفيونداشي فالفرن مش مقلي بالزيت
سلطة
سلطة فواكه
و خبز مطلوع فالطاجين وليس الفرن
السلام عليكم
رمضان كريم ومبارك للجميع
شربة فريك + سلطة + ديول معمرين بطاطا وفرماج + شكشوكة + قراتان خفيف + طاجين حلو + فواكه ومشروبات عادية والى غسيل المواعين ثم قهيوة ثم الصلاة والى النووووووووووووم ومن بعد السحور خبز وحليب وفنجان قهوة
انشاء الله اية عاندوني وديرو كيما انا
يعطيكم الصحة اخواتي هادا واش يطيبو اغلب الناس اليوم الاول
وانا كي سفسيت امي قالت ديري الاطباق لي حطيتهم
بصح انا حبيت نخالف :d
خاصةفي الطبق الثاني زيدو اقترحو علينا
انا حابة ندير شربة فريك وهذي دائما في اليوم الاول حلو وبوراك بطاطا وتن وفرماج وغراتان ارز وشلاطة منوعة والتحلية تورتة الاناناس وايس كريم منزلي … وان شاء الله ينعاد علينا بالصحة والعافية وطاعة الرحمان .
الطبق الثاني ممكن باطاطا فالفرن تجي بنينة بزاف انا ندير طبقة بطاطا و الثانية لحم الصدر نطيبو و نقطعو طراف و نحطو في ثاني طبقة و من فوق نغطيه بالباطاطا و نزينو بالفيوىنداشي و الزيتون الاخضر و الصوص تاعو نخدمها فالفيونداشي و الثوم والبصل و حبة طماطم و توابل شوية برك مش بزاف حتى تبقى نفس الطعم و الله نموت على باطاطا
رمضان كريم ان شاء الله تصموها بالصحة والعافية
اليوم الاول نديرو شربة فريك ومطلوع يعني ماما ديرهم ههه وانا راح ندير غرتان اللهلوبية تاع الهام هه ومملحات لي كورني ولا سوفلي هذا شرط وطاجين لحلو سلطة وتحلية عليا قلب اللوز وفلان وشارلوات بموس الشكولا والفراولة لyasmalak واليوم بلاك ندير الكرواسون لسحور ههه
انا تاني نطيب الشربة المثوم لحم لحلو الوراك و السلاطة و الطلوع
انا حابة ندير فريك والحلو وغرتان سلاطة ومطلوع لازم والتحلية حابة ندير تارت دانيت بالشكولا
صح رمضانكم………. مازلنا ما قررناش….. باستثناء شربة فريك لمانقدروش نستغنو عليها والبوراك ههههه مشكورين
السلام عليكم أنا ندير الحريرة و البوراك باللحم مرحي و السلاطة خضرا مع الماسدوان و الفلفلة و الكبدة مشرملة وكروكات والبرقوق الحلو و في السهرة ندير الغريبية و المحنشة مع القهوة و الفواكه المتنوعة مع الفلان صح رمضانكم
صحه رمضانكم ينعاد عليكم وعلينا باللصحة و العافية والطاعة انشاء الله
اليوم لاول دائما حريرة بوراك بللحم طاجين حلو غارتان كوشة سلاطة ديسار ومنبعد غسل الماعن ثم النوجه الى الشاي وحاجة حلوة دون انا ننسى الصلاة الذكر والقران والتفكير في اليوم الثانى والله يكون في العون وصحه سحوركم
باذن الله سيكون
حريرة
طاجين حلو
مملحات و بوراك راح نكثر منها و ما نديرش مرق مالح باش ينتكل الطاجين الحلو لانو دايما يبقى كي يكون طاجين مالح
و سلطة منوعة
فلون و فواكه و عصير و الحمد لله
بادن الله شربة فريك كفتة وطاجين الحلو وسلاطة ورق والمطلوع كل يوم وادا جاب الديول نزيد الديول والفلن اكيد متعودين اليوم الاول مايكلوش بزاف وربي يقدرنا على الطاعة
