حابة نعرف واش من توابل تستعملو و كيفاش تمرقو
انا كل خطرة كيفاه خطرة تجي مرقة بنينة خطرة لالا
انا كي نجي نمرق
بعد من نداوي طنجرة كيما نقولو و تتقلى شوي ,,,,لحم و بصل و توابل
نكون حطيت كمية تاع الماء لي حابة نتحصل عليها زايد كمية قليلة
و نحطها تغلي و نظيفلها مكعب جامبو او ماجي
ومن بعد نظيفها ضربة وحدة
و من بعد ما نضيفش الماء نهائيا و تنشف و تعقد مرة وحدة
و نتوما كيفاه ديرو ؟؟؟
أختي فيما يخص التوابل كاين موضوع للأختfaizarbh
وهو لوصفات الشاف مصطفى بسعدي بإذاعة الشلف
https://www.djelfa.info/vb/showthread…post1052953213
جدول تفصيلي للتوابل:
في هاد الجدول نلقاو واش هوما التوابل المناسبين لكل أكلة
* إيلا كان طاجين مثوم: ملح ، فلفل أسود، قرفة،ذرة زعفران تاع الشعرة مطحون (فالاصل نديرولو ذرة كمون صغيرة ).
1/* إيلا كان مثوم بدون لحم أي faut mtawam ندير نفس التوابل و نزيد عليهم سكنجبير بودرة.
* شطيطحة لحم غنمي بيضاء : ملح، فلفل أسود،شوية قرفة، كبابة، و ايلا كانت باللحم البقري بدل الكبابة ندير الكروية .
* شطيطحة دجاج: ملح،فلفل أسود،قرفة، كروية،شوية بصل و نكثر الثوم .
* طاجين الزيتون بالدجاج: ملح،فلفل أسود أو أبيض،عود قرفة،شوية زعفران.
* طاجين الزيتون باللحم البقري: ملح،فلفل أسود، عود قرفة، زعفران، شوية كروية.
و ايلا كان لحم غنمي: شوية كبابة بدل الكروية.
* طاجين الكباب مرقة بيضاء: ملح،فلفل،زعفران،قرفة،سكنجبير طازج.
* طاجين الكباب بالمرقة بالجاج او بقري او غنمي ندير ذرة حبة طيبة بودرة.
2/* مرقة حمراء: ملح،فلفل،قرفة عود،فلفل عكري، فلفل ادريس ، كروية ، كبابة ، كركم ، شوية راس الحانوت ، كمون.
* شطيطحة لحم مرقة حمراء: ملح،فلفل،قرفة عود شوية كروية للبقري و للغنمي شوية كبابة .
* شطيطحة بالجاج مرقة حمراء: ملح،فلفل،فلفل عكري،كبابة و كركم و شوية فلفل ادريس.
* طاجين زيتون مرقة حمراء: ملح،فلفل،شوية راس الحانوت، فلفل عكري،نص حبة عصير ليمون.
*طاجين تاع الكوشة: لحم بقري او روتي أو جيقو أو دجاج: ملح، فلفل، جوزة الطيب.
* أي طبق غراتيني في الفرن: ملح،فلفل،شوية سكنجبير طازج،شوية جوزة الطيب.
شكرا اختي …..انا نتجنب التوابل بزاف …على هادي نستعمل راس الحانوت . فلفل احمر و قصبر و زعفران
و طريقة التمريق كيما قلت مسبقا
ما ولت نستنى في احاباتكم
أنا تاني نحب نتعلم و ديما نطرح السؤال هذا … ننتظر من محترفات الطبخ المساعدة
شكرا على الموضوع
Sah ana dima nhawass 3la tawabil li yathato fi kol okla w wachhal lazam ykoun marak
Baraka laho fiki okhti
سلام
مام انا نجتنب التوابل بزاف انا نستخدم بزاف رأس الحانوت والحرور والزعفران والكمون وجامبو بالنسبة للتوابل لخرين محبش نستعملهم اضافة الى الفلفة الحمراء كذالك نستعملها
صحا رمضانكم
طريقة التمريق يا جماعة …..واش راكم مgرفين ؟؟؟
انا نستعمل التوابل اللي يجيو في ساشي يسموهم الذواقة ونستعمل الفلفل الاسود والكمون والكسبر المرحي والبسباس المرحي والقرفة وطبعا كل طبخة عندها التوابل اللي تناسبها
التمريق في معظم طبخات ندوزن الطنجرة ونخليها تتقلى على نار هادية مدة 10دقايق الى 15 دقيقة مع التحريك والتقليب ثم نمرق بنص كاس ماء ونخليها تغلي شوية ثم نزيد بشوية الماء حتى نكمل الكمية المطلوبة وفي اغلب الاحيان تكون قيمة ما نغطي واش كاين في الطنجرة من لحم او خضر واللي نحب نفيدك بيه اختي هو انك لما تمرقي بماء قليل وتغلقي طنجرة الضغط وتخليها تطيب على نار خفيفة رايحة تخلي اللحم عندك يطيب بدون ما تفقد المرقة البنة نتاعها من كثرة الماء وتجي بنييييييينة وهذي بالتجريب
|
المشاركة الأصلية كتبت بواسطة غيداق
 انا نستعمل التوابل اللي يجيو في ساشي يسموهم الذواقة ونستعمل الفلفل الاسود والكمون والكسبر المرحي والبسباس المرحي والقرفة وطبعا كل طبخة عندها التوابل اللي تناسبها
التمريق في معظم طبخات ندوزن الطنجرة ونخليها تتقلى على نار هادية مدة 10دقايق الى 15 دقيقة مع التحريك والتقليب ثم نمرق بنص كاس ماء ونخليها تغلي شوية ثم نزيد بشوية الماء حتى نكمل الكمية المطلوبة وفي اغلب الاحيان تكون قيمة ما نغطي واش كاين في الطنجرة من لحم او خضر واللي نحب نفيدك بيه اختي هو انك لما تمرقي بماء قليل وتغلقي طنجرة الضغط وتخليها تطيب على نار خفيفة رايحة تخلي اللحم عندك يطيب بدون ما تفقد المرقة البنة نتاعها من كثرة الماء وتجي بنييييييينة وهذي بالتجريب |
لكن اختي واش رايك ….راه كل ما اللحم يطلق البنة تاعو و المرقة تخثار نتي تزيدي الماء يروح كلش ولا كيفاه
راني حابة نستفاد من خبرتكم
لا اختي انا نستعمل قيمة زوج كيسان ونص نتاع الماء طيلة مدة الطياب لانو مبدئي الحاجة تطيب على نار هادية مش بكثرة الماء اللي تحطيلها
شوفي اختي كمية الماء لازم تكون معقولة مش تغرقي الطنجرة ترديها بيسين
ومش تحطي شوي ينشفلك وسر بنة الموقد لما يكون على نار هادية هدي برك
وكل أكلة عندها مجموعة من التوابل تعها ممزوجة وسبحان الله كي قريتهم وترتجمت اللى مفهمتهمش حرت
ولقيت توابل تاع الشربة غير على كل التوابل الاخر
وتوابل تعا الكسكسي وحدها وتاع باقى الاطباق وحدها
اما بالنسبة لتمريق
شوفي نحط الخضر واللحم يتقلو على نار تكون شوية قاوية بالنسبة لشربة
وفي نفس الوقت نحط الماء يسخن حتى لدرجة الغاليان ونزيد معه نص حبة بطاطا ونص حبة بصل
وبعدها نمرق بشوية برك ونخليها تغلى وبعدها نزيد باقى المرق وننقص للنار ونخليها على نار هادئة
وبارك الله فيكم
اختي اولا سر البنة تاع الماكلة في القليان اول مرة لازم تقلي اللحم والتوابل تاعك مليح على نار هادية حتى يطلق الماء تاعو ومن بعد تزيدي الماء غير شوية وتخلية يغلي مليح وتزيدي الماء حتى يتغطى اللحم وتغلقي وتخليه يطيب وعلى فكرة الكوكوت ماتعقدش كيتكون على نار هادية يعني ماتكثريش الماء بزاف
اولا فيما يخص التوابل هنا في الغرب مشهورين بالتوابل وخاصة الي تدخل من المغرب اما الاخوات فانا تعجبت كيفاه تستعملوا توابل نوع واحد في كل الاكلات؟؟؟حنا كل اكلة ونستعمللها التاوابل الخاصة بيها .اما الكمون فهو يستعمل في مرق اكلات محددة ولازم تحطيه في الاخير لانو كي طيب مع المرق يطلق مرورة ويخصر الاكلة اعن كمية الماء فكل اكلة وتمراقها هناك اكلات مافيهاش محتويات تطلب طياب بزاف فهنا ندير قليل من الماء والطياب على نار هادئة وهناك اكلات تطلب تزيدي كمية الماء لان المحتويات تحتاج وقت اكثر باه تطيب ونزيدك حاجة هناك اكلات لاوم تمرقيها بماء سخون وهناك اكلات تديري بارد في البارد
مشكورين اخواتي على الردود
