السلام عليكم اخواتي
دائما مع الحلويات لي عملت في العيد واليوم مع وصفة جديدة ماكانش لي عملتها هههههه والفكرة فيها ان راح نستخدم طابع الصامصة في تشكيل الحلوى والنتيجة راح تكون هاااايلة بدون اطالة نخليكم مع الوصفة والخطوات.
المقادير:
لتحضير العجينة نحتاج الى
3كيلات فرينة
كيلة مملوءة مليح سمن ذايب وبارد
فاني
ماء+ماء الزهر
الحشو:
3كيلات لوز مرحي لي ماعندهاش اللوز ممكن تعوضه بالكاوكاو
كيلة ناقصة شوية سكر احرش
2 م ك سمن ذايب
فاني
ماء الزهر
لتحضير الطلية نحتاج الى
بياض بيضة
كاس شربات
سكر رطب من النوع الجيد انا استعملت سكر المرجان لازم يكون مغربل
عصير ليمون
2م ك ماء الزهر
ملون بنفسجي
نحتاج ايضا الى ملمع غذائي
الطريقة:
اولا نحضر العجينة
نخلط السمن مع الفرينة والفاني ونلمها بلاماء وماء الزهر دون عجنها نغطيها ونخليها ترتاح
من جهة نحضر الحشو بخلط المقادير السابقة ونجمعها بماء الزهر
ناخذ المول الخاص بالصامصة
نبسط العجينة بالحلال كيما نعمل التشاراك يعني نفس السمك ونحطها فوق طابع الصامصة
نحط داخل كل مثلث كمية من الحشو
نعاود نبسط كمية من العجينة ونغطي الحشو
نضغط شوية على حواف المثلثات ونقلب المول نقطع الاطراف ونعاود نضغط على الحواف باه ماتتفتحش اثناء الطهي
نقطع مثلثات ونحطها في البلاطو وندخلها للفرن يكون مسخن مسبقا على150درجة
اثناء الطهي مانفتحش الفور في البداية حتى تطيب من الاسفل باه المثلثات ما يتفتحوش
بعد ماتطيب من الاسفل نطيبها من فوق كيما نعملو مع التشاراك
بعد ماتطيب نخليها تبرد تماما بعدها نبدأ في تحضير الطلية
لتحضير الطلية لازم اولا نحضر شربات تكون ثقيلة شوية
في اناء نحط كيلة سكر مع كيلة ونصف ماء نحرك حتى يذوب السكر بعد ماتغلي نخليها15د حتى تعقد الشربات ولازم يبقى لونها ابيض
نخليها تبرد تماما نأخذ منها كاس شربات تقريبا ربع لتر
في وعاء نحط بياض بيضة ونخفقه شوية بالشوكة من بعد نضيف كاس شربات نحرك باليد ونبدا نضيف في السكر الرطب تدريجيا
https://
نبقى نضيف في السكر الرطب حتى نتحصل على عجينة نضيف ماء الزهر ونحرك باليد ثم نضيف عصير الليمون حتى نتحصل على سائل عاقد
نضيف الملون اذا كان غبرة نذوبه في شوية ماء الزهر واذا كان سائل نضيف مباشرة نحط الملون غير بالشوية ونحرك بالملعقة حتى نتحصل على اللون المرغوب انا استعملت لون بنفسجي
بالنسبة للطلية كيفاه نعرف ان قوامها مليح؟
لازم نجرب على حبة نغطس حبة حلوى في الطلاء اذا الطلية هبطت من الحلوى لازم نزيد شوية سكر رطب واذا كانت الطلية ثقيلة بزاف نضيف شوية ماء زهر او عصير ليمون
بعد مانغطس الحلوى في الطلاء نحطها على مشبك ونخليها تقطر وتنشف
بعد ماتنشف تماما ناخذ اسفنجة نحطها في الملون الغذائي الفضي لي يكون غبرة ونمررها على الحلوى وهذا شكلها
ناخذ عجينة اللوز الاصطناعية نضيفلها شوية نشاء ونعجنها نقسمها على اثنان كمية نضيفلها ملون غذائي ابيض وكمية نضيفلها ملون غذائي بنفسجي
نبسطها بالحلال فوق نيلون وبالبانسو نحط فوقها الملمع الغذائي الفضي لي على شكل غبرة
نشكل وردات بالطوابع نلصقها فوق الحلوى بشوية من الطلية ونحط في المنتصف كريات فضية نحطها في ليكيسات ونقدمها
عن قرب
ان شاء الله تكون الخطوات واضحة والحلوى عجبتكم ولاتنسوني من صالح الدعاء
في امان الله
روووووووووووووووووووووووووووووووعه يعطيك الصحة
Yatik saha
hayla
44444444444
بارك الله فيك
شكرااااااا
الله يبارك رووووعة يعطيك الصحة حنونة ويسلم يديك نشالله ويباركلك في عايلتك
Baraka allah fik dayman tfidiya
Merciiiiiiiiiiii
يعطيك الصحة
رووووووووووووووووعة ياأم أماني يسلموهذو لديات يعطيك الصحة أختي
تعيشي ممكن تقوليلي كمية السكر اللي استخدمتيها
wawwwwwwwwwww allah ybarek ya3tik saha
رووووووووووووووووووعة يااماني ربي يعطيك ماتتمناي ويفرح ديما كيما راكي تفرحي بينا ماتتصوريش شحال نفرح كي تحطي وصفات جدد تعرفي راني ديما نفوخ على خوتاتي لمزوجات قتلهم انا عندي الجديد فالقاطو مانديرش لقديم قالولي مين تجيبيهم قتلهم ام اماني تجيب غير الجديد قالولي نتي مهبولة ههههههههههههههههههههه راني ديما ندعيلك ربي يفرحك
شكرااااااااااااااااااااا غاليتي
يعطيك الصحة ام اماني حلوى راااائعة كروعتك جعلها الله في ميزان حسناتك
|
المشاركة الأصلية كتبت بواسطة nour inasse
 تعيشي ممكن تقوليلي كمية السكر اللي استخدمتيها
|
اهلا غاليتي
بالنسبة للحشو الكيلة لي تكيلي بها اعملي ثلاث كيلات لوز وكيلة ناقصة شوية سكر احرش
اما اذا تقصد السكر الرطب في الطلية ابقاي تضيفي في السكر حتى تتحصلي على عجينة من بعد ضفيلها عصير الليمون وماء الزهر
روعة
هايل
يعطيك الصحة
