السلام عليكم
الف مبروك لابنة اختك كما قلتي وتفضلتي بما ان عليها شراء الذهب من المهر .فعليها ان تحتفظ بالباقي لشراء الملابس اليومية وكذا الحجابات ان كانت محجبة اضل ان تقوم بكراء ملابس التصديرةعلى ان تاخذ معها على الاقل لباسين للمناسبات ولاتنسى العطور ومواد التجمييل .بالنسبة لهدية الزوجتختلف من شخص لاخر فتستطيع ان تقدم له عطرا فاخرا وقميصا من النوع الجيد ومصحفوربي يكملها على خير ويرزقها الذرية الصالحة واختي حياة ستفيدكي اكثر مني
اختي اذهبي الى منتدى الحياة الزوجية ستجدي موضوعي بعنوان زواج ليلة تدبارو عام واذا ملقتيش واش تحوسي نعاودوا ندردشوا
ضحكتيني كي قلتي المهر قليل 11 مليون وشحال حبيتي……………………هههههههه
أما حياة ربي يحفضك أنا مقلتش قليل بصفة عامة حنا متعودين انو يكون الذهب من عند أهل الراجل و راكي عارفة بالي الذهب غلا بزاف عموما ربي يحفضك
لقد اطلعت على موضوع زواج ليلة تدبارو عام ولم أجد فيه عما أسأل عليه بالضبط خاصة حوايج الكروشي الي تديهم معاها و للعلم هي رايحة تسكن مع أهل راجلها ماشي وحدها أرجوكي أرجوكي أفيديني اذا كان عندك خبر و تاني كاين حاجة يحوسو يخدمو تروسو نتاع كروشي للشمبرة نتاع النوم اذا كان عندك وريهملي باصور واسمحيلي
السلام عليكم اختي الغالية مبروك للعروس و جمع بينهما في خير
بالنسبة للملابس تاخذ معها ملابس لكل يوم للصي(ف و الربيع و الخريف و الشتاء، ملابس الصيف عددها يجب ان يكون اكثر، سبعة على الاقل
لا تنسى الملابس الداخلية و النويزات و البيجامات و البينوارات للصيف و الشتاء
بالنسبة للكروشيه تاخد التلايق يعني تاع الخزانة و كذا تاع لي طابل دو نوي و لا كوافيز, يعني الطاولتين طرفي السرير و طاولة العطور كما يمكنها تاخذ نابات صغار للروائح و لمفاتيح الخزانة…. يمكنها تاخد لي ناب تاع الشناوا اي الصينيين راهم يتباعو بمجموعات متزايدة في الحجم تخير واش يعجبها
تاخذ الازارات و من الافضل ان تشتري القماش الذي يباع بالمتر و تخيطه هي او الخياطة لان تاع الخارج بزاف غاليين 3000 دج تاخذ 2 على الاقل الى 5 حسب الامكانيات، و انصح تختار الازار المصنوع من القطن مئة في المئة لانه في الصيف بارد و في الشتاء دافئ
تاخذ ازار او اكثر تاع العيد و المناسبات و فترة التعرويس طبعا تنزعه في الليل و تضعه في النهار، يمكن تاخذ لزار غرزة الحساب الكروشيه بوان دو كروا الرسم علؤ الحرير تاخد حسب الامكانيات
تاخذ العطور ضروووووووووووووووووووووووووووووووووري و الديودوران و الكريمات و الماكياج و السيشوار و دوزان الحمام و 6 سربيتات و سورتي دو بان
تاخذ 2 ملابس للتصديرة و عباية و 4 حجاب صيف و 2 شتاء
تاخذ جبات تاع الضياف صيف و شتاء 2 او 3 و تاخد التايورات 1 صيف واحد شتا كي نقول شتا يعني نصف شتوي باش تقدر تلبسو في الخريف و الربيع و في الشتا تلبس تحتو تريكو، و تاخذ الخمارات تاع الدار عندما يكون اشخاص غير محارم و خمارات للخارج و خكارات تاع حوايج التصديرة للمناسبات لانه هناك كاميرات يقدرو يشوفوها الرجاال
الذهب قد ما تاخذ مليح تاخد مناقش طوال و 2 مسايس و سلسلة طويلة خير من بارير و خواتم على الاقل 2
ما ننساش البلايغ و الاحذية و الجوارب و البنتوفة و الصيكان
ما ننساش زرابي الغرفة ديسون دو لي و كوفرولي و كوسانات 2 للتصديرة و السرير و الكوفيرتات 1 او اكثر او كوات
يمكنها تاخذ ناب للطاولة و كذا للتلفاز
كما يمكنها تاخذ مطرح او 2 و شورتو و لا ننسى الريدو لغرفتها
بالنسبة للهدية يمكنها تشتري عطر ايميتاسيون ال مقلد يباع ب 500 دج فقط بدل 3000دج بالنسبة للاصلي، و تاخدلو بيجامه معه
ربي يباركلها في المهر و يوسع لها في رزقها و انصحك يا خالتها ان تتفاهمي مع خالاتها و اخوالها و كل من يقربها على الهدية قبل العرس و تقولو لها سنجلب لك كذا و كذا او تخيروها لكن بدوون احراج كي تستفيد منه و تنقصو عليها عبئ ما
و قولي لها تصفي نيتها و تتوكل على ربي كل حاجة تجيها خير من ما تتمنى و الله صراتلي و ربي يباركلها
و اوصيها بترقب لي صولد حيث تستفييييد كثيرا
ان احتجت لاي شئ فانا في الخدمة و ادعيلي بالذرية الصالحة
شوفي اختي كاين في منتدى الاشغال اليدوية موضوع بعنوان حواف كروشيه ستجدين به حواف الخزانة وتختار النوع اللي تحبوا تخدموا
وزيدي تلقاي مواضيع بعنوان مفارش كروشيه يعني تع لاكوافيز ولاتابل دونوي
وزيدي كاين مفارش بغرزة الحساب وهذا ماشي شرط يمكنها اختيار مفرش للسرير من طرز اخر كالبرودي او الفرض يباع في المحلات وسعره مابين مليون حتى 2 ملايين وفي رايي تشري قماش واسمو ميتيس تديه للمراة المختصة وهي تخدمهولها يستقاملها اقل تكلفة
تزيد ايضا تشري دراوات تع السرير اللي تغيرهم يعني اللي يرقدوا عليهم + مخدات والمسند
زربية + زربيات صغار يجوا على حافة السرير تسمى descent de lit
اما بالنسبة للملابس تدي شوية تع شتاء من جبات دار وفساتين خروج وفساتين منزل كل حسب المنطقة اللي يسكن فيها ونفس الشيء بالنسبة لملابس الصيف باللاضافة الى ملابس النوم من بيجامات لانجري ………………….
ادوات الحمام من الطاسة حتى تفريشة الحمام +sortie de bain
ادوات الماكياج + العطور الاحذية المنزلية شتوية وصيفية
كوات او كوفرتات وكل واحدة تشري على حساب مقدورها
جوارب …….. ملابس داخلية……………………
هدية الرجل كل واحدة ومقدورها تقدر تديلوا sortie de bain + مستلزمات الحمام
مصحف + عطر + بيجامة
السلام عليكم
ربيبببببببي يحفضكم zineb.ismahan وحياة ما ننسالكمش هذا الخدمة أأبداااااااااا راكم كفيتو و وفيتو و ربي يرزقك الذرية الصالحة البارة آآآآآآآآآمين
يعطيك الصحة اختي زينب كل شي عندك بالتدقيق تقول تخدمي بتجهيز العرايس على العموم حتى انا اسنفدت كثيرا من ردك ورد الاخت حياة على العموم انا مازال بصح نخاف إلى جا المكتوب وماكنش وقت حتى للتفكير
مشكوووووووووووووووووووووووووورات حياة وزينب
لا شكر على واجب وان شاء الله نكونوا ساعدناك
لا شكر على واجب اخواتي انا ايضا كنت اجهل الكثير لكن عند زواج صديقاتي ثم زواجي تعلمت و استفدت و لا ازال اتعلم دائما
احبكم في الله
الى الاخت خديجة اوصيك بالبدا في التجهيز باش ما تحصليش يوما ما
مثلا اشتر سرابت و ملابس تعجبك و لو حاجة 1 في 3 اشهر و ما السيل الا اجتماع النقط
|
المشاركة الأصلية كتبت بواسطة zineb.ismahan
 الى الاخت خديجة اوصيك بالبدا في التجهيز باش ما تحصليش يوما ما
مثلا اشتر سرابت و ملابس تعجبك و لو حاجة 1 في 3 اشهر و ما السيل الا اجتماع النقط |
عندك الصح انا ماما ماعلمتنيش نخبي حاجة
نخاف من فخ الموضة اللي وقعت فيه الكثير
بصح راني متحديتها وداسة بيجامة واقماش اعطاتهولي جداتي الله يرحمها كي ربحت الباك وقالتلي هادي خيطيها نهار عرسك ومن تم بديت نشري بصح قليل بزاف راني بديت نخبي دراهم لانو ممكن نروح لمكان نشري بزاف يطيحلي اقل
ومنكم نستفيد
بالنسبة لي نعطيلو دراهمو ونقولو اللي عجباتك شريها
نرفد كابتي تع الصوالح اللي عندي فالدار ..والسلام عليكم
ههههههههههه
مشي هكذا خير من تكسار الراس
