زوجي يفكر في شراء قطعة أرض في المدية و بناء منزل صغير، بعد أن فقدنا الأمل للشراء في العاصمة، ممكن تعملولي مقارنة بين الإجابيات و السلبيات
اختي صراحة ساخبرك بناء على ما عايشته انا
انا كنت عايشة في الريف دشرة ثم تزوجت الى المدينة جاتني صعيبة باش نوالف
الريف الان اصبح مدينة فيه الكهرباء والغاز والانترنت والطريق والمستشفيات ووووو وفيه ايضا الارض خاصة اذا كنت من محبات تخدمي الارض
مايوجد في المدينة ماكاشو في الريف هو les grande supperette والمحلات الفاخرة
انا عندما كنت عايشة في الدشرة كنت نعاون ماما ونخدم الارض كانت عندنا قطعة صغيرة قدام الدار ماشاء الله اذا لحقتي غرستي بصلة تجنيها وتربحي دراهم شراءها من السوق ما احلاها كيماكاش قاع تقعدي في الجنان تشمي هوا نقي بصح في المدينة المعيشة في باطيمة ربطة ماعدنوس لازم تستناي يجيبوهالك مالسوق وادا حبيتي تتمشاي شوية وييييين ماكان لا جنان لا هم يحزنون كاين تروطوار وحوانت اخرجي شمي المازوت والليسانس
العاصمة بالدات ولكن اي مكان بالضبط في العاصمة يا اختي دزاير مليحة في centre او البلديات المعروفة دالي براهيم الشراقة الابيار درارية حيدرة وباش تصحلك هنا لازملك شكاير دراهم غير ذلك كيف كيف الضيق والعياط والسريقات والسيركولاسيون
هذه من وجهة نظري لاني من عاشقات السكن في الريف ان شاء الله يزيدو يعاونوك الاعضاء
شكرا لك على الرد ouissamak
أنا طول عمري عايشة في العاصمة، راني خايفة أني ما نوالفش
ان شاء الله يزيدو يعاونوني الاعضاء
السلام عليكم اختي
انا كنت عايشة منذ ولدت في المدينة و كل شي امامي و لكني تزوجت للريف و عجبتني بزاف حتى انو ناسي انعم الله عليهم باراضي شاسعة و كلها مغروسة فواكه و خضر وحد المتعة فالربيع و الصيف لا تتصوريها صراحة فالريف مازال الناس كامل تاع بعضهم ابدا لا تلقى روحك وحيدة …روح الجوار مازالت قايمة ماشاء الله و الان راني انتقلت للعيش فاقصى الجنوب الجزائري و القضية قضية ولف فقط لازم تتاقلمي مع جميع الظروف المهم تكوني مرتاحة مع زوجك ماراح يخصك والو حتى و لو سكنتي فالمريخ.
ربي يسهلك اختي
الريف خير انا والفت فيه خيرمن المدينة
يا اختى اشري في مناطق الوسط وماشي بعاد على العاصمة بزاااف حوسي تلقاي مزال كاين اماكن رخيصة مؤقتا لان البناء راه في توسع وتربحي انك تبقاي في مدينة او مكان تابع لمدينة
كمثال شقة صغيرة وفي باطيمة في مناطق مثل الابيار والشراقة قد تصل الى اربع ملايير وتتجازو رغم ان منظرها العام قد لا يكون في المستوى
بنفس المبلغ تقدري تبني فيلا مثلا كبيرة في بعض المناطق التابعة لولاية تيبازة او البليدة وهى مناطق لا تبعد باكثر من عشرون كيلومتر او اكثربقليل عن العاصمة شفتى الفرق 
مثال اخر توجد بعض البيوت ديار عرب كما تسمى تكون رخيصة قليلا اذا كانت ماشي على الطريق في نفس المناطق
طبعا اتحدث عن مدن كبيرة ومعروفة اصلا اغلب العاصميين راهم يديرو هاك يشرو اراضي ويبنو بعيدا عن العاصمة
اما مدية انا نشوف بعيدة بزااااف والعادات مختلفة عن العاصمة فرق شاسع يا صديقتى وراح تتغربي على اهلك واذا كنتى تقصدي قلب المدينة المدية فالاراضي لن تكون رخيصة الى هذه الدرجة يعنى زيدي شوية واشري هنا احسن بكثير نصف ساعة بالسيارة تكوني في العاصمة حوسي مليح تلقاي فرص
وربي يفتح عليك وعلى الجميع
الحيات في الريف جميلة وخاصة في الربيع مي فيها بروبلام انوا ولادك ميقدروش يقراو لختش ماكاش المدارس في الريف ربي يسهلك
شكرا إخوتي على الردود،
كل شيء غالي والقدرة محدودة، إنشاء الله رب إفرج على كل واحد،
إنشاء الله راح ناخد النصائح بعين الإعتبار
