السلام عليكم و رحمة الله تعالى و بركاته
هذا الوصفة كنت سمعتها من فترة في إذاعة تموشنت يسموها gateau russe وما تشبهش للقاطو تع الأخت فلة اللي يحمل نفس الاسم المهم عجبتني و اليوم طبقتها و صح تستحق منكم تجربوها فهي هشيشة و لذيذة في نفس الوقت
هاهي ليكم الوصفة كيما سجلتها و من بعد نضيف ملاحظاتي
على بركة الله نبدأ:
400 غ فرينة
4 صفار بيض
2 ملاعق كبار سكر ناعم
1 خمارة الحلوى
250 غ زبدة طرية
1 ملعقة صغيرة فاني أو زاست تع الليمون
3 ملاعق كبار كاكاوو
و بالنسبة للمورانغ : 200 غ سكر عادي + 4 بياض بيض + 1 ملعقة كبيرة عصير ليمون
+ 3 ملاعق كبار مربى المشمش
التحضير :
· خلطي الفرينة مع الزبدة طرية مقطعة قطع صغار + 1 خمارة + السكر الناعم + الفاني أو الزاست ثم ضيفي صفار البيض و لمي العجينة
· قسمي العجينة قسمين : القسم الأول اتركيه أبيض
و القسم الثاني زيدي قسميه على اثنين : واحد ضيفي له الكاكاوو و الآخر ضيفي له الفرينة
· ابسطي الجزء الأول من العجينة (البيضاء) في صينية مربعة (30×30) ثم ضيفي فوقها المربى ثم رابي فوقها عجينة الشوكولا (البنية)
· حضري المورانغ : طلعي 4 بياض بيض ثلج ثم ضيفي 200غ سكر عادي أو ناعم ثم 1 م ك عصير ليمون
· ثم فرغي المورانغ فوق العجينة اللي رابيتيها و ابسطيها ثم زيدي رابي فوقها العجينة البيضاء(الربع الأخير)
· دخليها للفرن تطيب مابين (25د و 35د ) و يكون الفرن مسخن من قبل
· للتزيين تقدري تغربلي فوقها الكاكاوو أو سكر ناعم ثم قطعيها مربعات
و هاهي بصحتكم
الملاحظات :
لما حضرت العجينة بانت لي طرية بزاف من الأحسن تزيديلها شوية فرينة
(مشي بزاف قدر ما تتلم و تبقى طرية)
و لما تقسمي العجينة المرة الأولى على 2 ما تقسميهاش بالتساوي أي من الأحسن الكمية اللي تبسطيها تكون شوية أكثر من اللي ترابيها
و هذيك القطرة تع المربى مالفوق زادتها بنتي الصغيرة و بصراحة جات أجمل
نتمنى تعجبكم الوصفة و تجربوها
تحياتي الحارة للجميع
عندي مدة مدخلتش لكن اول ما عجبني هاد المونتو قلت نحطهولكم و مبعد كي نصور شورتي نحطها 
l
