السلام عليكم و رحمة الله و بركاته ابني الرضيع عندو أربعة أشهر الطبيبة ديالو قاتلي بداي تمد يلو يأكل و طبيب اخر مختص قالي حتى ستة أشهر علما أني أرضعته طبيعيا و الحمد لله وليدي جايب روحو. حبيت نعرف وقتاش يبدأ يأكل واش نمدلو. راني نستنج فيكم و جزاكم الله الف خير
مدام راكي ترضعي فيه من الاحسن تخلي لستة اشهر هذا واش رايحة ندير انا
فعلا لازم تنتظري حتى ستة شهور خصوصا مادام أنه يرضع رضاعة طبيعية
سلام اختي صح انا زوجي طبيب اطفال كان يقللي رضعي و كي يعود عندو ستة اشهر ابدي دخليلو الماكلة كل اسبوع ندخل حاجة وحدة حتى نعرف جسمه تقبلها و لا لالا او درك قاللي انهم اكتشفوا انه الاطفال قليلي الشهية لازم نندخلولهم الماكلة من اربعة اشهر و الا يتعودوا على الحليب و ما يتقبلوش اي اكل اخر دراسات و كل دراسة وش تقول المهم تقدري من اربع اشهر لكن التزمي جيدا بجدول الاكل حتى لا تحدث له حساسية في المستقبل لا قدر الله ربي يحفظلك وليدك و يعينك
السلام عليكم انا ولدي عندو ستة اشهر وبديتلو الماكلة في اربعة اشهر والطبيب تاعو هو الي قالي ابديلو بصح ماتكثريش لكان ترضعي بالببرون ديريلو نصف ملعقة فرينة تاع اربعة اشهر انا كنت ندير ربع مغرفة خطرتين في النهار وفي اللعشية ماديريش تثقال عليه واعصري شوية برتقال وخفيه بالماء وشوية سكر اعطيهولو مع الصباح ودخليلو بالشوية بتيسويس مع الغداء ومعاه شوية تفاح تكوني طيبتيه مع حبة تمر تنحي التمر وتعطيه التفاح الممعوس ومتكثريش ومتزيديش اكثر من هكا كل اسبوع دخليلو حاجة ومتكثريش ومتعطيشو الاكل بعد الساعة الثالثة راهو صغير ومتركديشو بعد الاكل راني نخاف من الاختناق مع انهم كامل يقولولي نوغمال.لازم تشوفي طبيب اطفال انا هو لي يمدلي البروكرام تاع الماكلة تاع وليدي ربي يحفظهم ويفرحنا بيهم وان شاء الله نكون افدتك واسمحيلي على الاطالة
اختي مادام جايب روحوا لا داعي لادخال الاكل مبكرا انسب سن هي ستة اشهر
السلام عليكم ورحمة الله وبركاته
أولا أختي من الأفضل حتى يصبح في عمره ستة أشهر وأنت ترضعيه طبيعي هذا شيئ رائع لكي يستفد أكتر من حليبك طول مدة ستة أشهر ،وعموما الطفل الي وزنه تحت 7 كيلو ملازمش مندولو ياكل لازم يكون 7كيلو باه نقدرو وكلوه
وأنتي وليدك جايب روحو الله يبارك عليه ويحفضو من سوء خليه يستفاد من حليبك حتى تكملي 6شهور وبدي توكليه كل أسبوع حاجة وتلاحظى إذا أوكي مفيش حساسية الحمد الله ، دخلي حاجة أخرى ومتمدلوش كمية كبيرة لأنه الصح في النوعية ، ومدخليش حاجة جديدة وهومريض ومتضغطيش عليه ممكن ميحبش النوع المقدم خليه وغيره مدة 3 أسابيع عودي رجعيه .
إن شاء الله نكون أفدتك وأي إستفسار أنا في الخدمة .
