مشكلتي مع سلفتي ذهبت إليها مع بعض الجارات لنبارك لها السكن الجديد
المهم بعدما رحبت بهن قدمت القهوة و الحلويات …سمعت ابنها الصغير يبكي فقامت …و بقيت انا نقدم للضيوف القهوة ..فرغت ليهم القهوة في الكيسان …و إذا بها تنظر إلى الكؤوس بسخرية ….وتقول واش هاد الشي فرغتي ليهم شوية قهوة و…و….و حبت توري روحها قدام الضياف بلي كريمة و مضيافة بصح ضيعت معايا …على اساس اني لم املأ الكؤوس مع اني فرغت القهوة عادي و ماعمرتش الكؤوس باه ما تسيلش …انا سكت وما قلت والو ….زادت عزوجتي كملتها بلي commentaire 
…وقالت كلام على اساس اني ما قمتش بيهم ….بعدها زعفت انا 
و ما وليتش نشوف و نضت من بلاصتي و رحت نلبس جلابتي و خمااري …..و حبيت نخرج ونخليلها ….جات تجري مورايا ….سلفتي و قاتلي حبيتي تحشميني قدامهم و بقات ترفع في صوتها عليها على اساس راني حشمتها مع ضيافها …على وجهي ريحي معاهم ووووو …بعدها جلست عادي و زادت عزوجتي كملتها …..ماعليهاش راكي مع خواتتك …يعني انا غلطت و ماعرفتش نسربي القهوة …. ….ما حبيتش نكبرها قدام الضياف و جلست عادي و حكيت معاهم ….بعدها روحت لبيتي و مازال نفكر في الموضوع ….و في تصرفي معاهم و تصرفهم ….و قبلها جرالي موقف مع سلفتي دائما ….لما مرض وليدها حبيت نروح نطمأن عليه عيطتليها 06 مكالمات بدون رد و زدت ميساج قلت بالاك ماعرفتش الرقم ….رحت للبيت واحد مافتح ….و هي علابالها لأنو زوجها قال لزوجي راهي سجلت رقمي عندها ….عاودت الإتصال في اليوم الثاني بدون رد .مافهمتش ..ارجوكم إذا راني غالطة في الحكم عليها انصحوني ارجوكم ….اختكم في الله
على حساب هدرتك مكاش الغلط هي بلاك تفهم الامور بطريقة خاصة
على كل ما يشقاش تعمري راسك بها و تزعفي في روحك و اذا تلاقيتي بها عادي هدري معاها نورمال
ربي يهنيك ختي
أختي هاد الامور تصرا الناس ماشي كيف كيف
على قول المثل السلفة حلفة اجبدي روحك اختي ديري الواجب فقط واياك تقولي ان السلفة مثل الاخت السللفة هلى العدو الاول
تهلي فدارك البسي ومشطي وتهلي فروحك ودارك وربي يهديهم
ديري روحك هاديك ممتلة لي ماهيش سامعة قع بيهم مام ماتزيديش تجبدي هدرة على موضوع تاع قهوة معناه ما خدمتليش وباينة هادوك ضياف راهم نخلعو فيها هي لي كبرتها من عندي جبدي روحك حتى يتوحشوك وكي تتلاقاي بيهم الواجب فقط وهدرة وقسرة قليلة وانفظي على روحك كي يكونو مواقف هكا قيمي روحك لازم تكون عندك شخصية كي تكون واثقة بلي ماغلطتيش
انا بالنسبة ليا هادا امر عادي السلفة واش حبيتي يجي منها عجوزتك ولا هي انا بالنسبة ليا لوستي ولا سلفتي
الا راكي بيتك مستقلة زيدي استقلي وثقلي رجلك وتليفون الا ما رفدتش ماتبقايش تعاودي وتعاودي الا قالولك ما جيتيش ما سقسيتيش قولها قلبي تيلفونك
ولا كي ماترفدش 2مرات ولا اكتبيلها مساج ديري واجب
ياك دوكا رايحين يرجعونا نبيبيو برك معناه واش راكي مليحة ريحتي مبروك عليك غير بالبيباج
خلاصة القول قيمي روحك رانا في وقت لي يدير واجب والخير ويحشم يرجعوه اسمدة للتربة
اختي كاين العجب ما يعجبوش ولو كان تولي شمعة تحرق روحك على جالوا خلي الامر لله هو وكيل كل مظلوم
كاين الناش الي لعجب ما يعجبهمش تولي شمعة وتحرق روحك على جالهم وما يحسوش بيك وكلي ربي والله خير وكيل
غير باش اتسقسي على الطفل اتعيطي 6 مرات فالتلفون؟؟وزيدي تبعثي ميساج …يا حسراه …عزي روحك اعزك ربي هذا ما انقولك ووفقك الله
ديري قيمة لروحك اللي ماقيمش ماتقيميهش ماتزيديش تعيطيلها وكوفي روحك كي تلقاتيها قوليهالها فالوجه نعيطو نسقسو عليك ومترفديش واصلا معاوتيش ياختي الناس تاع دوك لازم تتكبري عليهم شوي وثقلي روحك نتي بنيتك مشيتي وهوما يفهموها نقص كما هادي تاع تحشمك قدام الناس ماشي حق وغلطت معاك في عوظ ماتقولك بارك الله فيك كي عاونتيها حشماتك والله متاع خير اخطيك منها
السلام اختي اسمحيلي مي انتي الغالطة ديجا عيطتيلها من قبل ومارفدتش ورحتي ليها وما حلتلكش الباب انا لوكان اختي نعيطلها زوج مرات وماترفدش مانعاودلهاش مشي حتى سلفتي وزيد رحتي ليها حبيتي تعاونيها تسربي القهوة للضياف بهدلاتك وزدتي اغلطتي كي قعدتي عندها لوكان لبستي حجابك وخرجتي هي خمت على روحها قاتلك ماتبهدلينيش واختي باين بالي دارتلك هاذ الشيء باه تقطع الكونتاكت معاك افهمي وبالاك تزيدي ترخسي روحك مهما كان الحال اللي يقيم روحو يقيموه الناس الغلطة فيك الطيبة الزاءدة الناس تشوفها بلي ماعندكش كرامة اسمحيلي الا قستك بالكلام
انا تبالي غير سوء فهم بيناتكم و صاي حاولي تتفهمي معاها و اذا شفتي المفاهما مكاش غير جبدي و صاي
