مساء الخير حبيباتي 
راحت أختي عند خالتي نتاع دزاير اللي سرقتلكم من عندها وصفة النقاش قاتلي حطتنا مادلان خفيف يهبل قلت في قلبي عادي مالفة نديرو ويجي خفيف 
قاتلي جا خفيف خير من نتاعك آآآآآآآآآآآآآآآآآآآ انا هنا شعلت عندي اللومبة الحمراء : وحدة دير المادلان خير مني ؟ يا تعطيني الوصفة يا نقتلها خخخخخخخخخخخخخخخخخخخخ 
عيطت لخالتي قاتلي المادلان جاباتولي جارتي قلتلها روحي ليها جيبي الوصفة بسرررررررعة خخخخ
جابتهالي ( حتى من المخلوقة كي عادت عاقلة تقول انا هي خالتها خخخخخ قلبتها سراقة كي حالتي في جالكم ) جربتها وخرجت صح هايلة 
شفتكم ديما تحوسو على وصفات مادلان قلت مانبخلكمش بيها لانو انا عن نفسي نقلق من المادلان نحب ندير كيكة ومانكسرش راسي نطيب بالحبة بصح الحق نحب ناكلو كي نلقاه واجد
شوفو هاهي الوصفة بصح خليوها سر بيناتنا ششششششششششششش
راني بديت نخاف على روحي 
:
المقادير :
* 3 بيضات
* 1.5 ياوورت ممزوج لازم ممزوج أنا مالقيتش صومام جبت دانون ومن الاحسن طعم فراز او مشماش
* 1.5 سكر عادي علبة ممسوحة قد قد ( نكيل بعلبة الياوورت )
* 1.5 زيت علبة مانعمرهاش مليح ( نكيل بعلبة الياوورت )
* فاني
* 1.5 خميرة كيميائية
* 4 فرينة علبة ممسوحة قدقد ( نكيل بالعلبة نتاع الياوورت )
انا هنا عملت ضعف الكمية لانو عندي ثقة في خالتي ووصفاتها 
الطريقة :
* نحط في إناء ماء ساخن جدا ونخرج البيض من الثلاجة ونحطو في الماء الساخن حوالي دقيقتين ومن بعد نبدل الماء اللي راح يرجع دافي بماء ساخن آخر وننتظر دقيقتين ونستعمل البيض ,
* نشعل الفرن على 180° ونخليه يسخن
* نوجد الأواني اللي رايحين نطيبو فيهم المادلان ونحط فيهم لي كيسات ,
* نفصل الصفار عن البياض ( كي تفقسو البيض تحسوه دافي ) ونضرب الصفار مع ثلاث ملاعق سكر حتى يذوب السكر تماما ونتحصل على كريمة فاتحة اللون ونضرب البياض مع باقي كمية السكر ، طبعا نضرب البياض حتان يطلع مليح باش نبدى نضيف في السكر على دفعات ( انا حطيت البياض يتضرب في البيتران وضربت الصفار في صحن بالباتور باش نربح الوقت ) ,
صورة هذي المرحلة حذفتها عن طريق الخطأ ,
* نضيف للصفار الياوورت ونضرب شوية برك حتى تتجانس المكونات
* نضيف الزيت ونضرب شوية برك حتى تتجانش المكونات
* نضيف الصفار لخليط البياض وليس العكس وهذي نصيحتي ليكم باش الكيك او أي تحلية فيها بياض وصفار جيكم خفيفة والبياض مايهبطش : انو تفرغو خليط الصفار كامل فوق البياض وتخلطو جربوها رايحين تلاحظو الفرق ,
انا تعمدت خفقت فقط ثلاث ملاعق سكر مع الصفار لانو دسم مايحبش يذوب فيه السكر وفي نفس الوقت البياض كي يكون فيه كمية سكر مليحة مايهبطش كي تخلطوه مع الصفار .
ايضا قلتلكم تسخنو البيض ( كي تفقسوه تلقاوه دافي ) باش كي تضربوه يطلع بسرعة والسكر فيه يذوب بسرعة وهذا سر نجاح ليس فقط الجينواز وأيضا الميرانق والكاستال لانو فيهم بزاف سكر لازم يكون البيض دافي باش يذوب مليح فيه السكر ويطلع مليح ثاني ,
* نبدا نضيف الفرينة والخميرة على زوج دفعات ( الفرينة والخميرة نكونو غربلناهم مسبقا ) ونخلط بسباتولا أو ملعقة خشبية برفق من الأسفل للأعلى ( إذا عملنا ضعف المقادير نضيف الفرينة على ثلاث دفعات )
وهذا هو القوام المتحصل عليه رغوي وثقيل ماشي سائل كيما اللي متعودين عليه
* اللي تحب ممكن هنا تزيد شوية حبيبات شكلاطة وتخلطهم في العجينة وماتخافوش مايهبطوش لتحت وإذا خفتو رمدوهم في شوية فرينة قبل لا تضيفوهم للعجين . وومكن تحشيوهم شكلاطة تحطو نص حبة شكلاطة نوعية مليحة فوق عجينة المادلان من بعد كي يطيب تهبط تدخل لداخل في قلب الحبة ,
* نفرغ الخليط في لي كيسات نتاع المادلان وندخلهم للفرن ونخليهم حتى يطيبو ويحمارو مليح ( انا يحمارولي من تحت وفوق بدون مانزيد نشعل من فوق )
* كي نخرجهم نخليهم يبردو مليح قبل ما نخبيهم في علبة مغلقة باش ماينشفوش واللي ماتحبش المادلان ناشف تقدر إذا دارتهم في الليل كي يبردو مليح تثقبهم شوية من فوق بعود الاسنان وتسقي كل حبة بملعقة شاربات وتخبيهم في علبة الصباح تلقايهم ناشفين من الشاربات بصح تحسيهم منديين ماشي شايحين ,
* التزيين كل وحدة كيما تحب : شكلاطة ، كرام شانتيي ، نيستلي ، سكر ناعم ، معجون او تخليهم فرطاسين
شوفو من داخل خفيف يهبل وكي تعضو على الحبة باسنانكم يغوصو فيها كأنها اسفنجة والله روعة
نسيت نقوللكم ملاحظة مهمة : كي تضاعفو الكمية ماتضاعفوش الخميرة ديرو غير 2.5
إن شاء الله تعجبكم
تصبحو على خير وإلى اللقاء في وصفات مسروقة أخرى 
تحياتي ,,,,,,,,,,,,,,,, لهومة
كنت نستنى وقتاش تحطيه جا في وقتو عجوزتي تموت اعليه سلكتيني يعطيك الصحة حبيبتي خرجلك تحفة يشهي ماشاء الله
جاك هايل يعطيك الصحة
واووووووووووووووووووووو اختي يعطيك الصحة هايا انا نحب المادلين بزاف
ما شاء الله باين خقيف يعطيك الصحة وربى يعطيك ما تتمناى
يعطيك الصحة تقريبا نفس وصفتي
شكراااااا الهام الله يعطيك ويرضيك ويكون في ميزان حسناتك رائع
معطاءة كعادتك رب يعطيك على قد نيتك و كرمك .. باااااااارك الله فيك
مممممممم حبيبتي بارك الله فيك
ربي يخليك غير للسرقات المفيدة خخخخخخ
يعطيك الصحة لهلوبتي وصفة رااااائعة تسلمي
ماشاء الله شكل خرج رووووووعه وباين يشهي
بصح ا سمحيلي مانقدرش ندير حاجه مسروقة
يعطيك الصحه ويبعد عليك الشر وعين الحسدين
يارب اغفر له راه من اجلينا
ا
ممممم شكرا لك على الوصفة الهام و الله يعطيك الصحة
وصفة هايلةيعطيك اللصحة
يعطيك الصحة حبيبتي ليك وحشة إنت ومواضيعك ربي يحفظك ومزيدا من التتألق إن شاء الله (:
هذه مدة وانا نحوس على وصفة خفيفة للمادلان لانى جربت وصفات كثيرة
شكرا حنونة
