السلام عليكم اخواتي
جبتلكم اليوم نوع من انواع الخبز التركي يحضروه بكثرة في شهر رمضان هش وخفيف وساهل يحتاج فقط الى5د عجن والنتيجة روعة
راح نعطيكم المقادير نتاع قرصة واحدة بحجم خبز الدار لي ينباع في الكوشة
المقادير:
500غ فرينة
150مل حليب دافيء
150مل ماء دافيء
3م ك زيت
م ص ونصف خميرة الخبز
م ك سكر
ملح
بياض بيضة
للدهن نحتاج الى
صفار بيضة ،م ص فرينة،القليل من الماء،جلجلانية
الطريقة:
نخلط الحليب الدافيء والماء الدافيء
في وعاء صغير نحط الخميرة والسكر والقليل من الفرينة والقليل من خليط الماء والحليب نخلط ونغطيهم حتى تطلع الخميرة هنا ضاعفت الكمية لاني عملت زوج خبزات
في وعاء كبير نحط بقية الفرينة والزيت والملح وبياض البيض والصفار نحتفظ به للدهن ونضيف والحليب المتبقي ونفرغ المكونات لي خليناها تختمر
نخلط المقادير ونعجن العجينة لمدة 5د العجينة تكون تتلتص شوية نغطيها ونخليها حتى تختمر
بعدها ندهن البلاطو نتاعنا بالزبدة ونرش عليه الفرينة ونلم العجينة ونشكلها كويرة ونحطها في البلاطو نغطيها بالنيلون ومن فوقه منديل ونخليها ترتاح10 د هذا شكلها بعد ما ارتاحت
نبسطها على شكل دائري مانرققهاش لازم يكون سمكها مرتفع شوية اذا كانت تلتصق باليد ممكن نستعمل شوية فرينة في اليد ونبسطها
نغطيها ونخليها تختمر مرة اخرى حتى يتضاعف حجمها
بعدها نخلط م ص فرينة مع القليل فقط من الماء ثم نضيف صفار البيض ندهن الخبز
بواسطة الاصابع نزينه كيما في الصورة ونعاود ندهنه ونرش عليه الجلجلانية
ندخله يطيب في فرن مسخن مسبقا على200درجة حتى ياخذ اللون الذهبي
وهذا شكله النهائي
نتمنى يعجبكم الخبز وتجربوه ولاتنسوني اخواتي من صالح دعائكن خاصة ونحن في عشر الاواخر من هذا الشهر الكريم
في امان الله
ام اماني يعطيك الصحة على كل وصفاتك روعة وانت الاروع لانك تمنحي بصدق بارك الله فيك
Ya3tik asaha ichahi Rani adit alkhobza bah nafatrou biha ma3al3ilm antouma fatartou hna mazel rah binatna khamsse sawaye3e ghir zidi hat I khobza wahda hahahaha
بارك الله فيك
وصفاتك مضمونة حبيبتي عن تجربة
انتظر الرد على رسالتي الخاصة حبيبتي
ماشاء الله يبان هايل وخفيف راكي تدي من عند كل وحدة اجر ودعوة خير على ماتقدميه اختي بارك الله فيك وفي ولادك وربي يوفقهم
يعطيك الصحة يا الغالية ربي يجزيك الجنة على واش راكي تقدميهولنا
من فضلك سؤال الخبز اعجنتيه بالعجان ؟؟؟؟
يعطيك الصحة و بارك الله فيك
مشاء الله
شكلو يشهي وباين خفيف
يعطيك الصحة
روعة نجربه ان شاء الله وربي يكملك متتمناي
يسلموا هادوك اليدين لي ديما متميزين ومبدعين
الله يعطيك صحيحتك
بارك الله فيك
بارك الله فيك رائع
من فضلك لم افهم هذه المرحلة
بعدها نخلط م ص فرينة مع القليل فقط من الماء ثم نضيف صفار البيض ندهن الخبز
كل وصفاتك رائعة جزاك الله خير الجزاء على كل ما تقدمينه مشكوووووووورة اختي
دمت مميزة حبيبتي