السلام عليكم ورحمة الله وبركاته
لا تفصلنا الا ايام قليلة عن عيد الفطر المبارك ربي يدخله علينا وعلى الامة الاسلامة بخير و صحة و افراح لكل المسلمين … حبيت نسولكم واش طيبوا نهار اول العيد ؟؟و اذا امكن تذكرة الولاية و هكذا نتعرفوا على عادات و تقاليد كل ولاية ….. عيد سعيد و كل عام وانتم بالف خير
السلام عليكم ورحمة الله وبركاته
عاداتنا في ولاية البليدة اما كسكس او رشتة والاغلبية رشتة
وانا بادن الله في العيد فطوري رشتة ربي يتقبل منا ومنكم
صح فطوركم
أحنا جداتي تديرلنا طعام بالزبيب و الرايب و من جهة أخرى تدير شربة العدس لالفت و الزرودية و كي تحطلنا تسقي ليها و لعرايسها الطعام بالعدس و الذراري تسقيلهم طعام بالرايب و الزبيب
أما أمي تديرلنا طعام بالحم و الخضرة مرقة حمرا ولا تقلينا شوية لحم و كبدة .
خالتي تدير نهار العيد مرقاز مقلي و لحم حلو ….
أنا إن شاء الله رايحة ندير رشتة بالجاج
عيدكم مبارك ……
انا من ولاية بومرداس لكن اصلي من جيجل وراح يكون فطورنا باذن الله رشتة ولا شخشوخة على حساب اصلنا
لكن ف الولاية تعنا يديروا اغلبهم طعام بالمرقة حمرا
السلام عليكم
انا من ولاية المسيله وعداتنا الشخشوخه اول ايام العيد
ربي يتقبل منا صالح الاعمال يارب
وعيد سعيد
السلام عليكم إن شاء الله راكم كامل لابأس لبنات أنا من بسكرة نديرو شخشوخة نهار اول عيد معندي حتى واحد يجيني و نطيبها على 6 نتاع الصباح بقيت شادة في العادات نتاعنا في لبلاد نطيبها و نقعد وحدي مع ولادي ههههههه ربي يلحقنا إن شاء الله و تعيدو بالصحة و الهناء
سلام عليكم ، أنا من بسكرة واحنا في دارنا نحبوا الطعام بالمرقة الحمرا مع اللحم الأحمر يمي يمممممممي
السلام عليكم انا في بتنا عند ماما في وهران تديرو بركوكس وعند عجوزتي في غليزان دير طعام بي المرقة حمرا وانا نروح صباح العيد عند عجوزتي ونفضر عندها وادا امكني وتيسرت الامر نروح في المساء لدرنا عند ماما او حتى تاني يوم العيد خسب الركبة ركم تعرفو الي معندوش سيارة كيفاش حالو
صح عيدكم كل عام ونتوما بالف خير
في عادات سكيكدية يديرو البغرير مع حاجة اخرى اما جلبانة اوجاري لبقى من البارح………………المهم حاجة مرقة اما قسنطنيين الشخشوخة اجبارية مع حار مقلي وسلاطة
أحنا نديرو كسكس بالدجاج إما مرقة حمراء أو بيضاء (القبايل العاصميين)
سلام شكرا ليك على الموضوع
انا من ولاية ام البواقي في دارنا نديروا كسكسي بالمرقة البيضاء
Slm
Je suis min biskra w ndiro cha5cho5a Wla barboucha belkaboya wla l3iche 3ada ta3 leblad l3iche
Saha ftorkem
مرحبا يعطيك الصحة اختي على هاذ الفكرة فالعلمة نديرو شخشوخة تاع لفطير وكاين الي يسميه لمسمن ولا النعمة بلى بيه ما يحلاش العيد والغدا على 9 تاع الصباح
في باتنة نديرو بربوشة وعند عجوزتي في بريكة يديرو الشخشوخة