السلام عليكم
دون اطالة, مشكلتي ان علاقتي مع والدتي متوترة, لأنني أحسها تميز بين و بين اخوتي في المعاملة, للأسف هذا الشعور يتملكني منذ الصغر, فهي كل مرة تميل لاحد دون الاخرين و انا الان في 24 من العمر
أحيانا تتصرف معي بطريقة تبكيني و عندما تحس بأنني انزعجت تقول بانه مجرد مزاح
مثلا في رمضان جاء خطاب لرؤية اختي التي هي أقل مني, و كنت فرحة لاختي و ادعو الله ان يتمم لها, و افكر ماذا سارتدي بدوري, لانه لا يوجد من سيستقبلهم مع أمي, اذا بها تلمح بانه لا داعي لكل هذا لان الخطاب لاختي و ليس لي, و كأنني أنوي الظهور بحلة أجمل من اختي عن قصد (با نفسد على اختي) لانه للاسف خطبت من قبل و ما كتبش المكتوب,
تصرفها هذا لم يرق لي اطلاقا و بت ابكي ليله كاملة, عندما جاؤوا ارادت مني أن اساعدها فاخبرتها بانني لن أقابلهم, فثارت قائرتها و قالت لي بانه مجرد مزاح
هذه الأيام, هي منحازة لأخي جدا, ذات صباح جلست لأفطر و كا هو جالس فقال لي ‘علاه تقعدي؟ موالفة تفطري معانا’ انا من الاول كنت راح ندي فطوري و نروح, غاضتني روحي, حكمتها في قلبي و سكت
ثاني يوم زاد عاودلي نفس الكلام ما سكتش رديتلو, قاتلي ماما ”حسني اسلوب هدرتك’ , قلتلها ماكيش تسمعي فيه قال امس و زاد عاودها اليوم, قاتلي يتمسخر معاك برك, قلتلها ما يتمسخرش معايا هكدا,
و من ثمة و هي ما تهدرش معايا, و ما يثير غيضي أيضا أنها تشبهني بعمتي و خالتي و كل منهما سامحهما الله لا يحسناني الى والدتما أي جدتايا, و أنا و الله ما نديرلها حاجة,
لكن الله عالب تغيضني روحي من كلمة, دبرو عليا كيفاه ندير معاها؟؟؟؟
بش تتهناي من هذا المشكل غيري نظرتك لامك لازم تقبليها كيما راهي
متحوسيش امك تتبدل لالا انتي بدلي من عقليتك
وتولي كلما هي تقول حاجة انتي تقبليها عادي
في الاول والاخر يماك تحبلك الخير
ربي يقدملك الخير يا اختي ويرزقك بالزوج الصالح عاجلا غير اجل
أختي الأم تبقى أم مهما قالت أو فعلت و تأكدي أنه مامن أحد سيحبك و يهتم لك أفضل منها
لن أقول لك أنت على حق لأنه مستحيل أن يكون في قلب الأم مكان لأحد أبناءها دون الآخر أو أكثر من الآخر
لكن سأقول لك أختي تذكري أنها من حملك في بطنها 9 أشهر عانت فيها الأمرين من وحم و ثقل و مشاكل هضمية و و و و
هي التي عانت الأمرين عند ولادتك نسيته حالما حملتك بين يديها
هي التي سهرت الليالي لإرضاعك و تهدئتك عند بكاءك
هي التي أفنت حياتها لتربيتك أحسن تربية
عزيزتي مهما وصفت لك معاناتها لن تفهميها حتى تجربي و تمري بما مرت به
عزيزتي حاولي أن تقوي من نفسيتك
أنت كيما نقولو حنا روحك عزيزة عليك بزاف
حاولي مواجهة الكلام القاسي بالإبتسامة الحقيقية و ليست الزائفة
دربي نفسك على تقبل الإنتقاد و الهزل لأنهم في الأول و الآخر أهلك و مستحيل راح يقصدو أذيتك
دربي نفسك على ضبطها عند الغضب
كي يقولولك كلمة تجرحك قابليها بإبتسامة و اعلمي نفسك أنها مجرد مزحة باش ما تبقاش في قلبك
أختي عن تجربة الأم ما راحش تفهميها حتان تولي زوجة و أم
انا هكذا بانتلي
اذا كان يستعرفولك بلي يقصرو معاك، يعني هنا المشكل انك ما تتقبليش كلامهم بالشكل المناسب
استقبلي حديثهم بصدر رحب الاخت وماتنسايش ان بعض الظن اثم
ما تنويش ف روحك انهم بكلامهم يهينوك و لا يطيحو بقيمتك
كون جيتي تحبي يسكتو ما يهدوش معاك قاع كون ما راكي كتبتي ملتحت "ماهيش تهدر معايا"
يعني راكي تشكي من عدم حديثها معاكي
هدرت معاك شكيتي ما هدرتش معاك ثاني شكيتي ؟؟
اذا كان اسلوب يماك ف التعامل هاكذاك موحال تقدري تغيري الآخرين اختي تقدري تغيري روحك برك
تقدري برك تبدلي اسلوبك ف التعاطي معاهم
و كون تبقاي تبكي راكي تشحني ف روحك عليهم داخليا و كرهك راح يزيد
تحبي تشعري انك تكرهي يماك ؟؟
ما نظنش واحد يحب يقول انا مسلم يحب امر كيما هذا
ما تنسايش الجنة تحت اقدام الامهات
مالا اختي استهدي بالله، استغفري وهدي شوية اعصابك ، انساي المشكل، انساي الهم ، انساي الحزن
ديري كاش عفسة طلعلك المورال
و ولي لحياتك العادية
يا أختي
هذا نبي الله يعقوب وكان يحب يوسف أكثر من باقي إخوته
هناك في كثير من الحالات
أباء وامهات يحبون البعض على حساب البعض والقلب وما يهوى
تقبلي امك بتلك الطريقة
والمهم كوني مستقبلك
أدرسي جدي عملا
وستحترمك رغما عنها
نقولك حاجة قابلها كانش ما نهار وقوليلها الي في قلبك وهدري معها بالعقل وقوليلها سامحني اذا جرحتك لازم تسيريها هذي الام
حتى ولوكانت هي الي جرحت مشاعرك الام الي ربات وكبرت وعلمت مهما عملت وتحاولي تردي جميلها ما يتردش
قوليلها تسامحك الام لطيفة وحنونة راكي تقوللها كلمة وتبداي تبكي تذرف دموعها وتنهمر كالوديان
نهار استغفري الله وصلي وادعي الله
ولا حول ولا قوة الا بالله
واعلميها ان التمييز بين الأولاد والتفريق بينهم في أمور الحياة
سبب للعقوق ، وسبب لكراهية بعضهم لبعض ، ودافع للعداوة بين الأخوة ،
وعامل مهم من عوامل الشعور بالنقص
وانك اذا وقع كل هذا فهو في ميزان سيئاتها
لذا وجب عليها ان تعدل في ما بينكم حتي لا يقع المحضور
والله المستعان
راني حاسة بيك أختي خطراكش حتى أنا ماما تجرحني بهدرتها ونقلك بلي كي تكوني حساسة ياسر راكي تنضري ياسر امالا ديري في بالك واقنعي روحك بلي راك قوية وحاجة ماتقلقك وكي تهدر معاك ماماك حاجة ماتعجبكش في هاديك اللحظة خممي في راسك واقنعي روحك بلي ما تاثرتيش باش متتقلقيش وعودي كل ماتتقلقي روحي صلي 2 ركعات وادعي ربي يفرج عليك ويرزقك بولد حلال يهنيك وتهنيه ؛ راني نصحتك كيما نصحت روحي وراني ندعيلك ان شاء الله اختي .. بالتوفيق ..
اختي ان استطعتي راسليني علي الخاص لو مافيهاش احراج
و الي ماتقدريش مازال ماوصلتيش ل 1000 مشاركة ابعتيلي مع مشرف او مشرفة برك
و انا نراسلك
اما بخصوص الموضوع لا تحملي نفسك مالا طاقة لها تمرضي روحك برك بالتوسويس
وفي الاول و الاخير تبقي امك ماعندك ماديري الا اذا حبيتي تولي كي عماتك ههه اني ندحك برك يضهر انك دو معدن اصيل
ربي يهدي الامهات و الابناء سواءا
لانوا كاين امهات حقيقة كيما هكدا " مرة انا سنعت امام مسجد خطب علي هاذا الموضوع ودعا الاولياء الا المساوات بين الاولاد
حنونه مشكلتك فكرتني في مشكلتي بكري مع ماما ربي يرحمه نحس نفس مشاعر تاعك مي انا الى اخر يوم في حياته بقيت نحس انه دلمتني مي صدقني ام بكل هبال تاعه تبقى ماما مطاقش فينا ومتحملش علينا صدقني انا متنيه ترجع برك دقيقه نقله اسمحلي لاني دلمتك مي سامح الله تصرفات بعض امهات يعملوا اشياء يحسسسوك انك ماشي بنتهم ومن باعده تقلك لا انا مناش قاصده صدقني انا حاسه بيك لاني عشت نفس حالتك ولدوك وبعد ما توفة امي وانا عندي هدا جانب في حياتي مؤلم بلبزاف مي كما قتلك تفهمي ماما لانه تبقى ماما لو كان صح تكرهك
سلامي حنونه
ربي يهديها ويرزقك بولد الحلال الي يهنيك يارب
عندك 24 سنة الله يبارك راكي كبيرة و تغيضك روحك كل ما يحكيو معاك انا مرة قلت لاختي اعلاه تعدلي روحك حابة تدي الخاطب لييك و كان نهار ادااك خطبة اختي الاخرى و عاااااديي يدهرلي راكي حساسة بزااف و لكن او قريب وقتك و تتزوجي و تتوحشي عايلتك
شوفي اختي والله غي تهلي في أمك مهما تفعلك أنا أمي ماتت منذ 7 شهور و عمري الآن 17 سنة كم أفتقدها أتمنى لأمك طول العمر استخيري بالله أعانك الله ختي والله الأم نعمة لا يشعر بها إلا من فقد أمه للأبد مثلي .
قد تفضل الام ابنا على اخر لكنها لن تكرهك ابدا حاولي تقبلها كما هي او تكلمييي معها صارحيها بما تريدين او ارسلي لها رسالة اكتبي فيها كل مشاعرك التي تشعرين بها وهي ستقدر الوضع
|
المشاركة الأصلية كتبت بواسطة نوسة النموسة
 انا نقلك حاجة يا اختي
بش تتهناي من هذا المشكل غيري نظرتك لامك لازم تقبليها كيما راهي متحوسيش امك تتبدل لالا انتي بدلي من عقليتك وتولي كلما هي تقول حاجة انتي تقبليها عادي في الاول والاخر يماك تحبلك الخير ربي يقدملك الخير يا اختي ويرزقك بالزوج الصالح عاجلا غير اجل |
بارك الله فيك على الاجابة