تحياتي العطرة لكل الحبيبات الغاليات اخواتي في مدونة الجيريا
حبيت نقدملكم حلوة السيقار كاين اللي يعرفها وكاين اللي ما يعرفهاش
رانا هنا كلنا باه نتعلمو من بعضانا
وهاذ الحلوة راهي بنينة بزاف وتحمر الوجه خاصة اذا كانت الجلجلانية وحلوة الترك من النوعية الجيدة
المقادير
اللي عملت واللي راهم في الصورة خرجولي تقريبا 95 حبة
بصح انا رايحة نمدلكم مقادير نتاع 45 حبة
المقادير
نحتاج الى250غ جلجلانية بيضاء يعني ماشي محمصة ويارت تذوقوها قبل لا تشروها لانومرات تجي فيها ذوق ورائحة العفن حاشاكم
250 غ فرينة
كاس نتاع تاي زبدة ذايبة
ماء الزهر
نجمع هاذ المقادير بماء الزهر نشكل عجينة
نحطها في كيس بلاستيكي
الحشوة
نحتاج الى كوكاو مقلي ومرحي عادي حوالي 600 غ
200غ كاكا بيجو يعني حلوة الترك من النوعية لمليحة ولبنينة لانها هي اللي رايحة تبنن القاطو
عسل باه نلم الحشوة الحشو يكون كيما لعجينة ماشي جاري
التزين
عسل
كمية من البيستاش المرحي
شوكولا بيضاء
ملمع غذائي سلك
حبيبات جوز
التحضير
نطرح العجينة عادي ثم نطبع بقطاعة دائرية
ناخذ هاذ النوع من السجائر
نحاول نلضهم شوية على خاطر يجو شوية مفتوحين باه ما جينات الحبة خشينة
شوفو الفرق
نحط سيجار في الوسط ونلم عليه العجينة بهاذ الشكل نضغط في الوسط بالشوية
لما نخلص نحط زيت يسخن على نار متوسطة ونلوح بالحبة نقليهم وكل ما نلوح حبة نحطها على الجيهة اللي غلقنا منها ونحط عليها الفرشيطة ثوانيي باه ما تتفتحش
هنا بعد ما خلصتلهم القليان شوفو لونهم ذهبي فقط
وراهم يتنحاو بسهولة من السجائر سواء كي يكونو سخونين او باردين
نحشيهم بالحشوة من الجهتين
ثم نعسلهم مليح في عسل دافئ مخفف بماء الزهر
نحط جوانب الحلوة في البيستاش المرحي
ناخذ نصف حبة جوز نلصقها في وسط الحلوة بواسطة الشوكولا البيضاء الذائبة
ثم نعمل خطوط من نفس الشوكولا
نرشهم بالملمع الغذائي اللي هو السلك
نقدمهم بالصحة والهناء
نتمنى تعجبكم وجربوها راهي بنينة بزاف
في امان الله حبيباتي
يعطيك الصحة خرجت روعة الله يبارك وصفاتك دايما في القمة خفيفة و تحمر الوجه و تزكى و اقتصادية يعطيك الحة شكرا
يعطيك العافية على الوصفة تشهي و راني من متتبعي وصفاتك لي حمرتلي وجهي قدام زوجي و ضيافي شكرا جزيلا على المجهود الرائع
واو ما شاء الله باين بلي هايلة يعطيك الصحة.
4444444444444
يجي مع لتاي هايل أااااااااااااااااااااااااااااااام
ya3tik shihtek hayla hnaya andna nssemiwhom les noeuds
يعطيك الصحه
ماشاء الله عليك حبوبتي إسمهان حلوة رااااااائعة جدا أعجبتني بزااااف و قريت الوصفة بتمعن كبير .. خسارة ماعنديش الجلجلانية كي نشري نسييها تجي هايلة مع لاتاي في الأفراح … رايحة نقول عليها لأختي لأنها تخطبت ممكن جدا تعملها
للتثبيت لتعم الفائدة
حقى قوليلي إسمهان لعزيزة ياخي تجي هشوشة في الفم ؟؟؟؟
حبييييبتي اسمهااان فكرتيييني بييها هااد الحلوى كاانت نسييبتنا تدييرهم على شكل كوورنياات و اشتهرت بييهم نلقووهم عندها في كلللل المنااسباااات وااااو روووووعة دووقهم يهببببلللل .. و الشكل الجدييد لي درتييه و التزيين بالبييستااش زااد فييهم النص .. ماشااء الله عليييك تححححفة .. تسلم اﻷياااادي يا قلبيي موااااااااااح
يعطيك الصحة خرجت روعة الله يبارك
رووووووووووعة و باينة بنيييييييييينة..
السلام عليكم صح اختي حلوي حاوي بنينة بزاف وتوالم اي مناسبة انا نعملها منذ مدة غير الفرق اني في العجينة نضيف 2 معالق كبار عسل و في الطهي نطيبها اولافي الفرن قيس ما تبياض برك وتحكم لافورم تاع الكورني مدة 5د فقط و منبع نعاود نقليها تجي محمر مليح من داخل و من الخارج اما التعسال نعسلها قبل ما نحشيها ونخليها تقطر شكرا وتقبلي مروري
4444444444444444444هايلة يعطيك الصحة تستاهلي احسن تقييم
حلوى رائعة كروعتك باينة انها بنينة وحبيت نسقسيك تجيى هشوشةوت>وب في الفم ولا لا ياريت تجاوبيني اختي الفاضلة ولكي جزيل الشكر