أتمنى أنكم في أتم الصحة والعافية
أقدم لكن بدون أي إطالة عملي في تحضير
كعكة دمية باربي للأطفال
حضرتها بمناسبة عيد الميلاد
إن شاء الله تعجبكم
أولا: طريقة إعداد الجينواز السحرية اللي تصلح
تارت وتصلح مادلان وتصلح مسكوتشة والله هايلة
باش نحضر جينواز تاع مول عادي لازم
–الكوشة نشعلوها على درجة 180 قبل ما نبداو الخدمة
–باطة ياوورت نفرغها و نغسلها ونشفها
باش نعبر بيها
–4 بيض
–ملعقة صغيرة عطر فانيلا
–زوج باطات ياوورت معمرين سكر
نخفق مليح بالباتور لازم تولي بيضاء اللون
–نضيف باطة الياوورت
–زائد باطة ياوورت معمرة زيت
ونخلط مليح
من بعد نفصل على الخلاط الآلي ونخلط بيدنا من فوق لتحت
–زائد 4 باطات ياوورت فرينة مغربلين ومخلطين مع زوج صاشيات فرفارة Levure ومغربلين مع بعض ونخلط من فوق لتحت
ندهن مول بالزبدة مليح نذرذر عليه الفرينة
ونخلي العجينة ترتاح 10 د
ندخلها الفرن 10 دقايق ونقصله ل160 ولا 140 درجة ومانفتحش الفور قبل 15 أو 20 دقيقة باش ما تنفش
وهنا المول والفور يلعبو دور فالطياب مثلا مول ثقيل يطول ومول خفيف ليه ليه، كوشة سخونة بزاف يتشوط من فوق ويبقى معجن من الداخل وكوشة باردة يهبط لازم تشوفي انت واش راكي موالفة في كوشتك
من بعد ما يطيبوا إن شاء الله نتحصلو على هاد الشكل
أنا درت 6 بيضات فالكيكة الأسطوانية الكبيرة و4 بيضات فالكيكة الأسطوانية الصغيرة و4بيضات فالكيكة المستديرة يعني 14 بيضة كل
وهاداك العبر صحيح وقادري دوبلي ولا تنقصي ديري غير زوج بيضات
الآن الأمر الحاسم التزيين
لازم المسكوتشات يبردو مليح ومن الأحسن ليلة كاملة أو 5 ساعات على الأقل باش تقدري تتحكمي فيهم وما يتكسروش أبدا وفالثلاجة
للتزيين شريت بودرة كريم شانتيي تنباع 90دج لل100غ الله أعلم تكون في هاد الثمن
المبدأ هو 95غ بودرة الكريم شانتيي ديريلها زوج مغارف كبار سكر قلاصي ولا مغرف ونص من بعد زيدي حسب الذوق
وديريلها كاس تاع ليموناد تاع حليب بارد جدا من الثلاجة
وتخفق في خفاق آلي مافيهش بيض ولازيت ولاحاجة باش ما تهبطش ونخفق بسرعة وحد 10 إلى 15 د كلما خفقنا كلما زادت كثافتها حتى تطلع مليح أنا درت
–300 غ بودرة الشانتيي (جاتني زاف وشاطت زيادة حولتها مثلجات)
–سكر قلاصي حسب الذوق
–الحليب عيني ميزاني
–ملونات غذائية استعملت الوردي والأصفر
وهاهي مخدومة
والله هايلة وتصلح حتى مثلجات مافيها ريحت بيض ماهم يحزنون وقادر حتى تعطروها وتلونوها كيما حبيتو
–الآن ديت الكيكة المستديرة طليتها بشكلاطة امباسادور ذايبة (ممكن تستغنوا علع الشكلاط)
–وقسمت الكيكات الاسطوانية على 3 وتشربيهم بالسيرو وإذا ما عندكش ماديريش لأنها تجي شوي قاسحة بلا سيرو أي سيرو عادي (ماء وسكر على النار ويبرد مليح ) ولا سيرو تاع الأنانس بصح إذا درتي سيرو تاع فواكه معلبة لازم تستهلكيها تم تم لأنها تطلق ريحة إذا طولت فالثلاجة
المهم فهمتو المبدأ والصور توضح أكثر
والآن نحي رجلين الدمية وندخلها وسط الكيك لي نكونو ثقبناه بالسكين فالوسط
فالأخير نلبس الكيكات بالكريمة
ونبأ بpoche adouille
ندور حتى نشكل فستان ولي ماعندهاش دير صاشي تاع حليب كيما أنا
وطريقة قصه باش يخرج زخرفة هي
أول شيء نقصه من الداخل يعني عموديا حوالي 0.5 سم من بعد نحي برك شوي من العرض وخلاص (نتمنى فهمتو الفكرة)
وهاهو التزيين وزوقت بدراجي وبفرميسال نتمنى تعجبكم
وهاهي عن قرب
وهاهي من الداخل
وهادي نفس العجينة كنت درتها من قبل تاع جينواز
ونفس العجينة أيضا تجي مادلان روعة فقط في حالة المادلان نديرو زوج باطات ياوورت تاع ياوورت في بلاصة وحدة
أتمنى أن ينال الموضوع إعجابكن وأي استفسار أنا هنا وتفضلوا ما تحشموش بداو بسم الله
ضرك نحضرلكم القهوة والشاي ونجيب العصير والليموناد ومين نرجع نلقاكم رديتولي الخبر
في أمان الله مع وصفات أخرى
واااااااو شكرا لك
|
المشاركة الأصلية كتبت بواسطة بنت غليزان
 واااااااو شكرا لك
|
العفو اختي أنا نفرح مين تجربيها والله ساهلة ماهلة
الله يبارك عليك حنونة … مي فيها شوية تعب ههههه
الله يبارك تحفة يعطيك الصحة
واو رائعة وصفة سهلة
روعة يعطيك الصحة
choukran laki kount rah norkad fatantinii jatak hayla ki nhabou lhaja ndirouha bi itkan lah yatik esaha
الله يبارك تحفة
رووووووووووووووووووووووووووووعة ورووووووووووووووووووووووعة
جربن الجينواز على الأقل وردولي الخبر راهي ماكان ما أحسن منها تحفة ما تهبط ما تديرلك مشاكل
ماشاء الله اختي يعطيك الصحة
يعطيك الصحة عجبتني
الله يبارك خرجتلك هايلة