حبيباتي رغبة الى طلب الاخت ام رمزي وكل من احبت ان تتعلم طريقة عجني للمطلوع اقدم اليكن التفاصيل بالشرح والصورة
بداية مع المقادير
فرينة حسب الحاجة ..البارحة اكثرت كان عندي ضيوف بالرغم من ذلك لم يبق منها شيء +الملح +خميرة الخبز+خميرة الدار +حب الطيبة او البعض يسميه السانوج +ماء بارد …..استثناء في الصيف والعكس في الشتاء تكون بماء دافئ
اضيفي لها الماء
بعدها لايميها ملزمش تكون جارية في الاول باه تقدري تدلكيها شوية مشي بزاف
وبعدها بيدك اضيفي الماء ودبزيها كما في الصورة
ثم قومي برفعها من الاسفل الى الاعلى ومن كل جانب
وبعدها زيدي ديري يديك في زوج ورفعيها باش يدخل فيها الهوا وتجيك خفيفة وهشة
بعدها غطيها وخليها تريح فترة قصيرة يعني حوالي 15 د في هذ الفترة مسحي السنياوات بالزيت ورشيهم بالسميد مخلط بالفرينة
بعدها عاودي فشيلها الطلوع وليميها ثم عاودي ارفعيها من الاسفل الى الاعلى ومتنسايش ديما تشمخي يدك بالماء ومتكثريش باه ماتجيكش جارية والعكس متخليهاش يابسة وناشفة عينك هي ميزانك وعاودي غطيها وخليها ترتاح حتى كي تشوفيها طلعت عاودي نحيلها الطلوع وليميها كما في الصورة وديري الفرينة بالجنب باه تقطعي فوقها الخبز نتاع الكسرة
بعدها قطعي بيدك العجينة حسب حجم السني نتاعك كما في الصورة ثم ليميها في نقطة واحدة على الفرينة
ثم احميلها بيدك ونفضيها من الفرينة وحطيها في السنيوة وكملي مع باقي العجين باه تقعدك القصعة خاوية وتقدري تخبزي فيها
حطيها في السنيوة وزيدي الباقي يعني متخبزيش حتى تكملي كامل العجين
بعدها نحيها من السنيوة وخبزيها غير شوي يعني متخليها تكبرلك في القصعة
ثم رفعيها بيدك وشيليها كيما البيتزا …باه تجي خفيفة مش غليطة وتجي هشة من الداخل لهذا قلت لك ماتخبزيهاش بزاف في القصعة يعني متكبريهاش باه كي تشيليها بين يديك متفقديش السيطرة عليها
تحطيها في السني مباشرة وكملي مع الباقي نفس الطريقة …
ملاحظة :
كي تخبزي الكسرة نتاعك عمرك لا تقويلها الفرينة باه تخليلها شكل شباب كي تطيب يعني متجيكش شهبة بالفرينة
بعدها غطيها مليح بكتانة وفوقها زيدي جلد نتاع الطابلة غطي بيه باه المطلوع نتاعك مايضربوش الهوا وتجيك مشلحة
كي تشوفي العجينة طلعت …يعني دخليشوية من صبعك فوقها وشوفي اذا هبط وبلخف طلع اعرفي بلي خلاص راهي واجدة واذا انت كثرتي مثلي العجين طيبي الاوائل والباقي ديريه في الثلاج وغطيه باه مايخسرلهاش الطلوع من السخانة
وهذا شكلها وهي تطيب في الكوشة
وهذا بعد ما طيبتهم كامل
والباقي استمتعو به بعدما قطعتو وحطيتو على طاولة الافطار
شهية طيبة وان شاء الله تعجبكم
الحمد لله على كل حال ونعوذ بالله من سوء الاحوال
صح صيامكم وربي يتقبل منا ومنكم
امممممممممممم مطلوع وعليه الكلام
يعطيك الصحة حبيبة ربي يخليك
ربي يجازيك كل خير ويحققلك مبتغاك في القريب العاجل يارب
السلام و عليكم ختي حنا في تبسة هاذي الكسرة نقولولها كسرة الكوشة اما المطلوع هو الي تطلع و طيب في الطاجين المرقوم تاع الطين
[quote=الجوهرة النادرة;1053805571]
ربي يجازيك كل خير ويحققلك مبتغاك في القريب العاجل يارب
[/quo
أمين يـــــــــــــــــــــــــــــــــارب
تسلمي حبيبتي
ماشاء الله تشهي
مجهود تشكرين عليه
ربي يشفي الوالدة الكريمة هي وسائر مرضى المسلمين ويطول في عمرها
للتثبيت
وشكرا لك اختي ام كوثر على الدعاء والتثبيت
جزاكم الله كل خير وصح صيامكم وربي يتقبل منا ومنكم
يعطيك الصحة خرجلك شباب ويبان خفيف تقربا نفس الطريقة نتاعنا
فقط حنا منزيدوش خميرة الدار والسنيوات ندهنوهم بالزيت برك بلا ما نضيفو السميد مع الفرينة
أسأل الله رب العرش العظيم ان يشفي الوالدة الكريمة
بارك الله فيك
ربي يشافيلك ماماك ان شاء الله .. احنا في الشرق المطلوع عندنا يطيب في طاجين الطين … بانتلي صعيبة طريقتك
واش هي خميرة الدار
|
المشاركة الأصلية كتبت بواسطة sirina_angel
 واش هي خميرة الدار
|
خميرة الدار هي العجين المتبقى في القصعة …قومي بجمعه بالماء وزيدي شوية سميد كشغل تنقي القصعة من بقايا العجين بالسميد …كي تلايميها تولي عندك قطعة صغيرة من العجين ادلكيها غير شوي وديرها في صحن
اذا كن صيف مباشرة ديريها في الثلاجة …واذا كنا شتاء خليها تطلع وبعدها ديريها في الثلاجة
تبداي كلما تكملي العجين تنقي القصعة وهذيك البقية مترميهاش وتتربى خميرة ونسميها خميرة الدار
بارك الله فيكن حبيباتي وجزاكم الله كل خير للدعاء على امي بالشفاء
شكرا شكرا جزيلا
صحيح طريقة العجين التي استعملها صعبة لكن بالتعود تصبح سهلة وسريعة
السلام عليكم و رحمة الله تعالي و بركاته
أولا : اللهم أشفي و عافي أم الجوهرة النادرة, و شكرا جزيلا علي الشرح الوفي لخبز المطلوع ,