حبيباتي اخواتي مساء الفل والورد والياسمين رانا في فصل الصيف مع المناسبات والنجاحات ربي يخلي ايامكم كلها افراح
علابالي كلنا نعملو لي تارتولات ماهيش حاجة جديدة لكن صدقوني العجينة اللي نقدمهالكم اليوم هي اروع عجينة عملتها لحد الآن جات بين البريزي والصابلي كانت عملتها نيرمين هنو اللي تقدم ولا بالاحلام عندها مدة وهي في الاجندة نتاعي كنت متخوفة لكن جربتها والنتيجة مانحكيلكمش والله روعة بدون مبالغة تصلح للفاتحات والنجاحات ولا لشهر رمضان في السهرة مع عصير نتمنى تجربوها وراح تعجبكم وماتنساونيش بدعواتكم
المقادير
500غ فرينة مغربلة+ علبة زبدة لابال نتاع 250غ تكون باردة+قرصة ملح +4 ملاعق كبيرة سكر عادي +شوية فاني بودرة تقريبا ملعقة صغيرة +2صفار بيض+4ملاعق كبار زيت عادي +مغرف صغيرة خميرة الحلوى+4 ملاعق ماء بارد ولا حليب بارد
اولا تخرجي الزبدة الباردة وتقطعيها مربعات وتحطيها فوق الفرينة وقرصة الملح و 4 ملاعق سكر عادي
وتدلكي باصابعك من غير ماتعجني يعني كلي راكي تقصي في الزبدة مع الفرينة وهدا هو السر كي تتداخل مليح مليح وتتخلط كل الزبدة مع الفرينة تتحصلي على حبيبات رملية شوية خشينة زيدي صفار البيض والفاني والخميرة والزيت والالحليب او الماء
لمي الكل راح يتلملك بسهولة لكن حذاري تعجني لمي برك تتحصلي على عجية ملساء وطرية كيما في الصورة
استعمليها مباشرة ماتخليهاش ترتاح لانها فيها البيض والخميرة كيما الصابلي
ادهني لي مول الصغار نتاع لي تارتولات من الاحسن تستعملي اللي قاعدتهم متحركة حتى مايتكسرولكش
اعملي كويرات من العجينة وحلي كل كويرة في المول
رققي مليح القاعدة وخلي الجوانب شوية خشينة حتى ماتتفتتش
انقبي مليح القاعدة بالفرشيطة
وكي تكمليهم كامل وتنقبيهم مليح دخليهم لفرن ساخن على 180درجة من فوق وتحت وفي نصف مدة الطهو كي تبدا تطلق في ريحة التطياب وتصفار غيرشوية خرجيها واضغطي شوية على القاعدة من غير ماتكسريها باصبعك لانها فيها الخميرة وراح تتنتفخ وعاودي رجعيها حتى تاخد اللون الدهبي كيما الصورة ماتخليهاش بيضاء طيبيها مليح
خليها تبرد خلاص من بعد نحيها من ليمول واما تحشيها مباشرة ولا خبيها في بورت مونجي ودخليها الثلاجة ولا غرفة باردة حتى تجي تستعمليها
انا شريت كرام باتيسيار الواجدة بذوق الفاني وبذوق الموز خدمت كل علبة مع نصف لتر حليب و3 ملاعق كبار سكر عادي فوق النار حتى ثقالت خليتها تبرد وعاودت حليتها بالباتور واستعملتها
زينيها بفواكه حسب الموسم وادهني وجهها بلاجولي ولا الناباجا ولا معجون مشماش مخفف حتى ماتتاكسدش
ملاحظة: هاذ الكمية تخرجلك حوالي 34 حبة من ليتارتولات ولا ليباركات حجم صغير
انا عملت نصف الكمية خرجتلي 17 حبة والمميز ان العجينة حتى كي باتت في الثلاجة بالحشو بقات مقرمشة وماهيش مندية من الوسط لانو بقاتلي حبات في الغد زدت تقهويت بيهم
ماشاء الله جاوك روعة اكثر من روعةة
بصح لازم نذوق باش نزيد نشكر خخخخخخخخخخخخخ
روعة اختي عمري ما درتهم لكن نجرب وصفتك ان شاء الله
مشاء اله خرجولك روعة
شكرا لكن حبيباتي على الردود الطيبة
اختي وحبيبتي لينا الطبسي كامل ليك كولي حتى تشبعي
اختي صارة جربيهم راح تعجبك النتيجة
ان شاء الله نجربها
شكررررررررررررا ياغلية على الوصفات الرائعة ، انربي يرزقك الذرية الصالحة في القريب العاجل بوركت
حبيباتي جيجي وفايزة شكرا لكن غالياتي على المرور واختي فايزة ربي يتقيل دعواتك
يعطيك الصحة تسلم ايديكي
ربي يعمر حجرك انشاء الله جاوك هايلين يعطيك الصحة
روعة …………………..
ماشاء الله تحفة الله يبارك فيك ويعطيك ماتتمني شكرا جزيلا على الاهتمام والوفاء بالوعد هايلين ويصلحومع المناسبات ربي يفرحك
يعطيك الصحة
ما شاء الله يعطيك الصحة وربي يرزقك الذرية الصالحة ويرزقني