سلام الله عليكم يا اوفياء منتدانا الغالي …
حبيت نطرح عليكم مشكلة شخصية وعلبالي بلي كاين اعضاء رايحين يقولولي باش نطرح المشكل خارج المنتدى كيما سبق وقالولي مي الله غالب فالمنتدى يقدر الواحد ينفس على روحو بلا ميحشم ولا يخاف وانا من طبعي منحكيش مشاكلي لغير الله بصح استصعب علي الأمر وحبيت نشاوركم ربي ينوركم …
عندي قريب عامين ملي راني مخطوبة والحمد لله ربي رزقني زوج صالح وتقي وعفيف يخاف ربي وبما انو من عائلة بسيطة ومتخرج من الجامعة ومزال ملقاش خدمتو راكم تعرفو مشاكل المتخرجين المهم هو مشي راقد ولا فنيان الحمد لله يخدم ماصو و يخدم كونطرا فالسيبار …قلت نساعدو وتفقت معاه يدفعلي 10ملايين فيها كلشي يعني ميزيدليش دهب وراني خايفة اهلي ميقبلوش لأنو من عاداتنا يدفعو 15 مليون ولا 10 ومعاها دهب …راني نخمم كل يوم في هاد المشكل هو من جهة معندوش منين يزيدلي واهلي من جهة رايحين يقولولي علاش نتي واش خصك اهلي ونعرفهم والله معرفت واش نعمل….تحيرت في هاد الدنيا والله غير حبيت نسهل طريق لحلال باش ربي يبارك لنا في حياتنا مي راني خايفة من ردة الفعل …انا مكنتش متوقعة اهلي يخممو فالمادة مي على حساب هدرتهم فهمت بلي مديرينش حساب يدفعلي 10 برك …قولولي واش ندير الله يخليكم
الله المستعان اختي ……….والله ولات تكاليف العرس والخطبة تخلي الواحد يحسبلها الف حساب واغلب الاولياء اصبحو يطلبو المادة بعدة حجج واغلبها واهية ………………….والله المستعان……………اللهم يسر لنا امرنا ولا تجعلنا من القانطين
السلام عليكم اختي
أولا ربي يبارك في اخلاقك وبنت الحلال هذي هي لازم تحوس على الهنا والسعادة ماشي على المال والمشكل ما راهش في خطيبك هو ربي يرزقو راه يدير اللي عليه الله غالب ما عندوش وبلادنا هذي هي
المهم إنت احكي مع يماك قوليلها ما عندوش وحاول معاها الام حنينة واكيد راخا تتفهمك وممكن نعرض عليك عرض علرقة ننمت اقولي هذي خيانة او كذبة مي ربي عالم بالنية تفاهمي إنت وخطيبك يجيبلك عقد او حتى عقد كامل بكل مستلوماتو ماشي ذهب راهم يتباعو يبانو ذهب صح ماكانش اللي يعرفهم بندلهم 10 ويجيبلك قدامهم الذهب ماراهيش خيانة او كذبة عادي ربي عال بنيتكم إنت لازم تعاونيه وفي نفس الوقت ترضي داركم يبقى مجرد رأي لأانو لو أنا نديرها اكيد شكرا ربي يوفقك
شكراا ليكم والله يا اختي مريم الصابرة اولا واش راكي ربي يشافيك ان شاء الله ثانيا نقولك والله غير خممت فالحل لي قلتيلي مي خفت نبني حياتي على غش انا راني حابة طريقة باش نقنعهم ونزيد نقولك حاجة بلي يما وبابا راهم راضيين 100/100 ب 10 ملايين مي الاهل لخرين علابالي رايحين يخربو في عقل بابا ويما لأنو كلشي عندهم مادي …ربي يستر وخلاص علبالي رايحين تقولولي راش دخل اهلك لخرين مدام يما وبابا قابلين مي الله غالب انا تربيت عند جداتي وبين خالاتي وقراب لقلبي بزاف ورايهم يهم يما بالدرجة الاولى على هكدا راني خايفة يما تبدا تقول راهم ستحقرو ببنتي وتدي نظرة مشي مليحة على خطيبي من بعد
السلام عليكم…
ربي يسهلك كل الأمور بإذنه سُبحانه
و مادُمتِ تسعين لإرضاء الله و إبتغاء حلاله
فهو وحده …جلّ في عُلاه .. كفيل بأن يُرضي عنكِ النّاس
دومي على قناعتك و لَا تتركي أي قرار سلبي يُؤثر عليك
فأنت تريدين الأخلاق و الدّين و الثّبات و الأصل الطّيب
و هذا ما على الجميع إدراكهـ …
جمع الله بينكما في خير و رزقكما من حيث لا تحتسبان
شوفي اختي
الاخت مريم اعطاتك فكرةرُبما تُعتبر محل اخير تقومين به
ولكن اعتقد انهافكرة غير مقبولة بما ان فيها كذب و تدليس و لو بنية سليمة
فالنية السليمة لا تُصلح العمل الفاسد
ودائما أقول
دع ما يُريبك إلى ما لايُريبُك
=============================
انا من رأيي انك تتكلمي مع امك وابيك على انفراد
وتفهّميهم
إذا قبلوا تبارك الله
إذا رفضوا
يعني هذا باب غُلق في وجهك
وربي ما يغلق باب………….. حتى يفتح عشرة
فهمتيني اختي؟؟؟؟
ربي وعدنا بتيسير الامور لطالب العلم و طالب العفاف (الزواج)
ادعِ ربي يسهلها……………………. تسهال
مبروك عليكم
الله يهنيكم
اختي علاه 15 مليون يا بنت عمي بزاف مسكين منين يجيب
اهدري مع والديك وفهميهم
15 مليون هادي ندير بها عرس و تشيطلي
أنا عن رأي وكآخر حل أنك تبعثيلو دراهم باش يزيدها على المهر بدون علم أهلك
وربي يجيب الخير
نقول لك صارحي والدتك
و اشرحي لها حالة خطيبك المادية
مع التوضيح لها بأنّك تحبينه
لأجل أخلاقه الكريمة التي أصبحت نادرة في أيامنا هذه
و بالتكرار و الاصرار مع أمّك ستتفهم الامر ان شاء الله
و تساعدك .
أنت فقط أقنعي أمّك و هي تقوم بالباقي
والله ولي التوفيق
يكفي أنك قلت : والحمد لله ربي رزقني زوج صالح وتقي وعفيف يخاف ربي وبما انو من عائلة بسيطة
+ أنه يسعى للعمل تبارك الله
عليك أختي بالدعاء و التوكل على الله و سييسر أمورك فقط عليك بالصبر و إن شاء الله يكون من نصيبك ، كما عليك بالتكلم مع أهلك أيضا
(جمع الله بينكما في خير و رزقكما من حيث لا تحتسبان )
و ربي يسهل للجميع لأن الشروط راهي تعجز الشباب ؟؟؟؟؟؟ ، أتمنى أن تتساهل الفتاة و الأهل قليلا
* قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره
*وقال ايضا:"أيسرهن مهرا أكثرهن بركة".
ربي يبارك فيكم ويعطيكم ما تتمنو على تجاوبكم مع موضوعي والله عدنا في عصر تطغى فيه الماديات على كلشي حتى على الاخلاق وادعو لي لأني حكيت مع يما وراهي جد متفهمة وغدوة بإدن الله راهم جايين يجيبولي الدراهم ربي يسهل علينا وعليكم كامل ….
فرحت كي لقيت في المنتدى ناس تخمم كيما انا في هاد الوقت لي راه يخوف
بزاف 10 ملاين
انا مرتي تطلب فوق 5 ملاين مانزوجهاش
ربي يسهلك نشالله ويعطيك قد نيتك