السلام عليكم اخواتي الفاضلات فكرت في فكرة انشاء الله تعجبكم و نتمنى وكان تشاركوني فيها انا بنتي هذا العام اسانكيام انشاء الله ناجحة و حابة كل ام تقولي اذا عندها افكار كيفاش كل و حدة تفرح و ليداتها و عايلتها و جيرانها هذاك النهار
و كل وحدة تقولنا واش ناوية ادير انشاء الله هكذا نتبادلو الافكار و انديرو حاجة بريزونطابل و تفرح انا عن نفسي قلت انشاء الله اندير الطمينة و هذيك اليلة اندير عشاء و بعدها بنهارين اندير حفلة الحباب واش رايكم progeram مليح و الال عندكم نصائح و افكار نتمنى تشاركوني بيه و ياريت كل و حدة تقولنا و ربي ادوم الافراح على جميع العائلات المسلمة و افرح كل التلاميذ يا رب انا في انمتظار ردودكم ماتبخلوش علينا بافكاركم
ماعجبتكمش الفكرة على ما اضن !!!!!!!!!!!!!!!!!!!!!!!!!!!!!!!!!!!!!!!!
ربي يفرحكم كامل بأولادكم و بناتكم
الفكرة مليحة بزززززاف
كنت حابة نشارك معاك مي معندناش في دارنا ليعغب السانكيام
ربي يوفق ولادكم
الفكرة رائعة وربي يفرح الجميع،وأنا بدوري أوجه دعوة للجميع للتفاعل،أنا أفضل حفلة للأطفال،وقهوة أو عشاء للمقربين الي يكونوا معاك يوم ظهور النتائج.
عن نفسي وجدت امور الطمينة او الرفيس التونسي مثل ما نقولولو بمجرد ظهور النتيجة راح نزغرد ونروح نخلط الرفيس سخون ونوزع على الجيران والاحباب ونخلي وليدي هو الي يديلهم بنفسو حتى يسمع التبوريكات بوذنو ويفتاخر بنفسو
بما انو رمضان على الابواب حبيت اني نعمل عرضة ليوم واحد نجمع فيه كامل الي يحبو يباركو هكذا نقص التعب عليا لانو ما عنديش الي يعاوني
وجدت الرفيس الزيراوي نحطو الاول مع اللبن ثم بعد مدة نحط عصير الليمون بالنعناع المصنوع بالبيت مع قاطو اسبانيول تاع فلة وقاطو الاساور بعجينة الفيلو محشي بالكرام شونتيي في النص مع قاطو بارد ما يطيبش
ثم بعد مدة نحط القهوة مع باقي القاطوات وهي قاطو صابلي بالبرتقال للاخت فايزة جاني هبال طعمتو وكاستال وغريبية الحمص ومقروض بشكل وردة
فكرة العشاء عندي مستبعدة لاني بعيدة على اهلي واهل زوجي كل ما في الامر جيران وحباب تعرفت عليهم هنا في الغربة نمشيو لبعضانا غير على قهوة او عرضة خفيفة
وبعد يوم او يومين نعملو حفلة لصحابو هو وجيرانو ونحط كل الي ذكرتو وفي الاخير نزيدلو تارت يقصها مع صحابو
معضم القاطوات خلاص طيبتهم والرفيس الزيراوي وجدتو ونقيت الغرس للطمينة وصنعت العصير وحطيتو في المجمد الا قاطو اسبانيول نخليه للاسبوع الجاي حتى يبقى جديد كذلك القاطو البارد
والان نحوس على طريقة جديدة لطي المناديل والديكور وووووووو
ومن السبت نبدى نقي البيت ونفرش فراشات المناسبات
هذا واش تفكرت واذا كاين افكار جديدة ماذابيا نتعلمها لانها اول فرحة نجاح عندي وحبيت نشجعو هو و خاوتو بهذه الطريقة هكذا حتى يخدمو مليح في الامتحانات القادمة ان شاء الله
الله ينجح كامل المومنين وينجح وليدي بامتياز كعادتو وما يشوكيوناش بطريقة التصحيح
ربي ينجح اولادكم وكامل اولاد المسلمين
العام الي فات نجح ابني البكر السانكيام وكونت وجدت القاطو والزيراوي الي نعيطولو احنا الرفيس
ولما بانو النتائج النهار الاول درت غداء لاهلي واهل زوجي وفي المساء درت قهوة وعرضت كامل لحباب
درت البغرير مع القازوز وزدت الرفيس مع الرايب وممبعد درت الحليب مع ال حلويات وختمناها بفاكية متنوعة
الله الله عليكم يا بنات بلادي ربي ادوم الفرحة على الجميع يا رب
الله يدوم الافراح في بيوتكم
السلام عليكم
ماشاء الله عليك ام ظافر غيرتيني وحمستيني
ربي يفرحنا كامل
انا مادرت والو حتى نتهنى على النتيجة
بنتي حابة تجيب اكبر معدلربي ينوللها لي في بالها
والاحتفال ساهل
ناوية على غداء للعايلة والمقربين وحفلة قهوةوقاطو ورفيس للجيران والاحباب
ربي يفرحنا باولادنا ويشرفونا بنتائج مليحة كما عودونا
الله يبارك حمستونا مشكورين ويكتا تطلع النتائج
السلام عليكم عندي ابني اجتاز امتحان شهادة التعليم الابتدائي ولكن فكرة الاحتفال مستبعدة حتى ان الناس اصبحت لاتهتم حتى كلمة مبروك مستبعدة تماما ان تسمعها كل ماانوي فعله هو هدية لابني
النتائج يوم 14 جوان ان شاء الله
ام كوثر راكي فحلة ما يتخافش عليك….القاطو يومين وانتي كملتي ان شاء الله ولكن الرفيس يشد شوي اليد ماذابيك توجديه الان تنحيه من الطريق وانتي ست العارفين
يبدو انو بنتك مثل ولدي ينتاظرو في نتيجة الشهادة بفارغ الصبر ويحبو مثل العادة يكونو الاوائل على المدرسة ولكن طريقة التصحيح تختالف من مدرس لاخر وعليه فهمت ولدي اني راضية باي نتيجة لاني نعرف مستواه مليح والاهم نتائج المتوسط وهكذا حتى ما يخيبش املو لو ما كانش الاول لا قدر الله وما يتاثرش بزاف
الله يفرح وليداتنا وينولهم الي في بالهم
ا
|
المشاركة الأصلية كتبت بواسطة habiba1974
 السلام عليكم عندي ابني اجتاز امتحان شهادة التعليم الابتدائي ولكن فكرة الاحتفال مستبعدة حتى ان الناس اصبحت لاتهتم حتى كلمة مبروك مستبعدة تماما ان تسمعها كل ماانوي فعله هو هدية لابني
|
المهم افرحي انتي وباباه وخاوتو وفرحوه وحسسوه بانو نجح في عتبة هي الاولى ليه وما تخليهاش تفوت هكذاك
النتائج يوم 14جوان2015،ربي يفرح الجميع.
[[ربي ينجح كامل وليدات الامة الامة الاسلامية و يفرح والديهم بيهم