مساء الخير عليكم ، راني جبتلكم وصفة ساهلة ماهلة وأحلى حاجة فيها انو ماكانش اللي حطتها قبلي في المنتدى واااااااي 
البيتزا كالزوني Kalzone ننطقوها بالإيطالية كالزوني راهي مشهورة في العالم بأسره حبيت نعرفكم بيها 
.
نحتاجو :
* عجينة بيتزا عادية ، كل وحدة تستعمل عجينتها اللي مالفة بيها وترتاح معاها ، تخمرها مرتين وتستخدمها( باش تحضروها نفسيا وماتخلعش 
) ، أما اللي تحب تستعمل عجينة العشر دقائق طبعا تقدر تستعملها مباشرة .
الأخوات اللي طلبو مني وصفة عجينة البيتزا ، راهي في هذا الرابط : https://www.djelfa.info/vb/showthread.php?t=1734788
* صلصة طماطم كيما اللي نديرو في البيتزا .
* الحشو كيما تحبو : ممكن شرائح زيتون أخضر، جبن أبيض ، بيض ، جبن مبشور ، جبن موزاريلا ، شرائح فلفل أخضر ، معدنوس مقطع ، فطر مقلي في شوية زبدة ، لحم مفروم ، تونة …………..الخ . كل واحد وذوقو ، كيما ديرو للبيتزا العادية.
التحضير :
1- نقسم العجين ( أنا درت 450غ فرينة ) على 6 أو 8 إذا تحبي تصغري الحبات شوية مع العلم أن البيتزا كالزوني جي الحبة نتاعها كبيرة . نشكل كويرات ونخلي العجين يريح حوالي 10د .
2- نرش الطاولة بالفرينة ونبدا نحل بالحلال القرصة الأولى ( حاولو ترققوها لأننا سوف نثني العجين على 2 ) ونحط فوقها حوالي 2-3 ملاعق من صلصة الطماطم وحاولو ماتقربوش من الحافة باش ماتخرجش الصلصة
3- نحط الحشو كما في الصورة :
4- نعمل حفرة في وسط الحشو ونحط فيها صفار بيضة والبياض وزعوه فوق الحشو من جهة النص ماتخليوهش يسيل من جهة الحافة باش مايخرجش
سامحوني على رداءة الصور ، نخدم ونصور ويديا خامجين بالبيض .
5- نغلق البيتزا كالزوني ونطوي الأطراف جيدا باش ماتتحلش ونثقبها 2 أو 3 ثقوب .
6- ندخلها إلى فرن مسخن مسبقا على درجة حرارة متوسطة 200° ، راهي طيب بسرعة ( الصينية مدهونة بالزيت )
7- كي طيب من تحت حمروها من فوق .
8- خليوها في الصينية تبرد حوالي 10د رايحة طير بسهولة من الصينية كيما تقولها ماما تعرق خخخخ
هاهي كي طابت وخرجت الصينية من الفرن :
شوفو البيض من داخل كي طاب وقطعتها على 2 لان الحبة كبيرة :
وهنا بدون بيض مع اجبان ولحم مفروم ممممممممممممممممممم
راهي خفيفة ولذيذة وتغيير شوية في شكل البيتزا 
*ملاحظات
-أنا حطيت فوقها حبة زيتون ، هي مايجيش فوقها زيتون أسود كيما البيتزا العادية لكن عائلتي تفرح بالزيتونة هاذيك هههه
– هاذي البيتزا مايدهنوهاش راهي تحمار بدون دهن
– ممكن متحطوش فيها بيض هذا حسب الرغبة طبعا.
– إذا ماحطيتوش فيها بيض ، ممكن نصف الدائرة اللي ماحطيتوش فوقو الحشو تشرحوه ( تعملو فيه خطوط بالسكين ) وتغلقو البيتزا ، كي طيب وتنتفخ يجي شكل جميل .
ياعمري عليا ، خمسة وخموس واش هذا ، مالقيت مانقول خخخخخخخخخخخخ
أرجو أن تنال إعجابكن ، قبلاتي 
راين نجري باه نكون انا اول رد باه ندي حقي مكرة فيك ههههههههههه يعطيك الصحة ممممممممم سخفتيني
أنا لولا ياي ياي ياي ياي يعطيك الصحة يالفحلة خليلي شوي عمبالي تلحسي الصحن ماتخلي والو
راكي شهتيني أختي
بارك الله فيك
|
المشاركة الأصلية كتبت بواسطة mitrochka
 راكي شهتيني أختي
بارك الله فيك |
يا ام محمد غير متقربي راني سبقت هي هي
و حجزت عليهم الكل حتى لالهام منيش مخليتلها
|
المشاركة الأصلية كتبت بواسطة اميرة في دنيا حقيرة
يا ام محمد غير متقربي راني سبقت هي هي
و حجزت عليهم الكل حتى لالهام منيش مخليتلها |
بارك الله فيك
و الله غير ضحكتيني أختي
ربي يخليك
يعيطيك الصحة تبان هايلة وبنينة
|
المشاركة الأصلية كتبت بواسطة mitrochka
بارك الله فيك
و الله غير ضحكتيني أختي ربي يخليك
|
ربي يخليك حنونتي و ربي يدوم ضحكتك يا لحبيبة
Ya3tik saha bn idee
الله الله على الحرة
وصفاتك هايلة راني ديرتلك ملف خاااص بزصفااااتك
إلهام حبيبتي عيشك راني غير نستنى وقتاش تحطيلنا وصفة الخبز الرائعة اللي قلت عليها
حطيهالنا الله يعيشك باه نحربوهاا لرمضان
اووووووو يا لالة يعطيك الصحة
يعطيك الصحة إلهام باينة بنينة
اممممممممممممممممم يا لهومتي روعة روعة رايحة نديرها للعشاء دايما تخرجي فيا الاكلات وتعاقبيني ونروح نطبق
خسارة انا ديما روطارااااااااار معاهم لازمني نشد الهمة شوي هههههههه
راهي تشهي بلاك نديرها ذرك للعشا وما نباتش بسخفتي