* طريقة صنع شخشوخة الظفر من اسهل مايكون راح نوريلكم الخطوات ان شاء الله وتجربوها وخااااصة للاخوات لي طلبوها مني ونتمنى تستفيدوا كامل من هذا الموضوع ، بدون اطالة
بسم الله نبدأ بمكونات العجينة :
(( كيلو سميد رطب من النوع الممتاز ))
(( بيضة كاملة تكون كبيرة ))
(( ملح حسب الحاجة ))
(( ماء ماشي سخون بارد عادي نلم بيه العجين ))
انا درت كمية قليلة لذلك مادرتش البيضة كاملة
نحط الملح اولا
نخفق البيض شوي بالشوكة ونحطو للسميد
ونخلط مليح البيض والسميد ونحك باليد
ونبدا نضيف الماء غير بالشوي ملازمش يكون العجين متخوم نضيف كمية ماء ونلم العجين ويكون كيما في الصورة عجينة طرية
بعد مانلم العجينة نعجنها ملييييييح كيما المطلوع عادي من دون اضافة الماء عليها
حتى ترجع ملساء ومعجونة ملييح نكورها ونقسمها الى كوريات صغيرة كيما نتاع المحاجب ونغطيها بكيس بلاستيكي نظيف ونخليها ترتاح ســااااااااااااعــــــــــة كاملة
بعد ساعة نبدا نحضر اول حاجة نحط الطاجين على النار متوسطة يسخن
والمكينة نتاع هاذ المعجنات اذا ماعندكش ماااااكانش مشكل ديري بالحلال تجيك نفس النتيجة
نجيب اول كويرة من العجينة ونحضر شوي فرينة ، فرينة ماشي نشا نرش على العجين شوي فرينة
* الخطوة الاولى : نعدل رقم المكينة في 1 ونفوت العجينة عليها ونرش شوي فرينة ونحط العجينة لي حليناها راح تكون شكل شريط عريض
الخطوة الثانية : نعدل المكينة في رقم 3 نزيد نفوت العجينة ونرش الفرينة ونحطها راح تجي شوي طويلة نقسمها بالسكين على اثنين
الخطوة الثالثة : نعدل المكينة في رقم 5 واذا تحبيها خشنة شوي عدليها في رقم 4 كيف كيف ونثقبها بالشوكة
ونحطها طيب راح تتفخ في بعض الاماكن وتحمر شوي برك تقلبها تزيد طيب غير شوي من الجهة الثانية انزعيها شوفوا في الصور كيفاش طايبة مانخليها حتى تتحمر كامل تكون بيضة وماتيبسش في الطاجين
نرفعها على الطاجين مباشرة نحطها في كيس ونغلق عليها وهكذا حتى نكمل الكمية لي عندنا كامل لازم يكونوا في الكيس
الان باش نكسب الوقت وتكون خدمتنا سهلة ومنظمة وسريعة
نخرج من الكيس طرف راح يكون لين من الحرارة لي يحتفظ بها الكيس ونستعمل الجهة لي تقطع شرائط متوسطة كيما في الصورة
نفوت على المكينة راح تقطع لنا هاذ الشرائط ونسرع نردهم في الكيس ونغلق ونكمل الباقي بنفس الطريقة
ملاحظة : اذا مايكونش عندك الوقت تقدري تحتافظي بهاذ الاشرطة نتاع الشخشوخة في الكيس مغلق وتحطيهم في الكونجيلاتوغ حتى كي تتفرغي من الشغل وتجبدي الكيس تخليها يدفى شوي وتخرجي بالشوي تفتتي مايفسدوش
فتتي الان الطريقة معروفة لتفتات شخشوخة الظفر فقط نقولكم كي تكونوا تفتتوا راح يطيح هذاك الفتافيت لي كانت حمراء
الفتافيت ملازمش نخليها نحيوها على جنب
هاهي شخشوخة الظفر جااااااااااااهزة مفتتة
الخطوة الاخيرة نخليوها تشيح فوق UN DRAP أو UN PLAT حتى ترجع يابسة ونحتف بيها في علب بعيدة عن الحرارة
نعطيلكم طريقة اخرى تقدري تقطعيها بالسكين لان كاين ناس ماياكلوهاش لسبب تسميتها
تقطعيها صغييييرة كيما هكذا
هذا موضوعي لكم نتمنى نكون عند حسن ظنكم وافدتكم
تحياتي لكم 
444444444يعطيك الصحة
فحلة الله يبارك هذي عندنا خرجت يسموها شخشوخة تاع الموس بصح انا الصراحة نحب تاعنا تأع السيار خييير
يعطيك الصحة روعة
بارك الله فيكم يسلمو على الردود
بارك الله فيك
يسلموووووووووو ايديك
مممممممممم لايدي لحبيبة انا نموت عليها مي جامي خدمتها يا اما نخدمها عند مرا بالدراهم وساعات نشريها
انشاء الله نجربها تبان ساهلة
شكرا لايدي حبيبتي يالفحلة والله يعطيك الصحة
مشكورة يا الشاطرة ماخليتي والو هههههه ربي يحفضك من العين ماشاء الله
شكرا لايدي على الموضوع القيم هي نفس طريقتنا بصح حنا ما نديروش البيض و نطيبوها في طجين الفطير
يعطيك الصحة44444444444444
اللله يعطيك ما تتمناي يا الغالية راهي تبان ساهلة و الله سهلتي علينا كل صعب ربي يسهلك طريقك و ينورك حنونة
شكرا هي نفس طريقتنا بصح حنا ما نديروش البيض و نطيبوها في طجين الفطير
لايدي نقدر نديرها في تاجين نتاع لحديد
شكرا على الطريقة والشرح بصح كيفاش نعاودوها والمرقة تاعها كيفاش تكون