الفطور اللي درتو البارح 2024.

السلام عليكم احبتي واش راكم؟

البارح كانت دالتي في الكوزينة وكنت حيرة واش ندير فيها سورتو كي عاد بابا صايم وبابا صراتلو كي صايم رمضان واش حوالو ههههههه
مالا درت
مطلوع
محطيتش الطريقة بالتفصيل لانو الاخوات وفاو وكفاو في الشرح
هاهو:

انا طريقتي في تحضير المطلوع هي:
كمية مناسبة من الدقيق الممتاز "هنا على حساب عدد افراد الاسرة انا بصراحة منعبرش عيني ميزاني احم احم ههههه
مع هذا الدقيق نحط ملعقة صغيرة سكر وملعقة خميرة الخبز وملح حسب كمية السميد
ونحرك المواد الناشفة جيدا ثم نزيد فنجان زيت انا ندير هاد الكمية تاع الزيت في ربع قرص مطلوع
من بعد نعجن بالماء الدافئ جيدا كل مرة نزيدو الماء وندخلوه مليح في العجين من بعد نزيد حتى نتحصل على القوام المطلوب وكل ما تدلكيه جيدا يعطيك نتيجة احسن انا ندلكو حوالي نصف ساعة من بعد نحللوه انا نحللو فقط بيدي رقيق نوعا ما ثم نخليه حتى يخمر انا بقالي بين ربع ساعة ونصف ساعة هنا على حساب حراة المطبخ ثم نطيبوه في طاجين الطين يجي احسن من الطاجين تاع الحديد
وهاهي النتيجة
مطلوع خفيف وبنين وبدون لباب وتاكلي منو متشبعيش ههههه "زعمة"

هنا كي قسمتو

هنا من الداخل

شوفو مثقوب ومفيهش لباب اممممممممم

ملاحضة: انا في رمضان نزيدلو السانوج في العجينة يمدلو بنة رمضان
مع هد المطلوع درت تاني شربة فريك مكانش رمضان في برج بوعريريج بلا فريك المهم رغم انني منحبهاش بزاف خاصة كي يكون الحال سخون يادرى كيفاش رايح يفوت علينا رمضان هذا
هاهي:

طريقتي في تحضيرها كالتالي:
اولا نشرو اللحم المخصص للشربة من عند البوشري نغسلوه مليح وزتدلو طرف جاج الفخض
حطيتهم في طنجرة تاع الطين مع حبة بصل متوسطة مفرومة وربع فصوص ثوم مفرومة تانيك وزوج وريقات رند وقرن فلفل حار وحبة طماطم مرابية ونديرو شوية زيت وملح ونخلوهم يتقلاو مليـــــــــــح من بعد نزيدولهم حبة بطاطا وزرودية وجريوات صغيرة وعود قرفة وربطة صغيرة تاع اعشاب عطرية فيها دبشة معدنوس وكرافس ونزيدو الحمص طايب نصف طياب او اذا شرينا الحمص المعلب نخلوه حتى لمن بعد ثم نزيدو الماء لكن يكون مغلي مسبقا ونزيدو الفلفل الاحمر مرحي وكسبر وثوم مرحي ونخلوها تطيب
لما تطيب نجبدو الزرودية والبطاطا والجريوات ونرحوهم في مطحنة الخضر ونحو الاعشاب العطرية ونزيدو الفريك مغسول جيدا انا ندير نصف كاس او فنجال معمر ونخلوها تزيد طيب حوالي نصف ساعة من بعد نفتو الدجاج ونرشو التوابل مخلطة وشوية دبشة وبصحتكم

مع هذا درت سلطة منوعة فيها:
البصل
البطاطا
الزرودية
الخيار
الطماطم
الخس
والصلصلة فيها ثلاث ملاعق زيت و6 خل وشوية ملح
والديكور كل وحدة وذوقها انا جاني في بالي هكذا هههه


من الجهة الاخرى

وايضا درت جواز بذنجان بالبطاطا
هذا من بعد نديرو في موضوع مستقل
هاهي النتيجة

ولكن الحالة هادي حتى لهنا راهي عادي لكن ماشي لوقت طويل
لبارح لقيت في الثلاجة تاعنا علبة فرماج امير وهو جبن طازج مفيهش الما ومهوش مالح ووحدة فينا ما حبت تاكلو ههههههه
ملا اهــــــــــــــــــــا
قلت ندير بيه تشيز كيك لكن الكمية تاعو كانت غير كافية علبة واحدة تاع 150 غ واقيل مشفيتش ههههههه
ملا قررت نخترع كاش حاجة
في الحق جات روعة وهي كيكة باردة وهشة اممممممم روعة بلا ما نشهيكم كثر رايحة نديرها في وصفة مستقلة لاحقا لانو قانون المنتدى لا يسمح بوضع موضوعين في نفس القسم في نفس اليوم
بصح نوريلكم النتيجة برك هاهي

وهدا من فوق:

وهاذي اللقمة من يدي لـ: meharga

وهادي ليكم متزعفوش ….واش رايكم؟

نلتقي في موضوع آخر اختراعاتي للكيكة الباردة والهشة
وفي موضوع جواز البذنجان بالبطاطا
الى ذالك الوقت اترككم تتمتعو بهاد الوجبة واللي خصها شويا ملح تقولي راني هنا

باي

هادا هو الرابط تاع الحلوى

https://www.djelfa.info/vb/showthread.php?t=1333956