مشكلتي مع الجاري 2024.

ارجو من ذوي الخبرة مساعدتي بنصيحة و بخبرتهم خصوصا ناس الشرق
عندي مشكلة في الجاري او الشربة فريك انا نحاول نقلي البصل و الحشيش مليح بصح دائما يبقى ميدوبش
كيطيب و نطفي عليه يبقى البصل و لحشيش كما راح و ك نأكل الجاري عند الناس مانشوف لا بصل ولاحشيش
علاه انا ميحبش يروح وين المشكلة ؟؟؟؟؟؟؟؟
اتمنى تكونو فهمتو وتجاوبوني و تعطوني السر اللي مازال انا ماعرفتوش

ارحيهم في الميكسور وقلي ملييييح

نرحيهم في الميكسور ؟؟؟؟ نجربها
شكرا على النصيحة

ختي حنا نصفيو المرقة تاع الجاري لازم يجي صافي يهبل
باه يجيك بنين كتري البصل
انا ندير زوج حبات متوسطين باه مام نصفي يجي خاتر وبنين

أنا نرابي في لاراب أو في الميكسور البصل و الثوم و الطماطم و نحطهم في الكوكوت +طبعا اللحم و الحرور و الفلفل الاسود و الملح و المعدنوس و الدبشة و الزيت و الطماطم تاع الباط و نقلي على نار هادية حتى تتقلى مليح و مبعد نمرق بشوية بماء دافي و نحرك و مبعد نكمل التمراق و نغلق الكوكوت مدة نصف ساعة اكيد حسب اللحم هنا اللحم يكون نصف طياب نصفي المرق نتاعي و إظافة شوية طماطم و شوية ماء تاع الباط إذا ناقصة و نشمخ الفريك بالماء و مبعد نحيه من الماء و كي تغلي المرق نضيفو و نزيد الفلفل الحار و نغلق عليه حتى يكمل اللحم يطيب و يخثار طفي عليه و حطيلها شوية نعناع و دبشة و فلفل الحار و خطي عليه لحال التقديم و شهية طيبة (مدة الطياب حسب اللحم)
و الله راهو يشهي و هذه طريقتي و يعجبهم كامل
إسمحيلي طولت عليك

ارحي البصل مليح فقط
وخليه يتقلى مليح مع اللحم
استعملي الروبو

يعطيك الصحة أم راضية

انا نرحي البصل والدبشة في المكسار
تم نقليهم

كيما قالو لك الأخوات لازم تقلي مليح لبصل زيد الدبشة راني ما نقطعهاش . أنا نعملها ربطة صغيرة ونرميها وكي نحرك نحاول ما نفسدهاش وامبعد نصفي بالصفاية يجي روووعة يبقى لك غير المرق صافي…ربي يوفقك أختي

والله فكرة مليحة تاع نصفيه اول مرة نسمع بيها بصح عجبتني
نعود نصفيه و شكرا ليكم كامل على الاجابة

اقتباس:

المشاركة الأصلية كتبت بواسطة لينا2015 أنا نرابي في لاراب أو في الميكسور البصل و الثوم و الطماطم و نحطهم في الكوكوت +طبعا اللحم و الحرور و الفلفل الاسود و الملح و المعدنوس و الدبشة و الزيت و الطماطم تاع الباط و نقلي على نار هادية حتى تتقلى مليح و مبعد نمرق بشوية بماء دافي و نحرك و مبعد نكمل التمراق و نغلق الكوكوت مدة نصف ساعة اكيد حسب اللحم هنا اللحم يكون نصف طياب نصفي المرق نتاعي و إظافة شوية طماطم و شوية ماء تاع الباط إذا ناقصة و نشمخ الفريك بالماء و مبعد نحيه من الماء و كي تغلي المرق نضيفو و نزيد الفلفل الحار و نغلق عليه حتى يكمل اللحم يطيب و يخثار طفي عليه و حطيلها شوية نعناع و دبشة و فلفل الحار و خطي عليه لحال التقديم و شهية طيبة (مدة الطياب حسب اللحم) و الله راهو يشهي و هذه طريقتي و يعجبهم كامل إسمحيلي طولت عليك

بالعكس اختي شرحك كان مليح و استفدت منه شكرا اختي

حنا نصفيوه علا بيها ميبانش

راني طيبت البارح الجاري ودرت كيما قلتولي رحيت كلشي في الميكسور و في الاخير زدت صفيتو بالصفاية
والحمد لله جا هايل
شكرااااااا بزاف بزاف لكل وحدة ردت

الحمد لله وهذا واجبنا ماش نعاونوا لطلبوا المساعدة و حتى بقليل القليل المهم نقولوا واش نعرفوا

اقتباس:

المشاركة الأصلية كتبت بواسطة manou1 راني طيبت البارح الجاري ودرت كيما قلتولي رحيت كلشي في الميكسور و في الاخير زدت صفيتو بالصفاية والحمد لله جا هايل شكرااااااا بزاف بزاف لكل وحدة ردت

الحمد لله ,هذا واجبنا كي نعرفوا حاجة منبخلوش و لو حتى بالقليل