السلام عليكم
صح رمضانكم و صح فطوركم على بالي انتوما فطرتو في هاد الوقت
ارجو مساعدتي لتحضير صوص لابيري بالمرقاز زوجي راه هبلني بيها و كل ما نديرها يقولي مش كيما الي كليتها في مطعم في دزاير
جزاكم الله خيرا عني و عن زوجي و كل الي راح يستفيد منكم
اليك طريقتي
بعدما يقلى المرقاز ضفي له طماطم حب مرحية و شوية طماطم علب و ثوم وكراوية و توايل و القليل من الماء و هذا كل عينك ميزانك و خليها تتقلى
اساليه على نوعية الصلصة اذا كانت خاثرة و الا جارية حارة و لا لا
في الحقيقة المطاعم عندنا اكلهم ما يعجبنيش كيما تاع الدار يعود طايب مليح و نظيف
قبل كل شئ سمي بسم الله و اقراي الفاتحة و صلي على النبي صل الله عليه و سلم وراح تعجبو باذن الله
صراحة هاذي الصلصة يحبوها اخوتي ياسر نعملو بها كاسكروط فريت
جربي و ردي لي بالخبر انا في الانتظار
ما كانش قد الطعم الاول يبقى ما يتنساش حتى ولو كانت وصفتك احسن (وهذا اكيد) من الي كلاها في المطعم ولكن يبقى ما ينسهاش لذلك هو مهما درتيها راح يقولك ماشي كيما الي كليتها في المطعم
شوفي برك الدوبارة تاع الحمص مهما تنوعي فيها ما تخرجلكش مثل تاع الحمامصي ابدا مهما حاولتي نفس الشيء مع زوجك
والمطعم راهم ما يشقيوش روحهم بزاف لان عندهم لاكونتيتي راهم يقليو المرقاز او يشويوه ويحطوه على لابيري ويصبو عليه لاصوص تاع الروتي (نعم تاع الدجاج محمر روتي ) تجي عاقدة ومالحة وبنينة يحطوها فوق كلش لبيري و الفريت والروز وووووو ما يديو فيها والو لا ثوم ولا معدنوس ولا توابل ولكن يحطو في الدجاج الداخل اوراق الرند يطلق بنة في اللحم وفي الزيت الي تقطر منو الي هي نفسها لاصوص تاع البيري وفعلا تجي بنينة
هذا الي نعرفو اختي في المطاعم الشعبية اما المطاعم 5 نجوم ما نعرفش ماكلتهم وربي يهنينا و يهنيكم
السلام عليكم و صح فطوركم
يعطيكم الصحة اخواتي
راح نجرب لاصوص تاعك غدوة ان شاء الله يا رمضنة و نقولك كيفاش جات واش قال زوجي , هي طريقتك تقريبا كيما نديرها انا برك انا نعمل صوص حمرا او تكون عندي من قبل و نقلي المرقاز و نحطها عليه و نخليها حتى تخثار مع اضافة التوابل طبعا
و انت يا ام ظافر اضن انو عندك الحق بربي ان شاء الله لما نحمر الجاج ندير معاها لابيري و نقليلو المرقاز و ان شاء الله تعجبو رغم انها ما داخلاش في راسي جاجة محمرة و مرقاز مع بعض و الله تبدير بصح واش نقول الترمضين صعيب هاكا نقولو على واحد يغلبو رمضان و لا يرجع يطلب في اي ماكلة تجي في بالو و في الاخير ما ياكل والو في الفطور
المهم ربي يقبل صيامنا و صيام الجميع
و يعطيكم الصحة مرة اخرى