جبتلكم اليوم وصفة تقليدية تاع الجدود من مطبخنا إن شاء الله تعجبكم وربما كاين اللي يعرفوها واللي ما يعرفوهاش إن شاء الله تكون الطريقة واضحة ومفهومة.
المقادير:
2كلغ سميد متوسط
250 غ مرغرين طري
ملح حسب الخليط (يكون في القياس لا مالح ولا سامط )
ماء للعجين
الحليب والزبدة المذوبة وليس المارغرين نحتاجوهم في المرحلة الثانية.
لبن وزبدة ذايبة للتقديم
تحضير المبسس:
نبسوّا السميد مع المارغرين مليح (بلا ما ننساو الملح) حتى نروّوه كيما يظهر في الصورة
نبداو نزيدوا الماء ونعجنوا بلا ما ندلكوه باش ما يديرش اللّباب كي يطيب
، ما نكثروش الماء بزاف باش يسهل تفتيته بعد الطياب (يجي يتفتت وحده).
نلموه على شكل خبزة تكون شوية غليظة حوالي 1سم
ونقطعوها كيما المبسس قطع كبيرة باش نكملوا بسرعة.
نطيبوه في الطاجين فوق النار
حتى يتحمر شوية ويطيب،
نقلعوه و نخلوه يبرد شوية نفتّوه بين يدّينا
ونصَيْروه في البوسيار المتوسط يعني تاع الطعام.
نتحصلوا على مكوّنين اثنين : الدقيق اللي يطيح من التحت
والقطع اللي تبقى من الفوق .
أولا ناخذوا الدقيق هاذاك ونردّوه في الطاجين اللي طيبنا فيه المبسس ونبقاو نخلطوا فيه فوق النار حتى ينشف شوية وبالاكم ينحرق مجرد تحمير خفييييييييييييف.
نوخروه من فوق النار ونديروه في قصعة ونسقوه بالزبدة الذايبة ماشي المرغرين ونخلطوه كيما الطعام ونخلّوه جانبا.
نرجعوا لبقية الوصفة، نديروا الحليب يطيب فوق النار في طاجين ما يلصّقش وكي يغلي نملحوه في القياس
و نزيدوا فيه القطع اللي كانت في الغربال ولازم تكون كمية الحليب كافية ونطبخوه على النار
مع التحريك مرة على مرة
حتى يتشرّب ويصبح الخليط كثيف ولكن ما ينشفش وتصبح القطع طرية تذوب بين الأصابع.
ملاحظة:
الحليب نبداو ب لتر وإذا احتجنا نزيدوا بالشوية على حسب نوعية السميد كاين اللي يشرب بزاف وكاين اللي ما يحتاجش كمية كبيرة.
طريقة التقديم:
نجيبوا صحن فيه جوانب ماشي مسطّح كلّيا ونفرغوا فيه كمية مناسبة من خليط الحليب ونملسوه بالمغرف باش يكون مسطّح
ونفرغوا فوقه كمية من خليط الدقيق مع الزبدة
ونسوّيه كيما راكم تشوفوا في الصورة.
يقدم مع اللبن
ويسقى بالزبدة المذوبة وليس المارغرين حسب الذوق ،
كاين اللي يبغي يزيد قدّامه الزبدة أمّا اللبن يكون في أكواب وناكلوا مغرف رفيس ونشربو شربة لبن.
هذا هو الرفيس تاعنا تجربوه وتاكلوه بالصحة.
تحذير:
مرضى الكوليسترول يستعملوا المارغرين بدون كوليسترول ومرضى الضغط يستغناو عن اللبن وما تكثروش منّه بزاف متفاهمين باش تدعولي ماشي تدعوا عليّ 
أنتظر تعليقاتكم.
ما شاء الله على خفة دمك ههههههههه الضحكة معاك مضمونة ( مرضى الكوليسترول يستعملوا المارغرين بدون كوليسترول ومرضى الضغط يستغناو عن اللبن وما تكثروش منّه بزاف متفاهمين باش تدعولي ماشي تدعوا عليّ )
الوصفة جديدة عليا , لكن تشبه شوية لوصفة تونسية نحطو فيها التمر عند التقديم , ربي يجازيك كل خير تظهر وصفة بنينة.
و ربي يجازيك خير على مجهودك في هذا الموضوع.
|
المشاركة الأصلية كتبت بواسطة أنا أمهم
 ما شاء الله على خفة دمك ههههههههه الضحكة معاك مضمونة )
|
|
المشاركة الأصلية كتبت بواسطة أنا أمهم
الوصفة جديدة عليا , لكن تشبه شوية لوصفة تونسية نحطو فيها التمر عند التقديم , ربي يجازيك كل خير تظهر وصفة بنينة. |
بارك الله فيك يا أختي العزيزة نورتيني، هاذي وصفة تقليدية تاعنا تعتبر وجبة غذائية وكاين الرفيس الآخر تاع القهوة كاين مواضيع عنه في المنتدى.
البنة تاعوا لذيذة بصح اللي يكثر الزبدة راه يدوخ 
الله يتقبل منك ويجعل كل مجهوداتك في ميزان حسناتك، وما ننساش الدعاء للوالدين الكريمين ربي يباركلهم في عمرهم ويرزقهم حجة وعمرة مقبولتين اللهم آمين.
[b][/bيعطيك الصحة اختي وصفة تشهي .مليحة فيالايام الباردة راهي تعطي طاقة كبيرة.]
واووووووو يبان بنين ويشهي حنونة ورغم اني عندي الضغط راح نشرب غير شوي لبن يعطيك الصحة
حبيت نسقسيك من اي منطقة انت باش نعرف هدي الكيفية منين
|
المشاركة الأصلية كتبت بواسطة hanaa zahra
[b][/bيعطيك الصحة اختي وصفة تشهي .مليحة فيالايام الباردة راهي تعطي طاقة كبيرة.]
|
ربي يحفظك أختي أكيد في البرد هاذا ما يليق.
|
المشاركة الأصلية كتبت بواسطة أم ياسين الزهراء
واووووووو يبان بنين ويشهي حنونة ورغم اني عندي الضغط راح نشرب غير شوي لبن يعطيك الصحة
حبيت نسقسيك من اي منطقة انت باش نعرف هدي الكيفية منين |
الله يعطيك صحتك أختي الكريمة أم ياسين راه بنين غير ما تكثريش برك
هاذ غريب عليا شويا البداية كيما تاعنا لكن الحليب ما دخليش في راسي
بصح باين مليح ويجي في الشتاء احسن
شكراااااااالك
|
المشاركة الأصلية كتبت بواسطة الأمنيات
هاذ غريب عليا شويا البداية كيما تاعنا لكن الحليب ما دخليش في راسي
بصح باين مليح ويجي في الشتاء احسن شكراااااااالك |
إن شاء الله تجربيه وتكتشفيه.
يعطيك الصحة على الشرح الوافي
بصح حبيت نصقصيك مايجيش صامت لاته لافيه لاعسل لاغرس
|
المشاركة الأصلية كتبت بواسطة ام دودة
يعطيك الصحة على الشرح الوافي
بصح حبيت نصقصيك مايجيش صامت لاته لافيه لاعسل لاغرس |
هذا يعتبر من الأطباق المالحة ماشي الحلويات لهذا الملح اللي نستعملوه يكفي ومع الزبدة الأصلية تعطيه حلاوة طبيعية لهذا هو وجبة كاملة مع اللبن.
الرفيس الآخر تاع القهوة احنا ثاني نديروه بصح هذا ماكلة.
بارك الله فيك أختي أم دودة
|
المشاركة الأصلية كتبت بواسطة بنت الحاج
هذا يعتبر من الأطباق المالحة ماشي الحلويات لهذا الملح اللي نستعملوه يكفي ومع الزبدة الأصلية تعطيه حلاوة طبيعية لهذا هو وجبة كاملة مع اللبن.
الرفيس الآخر تاع القهوة احنا ثاني نديروه بصح هذا ماكلة. بارك الله فيك أختي أم دودة |
شكراااااااااا على التوضيح
شكرا جزيلا على هذا الرفيس أول مرة نسمع بيه
|
المشاركة الأصلية كتبت بواسطة الصوامعية
شكرا جزيلا على هذا الرفيس أول مرة نسمع بيه
|
هذا الرفيس قريب ينقرض
بقينا نسمعوا غير بالرفيس تاع القهوة.بارك الله فيك على الطلة الرائعة
بارك الله فيك
|
المشاركة الأصلية كتبت بواسطة OU SS AMA
بارك الله فيك
|
وفيك بارك الله أختي أم أسامة ربي يحفظك