السلام عليكم و رحمة الله تعالى و بركاته
مشكلتي هي مشكلة كل الشباب هذه الايام ( الزواج).. ما فهمتش علاش ما حابينش تتزوجو. انا ما عندي ما نحكي على هذا المشكل لان الكل يعرفوه و الاكثرية يعانو منه.الشي اللي حبيت نقول موجه للرجال من 25 سنة فما فوق. في يدكم شهر دبرو راسكم روحو اخطبو البنت اللي تعجبكم و المتربية الخلوقة. ما يهمش اذا راك بطال. ما عندكش دار. ما كملتش قرايتك. من ذوي الاحتياجات الخاصة.خجول. خايف…. و كل هذه الاسباب اللي ما عندهاش معنى. توكل على ربي و خلي الباقي عليه. علاش تحكم على كل البنات يحبو الدراهم و السيارة و ما نعرف واش تاني. انا نقبل بواحد ما عندوش و نعرف بنات يقبلو. البنات يحبو الستر و الراجل الصالح يعيشو على الحلوة و المرة. واش تعرف انت واش كاتبلك ربي سبحانه. يمكن كي تخطب اليوم ربي يفتحلك باب الرزق. و علاش اذا رفضتك وحدة تتعقد و تخاف الثانية ترفضك. ياك كلش بالمكتوب. اذا ترفضت من قبل يجي نهار وين تلقى اللي تستاهلك و تستاهلها بصح تحرك ما تقعدش تتفرج برك. اسمحولي على الكلام لكن انا نشوف باللي جايي نهار يولو الرجال قاعدين في الدار و النساء هم اللي يخطبو فيهم. و راهي تصير في بعض الاحيان. افطن يا اخي و فيق لروحك. راك لا دار لا خدمة و لا عايلة تاني. الزواج نصف الدين علاش تفرطو فيه.. ربي يهديكم و ما تبداوش تحسبولي في الصعوبات اللي تمنعكم. كبرها تكبر صغرها تصغر… كيما قلتلكم في الاول في يدكم شهر تخطبو فيه و اللي نسمع بيه ما خطبش راهو حسابو من بعد. و اللي يخطب يخبرنا باش نفرحو معاه… حابين نفرحو و نشوف اعراس في المنتدى ان شاء الله.
شكرا للمنتدى و بالتوفيق للجميع
نتمنى الموضوع لا يحذف