مشروع محل المواد الغذائية العامة مشروع سهل و بسيط حجمه على حسب الميزانية ابتداءا من 40 مليون بدون ثمن كراء المحل
مستلزمات المشروع
frigo mural ب 12 مليون
frigo persentoire ابتداءا من 3 ملاين
congelateur presentoire pour glace ابتداء من 4 ملاين
من الافضل شراء الثلاجات جديدة
رفوف من الافضل تكون المنيوم و تغطي جدار المحل عل الاقل 2 مليون
كونطوار المنيوم زجاج لعرض بعض السلع مثل الكوسمتيك و غيرها ب 2 مليون
كراء المحل
اعمل حسابك يعني لازم تخرج الكراء كل شهر مالزمش يكون محل بكراء 3 ملايين في الشهر مقابل 20 مليون سلعة فقط لازم يون سعر الكراء مناسب لراس مال السلعة و حجم المشروع و مكان المحل و اتوقع كل ما يكون المشروع كبير يكون مصاريف التسيير كبار (كهرباء عمال صيانة….)
من المستحسن يكون في مكان تجمع سكاني او مقابل الادارات العمومية او المدارس او الاحياء الجامعية او على الطرق العالية الحركة
حذاري تكون كاري بجوار محل له نفس النشاط الا اذا كان مشروعك اكبر من مشروعه
اعداد المحل
المحل لازم يكون مكتمل اشغاله يعني الجدران مسبوغة الارضية متواجدة بالاضافة للاضاءة (تساعد بزاف في الليل لاظهار المحل)
اعمل حساب للماخذ الكهربائية بها ماخذ ارضي بسبب الثلاجات
اشتري فروطوار و مكنسة معطر جو و ماء جافيل
لازم يوميا تنظف المحل تاعك
شراء السلع
لسلعة اقسام** مشروبات – ماء – ياغورت -اجبان – علب و كانيت عصير- حلويات و بار شكلاطة– زبدة — زيوت–مصبرات — بسكويت– عجائن – كسكسي- طماطم مصبرة—سميد و فرينة-كرنطيطة– توابل– مواد تنظيف — صابون — مواد تجميل — مواد الحلويات— سكر— مواد تغليف– مواد صيانة— مساحيق تنظيف– شيبس– خبز — حليب– فاكهة — خضر– بيض
تختلف كمية المشتريات حسب المنطقة اي منطقة امام المدارس او في الطريق العام كثر من الماء العصير المشروبات السكاكير و غيرها من السقايط
لازملك شوية من كل شيء و تقد تزور المحلات باش تعرف واش عندهم سلعة
دير قائمة بها كل المواد و بعد زور محلات الجملة و اطلب منهم الاسعار و قارنها
يوم الشراء روح مع 2 صحابك واكري رونو ماستير اتفاهمو على السعر اولا و روح للمحلات و اشتري السلعة صحابك يعاونوك باش يحسبو معاك كمية السلعة و تاريخ الاستهلاك و يعاونوك باش تهبط السلعة و ترتبها
حذاري من الياغورت و الاجبان لازم تشوف ضروف التخزين
ادارة المحل
لازم تخدم سجل تجاري الكونترول مرة على مرة يزوروك ماهوش حاجة صعيبة تديه في 48 سا اقصى تقدير
اذا تحوس على النجاح الحقيقي لازملك تلتزم بدقة بالمعطيات التالية**
اوقات الافتتاح من 6 صباحا الى 10 ليلا بدون توقف الفطور اتناولو داخل المحل ماتقولش هذا وقت مافيهش زبائن اذا ربحت سنتيم راك في الفايدة
يوم الجمعة تحل مباشرة بعد الجمعة لانه وقت زيارة الضياف يجوزو لعندك باش يشتروا مشربات ……
اذا عييت شوف شكون يشد في بلاستك و لاحقا نعطيك طريقة باش تعس العمال تاعك
دير دفتر دون فيه **
قسم به السلع المتواجدة سعر الوحد و الربح في الوحدة
قسم تسجل فيه يوميا كل مساء شحال بقاتلك سلعة من كل نوع في الحانوت وشحال كان كاين البارح دير الفرق باش تعرف شحال بعت و قارن مع المال في الصندوق(هذه طريقة تحاسب روحك و تحاسب العمال تاعك)
دير خزنة صغيرة في المحل و زيد قسم في الدفتر كل يوم دير شحال حطيت في الخزنة و اذا خرجت دير القيمة و ماذا فعلت بالمال
دير قسم دون فيه املاحظات على المحل سلوك الزبائن و العمال و افكار لحل المشاكل و تطوير المحل
بالنسبة للمنافسة احذر من جيرانك ربما يحاولوا يصابوطيوك ولا يضروك كاين بعض الخاوة ربي يسامحهم مايعرفوش ان الرزق على ربي و ما يعرفوش المنافسة الشرعية لازملك تواجهم بحزم و ذكاء يعني ابدا بالتي هي احسن و اذا كملوا ادي جماعة و روح حاورهم اذا استمروا كاين الشرطة حط شكوى بالتشهير و المنافسة غير الشرعية صدقني راح يدوروا بعدها في رايهم
لازم تعامل الزبائن باحترام و تساعفهم حتى و لكان تكون تصرفاتهم غريبة شوية ولا حتى فظة
الضرائب
روح لمصلحة الضرائب يفهموك واش دير و رح يعطوك ورقة تعمرها اما عند المحاسب ب 6000 دج او تتعلم تعمرها وحدك عن طريق الانترنت "طريقة ملا استمارة g50"
الفترتين الاولتين دير بلي ماخدمت والوا neant و الباقي لا تصرح بكل مداخيلك صرح بلى دخلت 7000 دج
نصائح اخرى
لازملك تعمل حسابك بلي المال لي دخلو السنة الاولى تقتطع منه سعر الكراء و المصاريف و غيرها و الارباح تعاود تستثمرهم في المحل
اصبر على المحل 3 سنوات من بعد تقدر تدي كل الارباح لروحك
الستة اشهر الاولى حساسة اذا شفت بلي مكانش رقم اعمال كبير حوس على الاسباب ربما طريقة في التعامل ربما السلعة قليلة ربما المحل ما يبانش او ميعرفوكش الزبائن …. وحوس على السبب و ماتنساش التجارة صبر و مجاهدة الذات
راني عارف كاين نقائص اذا تفكرت حاجة راني نزيدها و المهم اتكلوا علا ربي و اتخذوا الاسباب او ماذا بيكم تشلركونا افكاركم
سلام
مذا بيكم تناقشوا الافكار و تصحوا الاخطاء بساش نستفادو كامل
بارك الله فيك أخي على هذه النصائح القيمة و جعلها في ميزان حسناتك
من فضلك ما هي اجراءات السجل التجاري فأنا لا افقه شيئا في هذا لأفيد غيري
|
المشاركة الأصلية كتبت بواسطة GOLDENROSE
 من فضلك ما هي اجراءات السجل التجاري فأنا لا افقه شيئا في هذا لأفيد غيري
|
حاجة ساهلة — اولا لازم يكون عندك عقد ملكية او كراء المحل — في حالة الكراء اطلب من الموثق اعطائك نسختين على عقد الكراء
ثانيا اتقدم لغرفة السجل التجاري يعطوق ورقة تملاها و تصادق عليها و يعطوك الوثائق الازمة للملف– ثالثا روح لبنك bna وحول مبلغ 4050 دج الى رقم حسابه (هما يزيد يفهموك) —رابعا اتقدم بالملف الكامل للوكلة السجل التجاري يعطوك السجل في يومه
بعد ذلك اتقدم لمصلحة الضرائب من اجل الحصول على بطاقة ضريبية يعطوك الوثائق الازمة قدمهم و تديها في نهارها
اخيرا casnos للتقاعد اتقدم ليهم يفهموك مليح
نعتذر هذا واش عندي معلومات (نسيت)
ربي يوفق الجميع
المشكل تلقى بين المحل ومحل محل مواد غدائية
؟؟
بين محل مواد غذائية عامة و محل خضر وفواكه ايهما احسن
دير كلاهما في نفس المحا تربح اكثر ………….
شحال ممكن تتوقع الارباح في شهر اخي بالنسبة لمحل صغير 20-40 مليون
في مكان متوسط اقبال الزبائن
بارك الله فيك على هذه المعلومات القيمة …انا عمري 18 سنة اريد فتح محل تجاري لكن في منطقة نائية …وانا متخوف قليلا
وسؤالي اليك ماهي الوثائق الازمة لفتح المحل
ه لممكن تكون قيمة الضريبة اعلى من الدخل
تنت في البداية اشتري السلعة بالجملة كريدي هل ابيع بالكريدي ام لا
|
المشاركة الأصلية كتبت بواسطة مروةنزيهة
بارك الله فيك على هذه المعلومات القيمة …انا عمري 18 سنة اريد فتح محل تجاري لكن في منطقة نائية …وانا متخوف قليلا
وسؤالي اليك ماهي الوثائق الازمة لفتح المحل ه لممكن تكون قيمة الضريبة اعلى من الدخل تنت في البداية اشتري السلعة بالجملة كريدي هل ابيع بالكريدي ام لا |
لا انصحك بالكريدي في البداية لانو انت تغامر براس المال
بارك الله فيك على هذه المبادرة
ربي يحفظك ويرعاك
مشروع محل المواد الغذائية جيد و لكن اذا كان ال توجد محلات قريبة يا اخي
و ايضا لازم تكون الاسعار تنافسية
مشروع مواد غدائية مشروع ممتاز جدا تعرف في بلادنا كاين 3 حوايج ميحبسوش الماكلا بكل انواعها والنقل الطرونسبور والفليكسي