ما هو المبدأ الذي تعملين به في المطبخ 2024.

مرحبا خياتي واش راكم مع رمضان

حبيت نعرف مبدأ كل وحدة فيكم كي تروح تعمل كاش طبخة أو حلوى، هل تلجئين دوما إلى الوصفات المكتوبة عندك أو كل ما تفعلينه موجود برأسك
أما بالنسبة إلي فانا أجد نفسي دوما أبحث عن الوصفة بدقة و المشكلة أني أجد العديد من الوصفات لطبخة معينة فأحتار أي منها أعمل عليها.

من فضلكم أحكولي كيفاش تخدم كل واحدة فيكم وما هي الطريقة التي تعتمد عليها و شكراااااااااااااااااااااااا

والله بالنسبة لي لا ازال مبتدئة نوعا ما ولذا ألتزم بالوصفات المجربة والتي قدمتها لي أمي وقمت بكتابتها وبعد تكرارها اجد نفسي تلقائيا أعدل في بعض العناصر يعني حسب الخبرة، لكن في معظم الاحيان ألتزم بوصفاتي المكتوبة

نعم يا أختي انا أيضا لاحظت أن بعد تكرار الوصفات عدة مرات و بعد التجربة ستتعرفين على أخطائك و تدخلي عليها التحسينات و هكذا ستنجحين في النهاية إنشاء الله.
شكرا لكي على الرد

انا تزوجت وانا مانعرف اي شي يعني قليلة الطبخات اللي نعرفها ومع السفر وطبعا الزواج يجبرك تتعلمي فيه ازواج ما يحملوش المرا ما تعرفش تطيب وليت نجرب ونجرب مرات تخرب مرات تصلح حتى تعلمت بالصح الوصفات الجديدة التزم بالمقادير والطريقة ونعاود كل مرة ونعرف الاخطاء

الطياب تع الأم و الجدة تع كليوم أكتبي وا ش قولولك و طبقي أما عن الوصفات فخودي سواء الكمية المكتوبة في الكتاب أو تعلمي في نص الكمية و الوصفات تع الصديقات أطلبيهم عن الوصفات المجربة و هنا في النمنتدى تبارك الله تعلمنا منو بزاف صوالح مثلا طبخ أم رامي ماشاء الله

أنا أحب الطياب تاع الوالدة الله يحفظها و نتمنى زوجتي تولي طيب كيفها

السلام عليكم
اختي نصحية من خبيرة قديييمة في المطبخ
ادا كنتي مبتدئة ابداي بالوصفات المجربة تاع الوالدة و الي تعرفيهم وبالعقل تولي عندك خبرة في حالة الطوارئ
مثلا كي تجيك الماكلة مالحة ولا العجينة تاع القاطو تجيك يابسة ولا.. تعرفي كيفاش تسgميها وادا راكي قديمة فالدومان نظن الوصفات تاع الكتابات تجيك ساهلة و تقدري تديريها وتنجحي فيها ^^
عن نفسي شعاري في المطبخ "عينك هي ميزانك" وربي يوفقك

اقتباس:

المشاركة الأصلية كتبت بواسطة yildiz السلام عليكم اختي نصحية من خبيرة قديييمة في المطبخ ادا كنتي مبتدئة ابداي بالوصفات المجربة تاع الوالدة و الي تعرفيهم وبالعقل تولي عندك خبرة في حالة الطوارئ مثلا كي تجيك الماكلة مالحة ولا العجينة تاع القاطو تجيك يابسة ولا.. تعرفي كيفاش تسgميها وادا راكي قديمة فالدومان نظن الوصفات تاع الكتابات تجيك ساهلة و تقدري تديريها وتنجحي فيها ^^ عن نفسي شعاري في المطبخ "عينك هي ميزانك" وربي يوفقك

اختي العجينة اليابسة واش الحل معاها

شكرا أخواتي على المرور
أنا لا أستعمل طريقة عينك هي ميزانك، فأنا أتقيد دائما بأخذ المقاييس بالضبط (بإستعمال المعيار يجي على شكل كوب) فأنا لا أستغني عنه أبدا،لأنه هكذا بدأت تعلم الطبخ، ربما مع الوقت و التجربة سوف أتفاداه

اقتباس:

المشاركة الأصلية كتبت بواسطة biti اختي العجينة اليابسة واش الحل معاها

اهلا اختي
على حسب عجينة واش ؟
ادا كانت عجين تاع خبز تزيدي الما غير بالعقل وتجريها
وادا كانت تاع قاطو تزيدي الما والما زهر مع بعض

اقتباس:

المشاركة الأصلية كتبت بواسطة zinna2 شكرا أخواتي على المرور أنا لا أستعمل طريقة عينك هي ميزانك، فأنا أتقيد دائما بأخذ المقاييس بالضبط (بإستعمال المعيار يجي على شكل كوب) فأنا لا أستغني عنه أبدا،لأنه هكذا بدأت تعلم الطبخ، ربما مع الوقت و التجربة سوف أتفاداه

معك حق اختي ماشي دايما عينك توزن مليح هههههههه
مثلا فالقاطوات كاين بعض الانواع يحتاجو كميات محددة و مضبوطة والا تنقلب الوصفة ولن تنجح
اما المواكل وبعض الانواع الاخرى تخضع للاذواق لا للمعايير المحددة
وتاني نسيت نقولك حاجة فالحلوى لازم تشفاي اما نوع الي درتي بيه هديك الحلوة وجاتك مليحة كيما :الفرينة والسميد والزبدة على خاطر كاين فرينة من فرينة يعني كاين الي تشرب الما تديري اقل من الكيلة خلاص تولي مليحة العجينة وكاين الي ما تشربش ديري العبر تاع الوصفة وتزيدي عليه والسميد تانيت كيف كيف
اتمنى لك وقتا ممتعا و تجارب نافعة مسلية في المطبخ
وفقك الله

شوفي اختي الطياب يحتاج الى الدوزين يعني هناك اكلات تعتمد على نوع من التوابل دون غيره هذه مع الاكلات التقليدية اما بخصوص الوصفات العصرية فا عتمد الى المكتوبة خاصة مع الحلويات و الباتيسري فهي ميزان و لوكان منخلطوش منتعلموش و مع الوقت تولي تعرفي الخلل يبقى الطبخ فن لازملو التجربة مرارا

صح لي ما يجربش ما يعرف و لي ما يغلط ما يتعلم
أتمنى التوفيق للجميع، نشاء الله تكونوا جوزتوا كامل رمضان بخير و عيد مبارك لعقوبة للعام لجاي يا رب

صح لي ما يجربش ما يعرف و لي ما يغلط ما يتعلم
أتمنى التوفيق للجميع، نشاء الله تكونوا جوزتوا كامل رمضان بخير و عيد مبارك لعقوبة للعام لجاي يا رب