جربوها وراح تعتمدوها وراح تدعيولي بزاف بزاف انا راح نقدملكم ثلاث طرق وحشوات لعجينة واحدة وانتوما اذا تحو غيرو اتزيين حسب رغبتكم
اولا انا استعملت نفس العجينة في الانواع في 3 اللي هي العجينة الايطالية ومكوناتها هي
في صحن غامق ولا سالاديار حطي 1كاس ونصف حليب دافي انا عملت بكاس لينوكس ومعاه مغرف كبيرة سكر+ملح قيس 4 قرصات صغيرة ولا حسب الرغبة وماتكثروش لان الجبن مالح+ملعقة كبيرة ونصف خميرة الخبز +فوق شوية من ربع كاس زيت يعني ماتوصليش لنصف كاس زيت زيتون ولا زيت عادي ولا مزيج منهم لانو كاين اللي مايحبش ذوق زيت الزيتون كيما اخواتاتي انا عملت زيت عادي لكن الاصلية بزيت الزيتون خلطي الكل مع بعضش وزيدي 2 كيسان فرينة وخلطي مليح بملعقة الخشب مليح مليح حتى تتحل الفرينة مليح وزيدي 1 خميرة الحلوى هادي هي الاضافة اللي من عندي وزيدي الفرينة حتى تتحصلي على عجينة طرية وايلاستيك لميها بيدك حتى تتجانس وادهنيها شوية بالزيت وحطيها في كيس واغلقي عليها حتى تختمر
حضري صوص طوماط وخليها على جنب واللي تحب طريتي نحطهالها
وهاذو مستلزمات الحشو والتزيين
كي تحتمر العجينة نزليها من غير ماتعجنيها وكوريها لاربعة كور
رشي المول نتاع الفرن بالفرينة
شعلي الفرن على اعلى درجة وخليه يسخن مليح مليح
رشي سطح العمل بالسميد
وابداي حلي العجينة باصابعك مليح وخلي الحواف شوية خشينة وادا جاتك صعيبة حليها بالحلال رقيقة المهم كل مرة رشي السميد حتى تجيك عملية الفرد ساهلة
وحطيها في البلاطو المرشوش بالفرينة
التشكيل
اولا pizza napolitaine او بيتزا نابوليتان انا عملتها بثلاث انواع من الجبن شيدار وقرويار وفروماج ايمونتال وممكن تعملي في مكانو جبن موزاريلا
كي تحلي العجينة حطي فوقها كمية من الصوص طوماط من غير ماتوصلي للجوانب
ابرشي كمية مليحة من 3انواع نتاع الجبن وكثري من الشيدار زيدي فوقو كورات من اللحم المفروم وادا ماتحبيش الحوم ديري خضار كيما البروكولي او الفلفل الحلو مقطع شرائح وزيتون حسب الرغبة
ودخليها مباشرة للفرن من غير ماتعمليلها ثقوب بالفرشيطة طيبيها من فوق وتحت ماتاخدش منك وقت ممكن اقل من 5 د حسب نوع الفرن
رشيها بشوية زيت زيتون وقدميها مباشرة
شوفي طيابها من تحت
ثانيا pizza andalouse او بيتزا اندلسية
حلي العجينة بنفس الطريقة وحطي فوقها الصوص طوماط وابرشي كمية من كبيرة من جبن شيدار وشوية قرويار وحطي فوقها قطع من الشامبينيو او الفطر وشرائح زيتون اخضر ودخليها لفرن ساخن مباشرة حتى تطيب من فوق وتحت في نفس الوقت وعند التقديم رشيها بزيت الزيتون وقدميها مباشرة وهي سخونة
ثالثا pizza4saisons او بيتزا الاربعة فصول 
وهادي ذوقها رهيب وانا نموت عليها
حلي العجينة بنفس الطريقة وديري فوقها كمية من الصوص طوماط وابرشي كمية مليحة من الشيدار والقرويار ولا اي جبن تحبيه
وديري خطوط وهمية بالسكين يعني ماتلمسيش العجينة بيه كانك قسمتيها على 4
جهة حطي فيها زيتون اخضر مقطع وفوقو طبقة من الفطر او الشومبينيون وفي الجهة اللي جمبها حطي كمية من الفالف الحلو المقطع شرائح رقيقة او اي نوع من الخضار اللي تفضليها وفي الجهة الثالثة حطي كمية من الزيتون الاسود وفوقو كمية من الدجاج المفتت وممكن تعملي في مكانو جمبري او كروفات مسلوق انا ماكانش عندي اما الجهة الرابعة حطي فيها كويرات صغيرة قد حبة الزيتون من اللحم المفروم النيء يعني ماشي طايب وممكن تعوضيه بتونة مصفية من الزيت
دخليها لفرن ساخن مباشرة من غير ماتقبيها بالفرشيطة وطيبيها من فوق وتحت في نفس الوقت وكي تخرجيها مباشرة زيدي ابرشي عليها شوية جبن ورشيها بشوية زيت زيتون امممممممممممممم يعطيها دوق هايل وقدميها مباشرة وهي ساخنة
راني حطيتلكم الصوص طوماط بطريقتي نزولا عند رغبتكن حبيباتي
في هذا الوقت حضري صلصة الطماطم وهادي طريقتي
اغسلي تقريبا 1كلغ من الطماطم الطرية واعصريها من البببدور والماء اللي فيها مليح ثم ارحيها ولا ابرشيها بلاراب وارمي القشرة اللي تبقالك راح تتحصلي على طماطم ثقيلة وعلى فكرة البذور والماء اللي في الطماطم هما اللي يخليو الصلصة تجي قارصة ولا حامضة انا دائما ننزعهم في جميع صلصاتي جربوها وراح تشوفو الفرق وهدا سر نجاح الصلصة
المهم حطو هديك الطماطم في مقلات مع حبة بصل صغيرة مبروشة +1سنة ثوم+ ملعقة سكر +ملح حسب الرغبة+3 ملاعق كبار زيت خلطي الكل وخليه على نار هادئة ربع ساعة
ثم زيدي فوقها ملعقة متوسطة طماطم مصبرة ممكن اكثر او اقل حسب طماطم الحب اللي عملتيها انا اللي عملتها كانت ماشي حمراء مليح
خلطي الكل وخليها على نار هادئة مابين ماتكون العجينة اختمرت
معلومة…الطماطم من الخضر اللي يزيد تركيزها كل وين تخلوها اكثر على النار يعني كل وين تخلوها مدة اطول على نار هادئة كل وين تزيد تتركز مليح ويجي مذاقها بنين
نتمنى تجربوها لانها هبال بأتم معنى الكلمة
وفي الاخير راني نستنا ردودكم وتقييماتكم وبلا ماننسى تطبيقاتكم
__________________
حبيباتي اللي طلبو مني الوصفات راني بديت بالبيتزا وباقي الوصفات راح تجيكم في مواضيع مستقلة بحول الله
ما شاء الله عليك تقول راني في بيتزيريا يسلموووووووو
|
المشاركة الأصلية كتبت بواسطة oum ibrahim
 ما شاء الله عليك تقول راني في بيتزيريا يسلموووووووو
|
هههههههههههههه والله فرحتيني اختي ام ابراهيم جربيها خير من نتاع البيتزيريا وزيد تعمليها بيدك يعني كلشي جديد وفراش
شكرا لك و جزاك الله خيرا
يعطيك الصحة
روعة ماشاءالله
يسلم هدوك اليدين اللي خدموهم ربي يخليك يمي يمي يمي شهيتيني
raw3aaaaaaaa mmm ya3tik asaha
الله يبارك ياختي فعلا فنانة بمعنى الكلمة
يعطيك الصحة على هذه الوصفة واكيد رايحة نجربها
في انتظار المزيد من ابداعاتك يا الشاطرة
الله يعطيك الصحة سخفتيني حنونة راح نستنى الباقي ربي يعاونك
شكرا لك و جزاك الله خيرا
يعطيك الصحة
يعطيك الصحة راكي طيرتيها للبيدزيريا ربي يرزقك الدرية الصالحة الطيبة عاجلا غير اجل.يااااااااااارب يااااااااااااااااااااارب
با ين بنينة يعطيك صحة صح عيدك
شكرا لك و جزاك الله خيرا
يعطيك الصحة