السلام عليكم….
صح رمضانكم وفي نفس الوقت صح فطوووووووووووووووركم (مبقى والو وياذن راني ميته بالعطش هههههههههههههههه)…
المهم كما تعرفوا راه بدا العد التنازلي انتع رمضان معناها بقالنا نصوموا 9 ايام او 10 فقط…
وراني قررت انا ان شاء الله هاذي المره نخدم قاطويا بكري ونتهنى منو باه الايامات الاخيره نلهى بحوايج اخرى غير القاطو….
المهم ان شاء الله انا قررت اندير ما يلي:
1- قاطو البوسعادية (الذي لا استغنى عنه في جل المناسبات )…
2- بقلاوة.
3- قاطو صابلي للاخت ام رامي (ربي يحفظها).
4 – قاطو النيسلي (لي نحطوه في كيسات تع الحديد تع الدزيريات).
5- قاطو الورقه…
وربي يسهل ان شاء الله …..انا هذا واش قررت…
راني نستنى في قراراتكم انتم….ارجوا التفاعل….
شكرا لكن 
راني نخمم كل مة يجي في بالي نوع
انا صراحة المقروط اولا مستحيل نستغنو عنه في الدار 2_البقلاوة 3بركات بالنيتيلا 4_حلوة الملفوف 5_حلوة الكريستال 6 _عجبتني حلوة الغربال راني نخمم اذا بقالي الوقت نعملها …..صراحة راني نتجنب عمل اي حلوا فيها قلاصاج لانو يجيني شويا يابس ويخصرلي الحلوى
مازالني حايرة يا ريت تعطيولنا افكار
السلام عليكم صحا رمضانكم
في الحقيقة خواتاتي راني قررت انا تاني ندير السنة القاطو بكري كيما قالت الاخت باش في الايام الاخيرة نتلاهاو بحوايج اخرين المهم القرار كاتالي:
المقروط لي محال نستغناو عنو
البقلاوة
قاطو النيسلي
بوسولات مسو
الصابلي
قاطو حلوة الترك
مخبز
والبقية راني نشوف ونخمم المهم لي عطيتهملكم هادو اساسيات والباقي راح نشوف وعلى فكرة انا نبغي نكثر انواع القاطو مي نخدم ب 250 غ زبدة يعني ندير حاجة قليلة
صحا عيدكم ولي عندها روسات جدد تفيدنا رانا في الانتظار
والله انا غير مزلت حايرة لحد الان راني خممت غير في البقلاوة والمقروط مي لوكان غير تمديلنا قاطوالنيسلي
سلام الاخوات صح فطوركم انا عضوة جديدة نتمنى ترحبو بيا
بالنسبة للقاطو نتع العيد احنا قررنا هد العام منكتروش فالانواع و بربي رايحين نديرو يعني انا و ماما التشاراك مغبر محال نسمحو فيه ونزيدو حلوى السيار و حلوة الورقة الخضراء و نزيدو حلوى الطابع و خبزة الباي انشاء الله
انا راني درت هذا اليوم
ومقروط ام رامي الغالية
و 2مودلات درتهم قبل
هذا
وهذا
ويرحمها ربي.
سلام صح فطوركم
انا عولت ندير بقلاوة ومشوك هادو لازم والباقي حبيت احرين ساهلين برك
دبروا علي
|
المشاركة الأصلية كتبت بواسطة الحطاب سهام
 انا صراحة المقروط اولا مستحيل نستغنو عنه في الدار 2_البقلاوة 3بركات بالنيتيلا 4_حلوة الملفوف 5_حلوة الكريستال 6 _عجبتني حلوة الغربال راني نخمم اذا بقالي الوقت نعملها …..صراحة راني نتجنب عمل اي حلوا فيها قلاصاج لانو يجيني شويا يابس ويخصرلي الحلوى
|
با اختي كيفاه داير لي باركات بالنوتيلا؟
انا ندير ان شاء الله المقروط طبعا والقطايف وراني نخخم في كيفية اخرى
انا تاني حابة ندير القاطو بكري ونتهنى بصح والله راني حايرة واش ندير لو كان تشيخو عليا
حنا رايحين نديرو
بقلاوة
مقروض
بجاوية
قرن غزال
ونوع واحد اوخر
وخلاص
مازال ما قررت حتى استشير الهيئة العليى لكن كل عام نعمل صابلى اخى يحبه ونعمل العرايش ونفكر فى حاجة ساهلة
|
المشاركة الأصلية كتبت بواسطة nafla
راني نخمم كل مة يجي في بالي نوع
|
معليهش اختي خمي مزال الحال شوي…
وزيدي شوفا من عند البنات كشما تقاي …