بسم الله الرحمن الرحيم
الأخت أم إسلام و آية طلبت مني طريقة فتيل الكسكس أو كيما نقولو تكسكيس الطعام نتمنى نكون وضحت الكيفية و اللي عندها سؤال راني واجدة المطلوب فالكيفية : سميد نوع مليح أنا استعملت سميد القمح + تشيشة + ماء + حنا نقولولهم الصواور اللي نصيرو بيهم
هذا سميد القمح خادماتو ماما فالدار
هذه التشيشة اللي في الصحن فوريها و حطيها في قصعة و حليها مليح حتى تبرد
إرفدي ذيك الكمية تاع الماء و رشي بيها ثم إفتلي بيديك لزوج مليح حتى تنشف ثم زيدي ذيك الكمية تاع الماء و زيدي إفتلي مدة 5 دقائق حتى تحسي بيها تحت يدك ثقيلة و مشمخة ثما حبسي مالماء
هاكا تصيبي التشيشة تاعك و المدة ليقلت عليها متبعيهاش يمكن حسب تشيشة كاين اللي تشرب الماء و كاين لا
إرفدي هذي الكمية تاع السميد و رميها على التشيشة و فتلي يعني تنشفيها بالسميد
إفتلي مليح بيدك كيما هاكا متزيري يدك مترخيها
يتبع( خلوني نكملو فيه بزاف من بعد قيمو)
كرري العملية خطرة رشي و فتلي مليح و خطرة بالسميد و ثان إفتلي مليح ديري هاك حتى 4 مرات يعني 4 رشات ماء + 4 سميد حتى تصيبي طعامك طلع راكي تحسي بيه كاين اللي يطلع طعامو ليه ليه ميحتاجش 4 مرات
هذي هنا شوفي مليح كيفاش طلح الطعام راهو باين محبحب
هذا نقولولو السيا فرغي فية و سيري ينزلك الطعام مع الفتلة
كيتسيريه حكي بيدك كيما راكي تشوفي باش ميبقى والو كاين اللي يتكربل هاذاك الفتات إجي خشين حيديه بجيهة
يتبع
هذا النفاض ثان فرغي فيه و سيري مليح باش يحكملك الطعام و تهبط الفتلة
هذا هو الطعام اللي حكمو النفاض
وهذي الفتلة اللي طاحت منو زيدي رشيها و فتليها ثم السميد خطرة خطرة يعني متزيديش ثم خرجيه فالسيار الأول ثم الثاني و تيقاي تعاودي حتى تخرجي طعامك
هنا ديريلو كمية مايزينة قد 2 ملاعق و خلطيه مليح
هذا الطعام اللي خرجلي صحن واحد تشيشة خرجت 2 طعام فوريه و كيتنحيه متكثريش الماء شمخي يدك و زربعيه ثم رجعيه إفور ثم كيتنحيه ديريلو الماء و الملح عادي كيما تعاودي الطعام تاعك و تخليه يريح حتى كيتقربي تاكليه تزيدي تفوريه باش ديريلو الزبدة
وهاكا نكون كملت نشالله نكون فهمت مليح و كاش سؤال راني هنا
يعطيك الصحة يا الغالية والله ما ضنيت بهذه السرعة بنت الرجال وفحلة وعندها الحق الوالدة كضرباتك باش تتعلمي خرجتك مراة ونصف
الففففففف شكروشكر
رايحة نتبع الموضوع مليح ونحط استفساراتي
والله مالقيت كيفاه نشكرك رايحة نبعثلك هديتي
يسلمو هذوك اليدين يعني واش تقصدي بالسميد يعني الفرخ كيما نقولو حنا يعني سميد رقيق
اليس كذالك
وقوليلي ما تستعمليش الفرينة على الاخير باه كيما نقولو في دارجتنا نكسيوها هذا لانو تعلمت لكن نسيت واش كان وانشاء الله راني ناوية
نتعلم على خاطر حاجة في نفسي لا غير
واشكرك مسبقا وجعله الله في مكيزان حسناتك حبيبتي ام لميس
إسمحولي خواتاتي هذه الصورة كيطلعلي الطعام و حبست مالماء و السميد و رحت باش نصيرو
هذي الصورة كيدرتلو المايزينة و فورتو التفويرة الأولى و كيما قلت متكثريش الماء
حشمتيني ختي أم إسلام وآية و الله درت الواجب تاعي حبيتي حاجة و درتها لختي و كان راكي حدي طبقيه معايا و مشكورة بزاف على كلامك العسل و قاع فحلات و بنات رجال و نشالله قاع يتعلموه و يخرجوه طعام في مو
مشكورة ختي الله يسلمك واه سميد رقيق و كاين اللي تكسكس بلحرش تكون فيه التشيشة قاوية و يقولولو سميد مصدر و حنا كنا نديرولو الفرينة بصح الميزينة تزيرو و كيتعاوديه يعني كيتفوريه و دريلو الماء ميخسرلكش بالماء حتى وتغلطي تكثريلو الماء ميتعجنش بزاف
|
المشاركة الأصلية كتبت بواسطة my lamis
 حشمتيني ختي أم إسلام وآية و الله درت الواجب تاعي حبيتي حاجة و درتها لختي و كان راكي حدي طبقيه معايا و مشكورة بزاف على كلامك العسل و قاع فحلات و بنات رجال و نشالله قاع يتعلموه و يخرجوه طعام في مو
مشكورة ختي الله يسلمك واه سميد رقيق و كاين اللي تكسكس بلحرش تكون فيه التشيشة قاوية و يقولولو سميد مصدر و حنا كنا نديرولو الفرينة بصح الميزينة تزيرو و كيتعاوديه يعني كيتفوريه و دريلو الماء ميخسرلكش بالماء حتى وتغلطي تكثريلو الماء ميتعجنش بزاف |
الله يسجيك حنونة ربي يجعلها في ميزان حسناتك والله مرا ونص كيما قالت الاخت ام اسلام واية يعني
مرا تاع الدار صح والله حبيت نتعلم انشاء الله ندير كيما هك ونجرب بالشوية واذا نجح راني نعرضك على عشاء
تسلمي بزااااااف حنونتي
ما شاء الله عليك اختي لميس راكي وفيتي وكفيتي بالشرح المفصل بربوشتك تسخف يعطيك الصحة
يسلمو هذوك اليدين
الله الله على الفحلة الله يحفظك
بصحتكم الطعام
Ya3tik saha
نورتوني خواتاتي و مشكورات بزاف و الله مصبت كلام نعبرلكم بيه على اللي فقلبي و الله هذا واجبي و اللي مفهمتش حاجة راني فالخدمة
الله يسلمك ختي ميمنة و نشالله تجربيه بصح متكثريش التشيشة لخطرش راها تزايد شفتي أنا درت طبسي خرجلي زوج طعام و راني نستنا العرضة تاعك على العشا
و أم خديجة الله يسلمك و الحمد لله اللي فهمتو طريقة الشرح و هذي أول مرة نسمع بالطعام تعيطولو بربوش
الله يسلمك أم مازن و مشكورة على المرور و جوهرة الإيمان ثان الله يسلمك نورتيني
الله يسلمك سومة الحنونة نورتي
يعطيك الصحة يا الحرة بنت الحرة الله يسلم هاذوك اليدين