السلام عليكم يا خاوتي أنا شريت طنجرة الفخار باش نستعملها في رمضان 
بصح قولولي كيفاش نحضرها قبل ما نستعملها ؟؟؟؟؟؟ 
يا اختي الاحسن تدهنيها بالزيت مليح وخلي فيها الزيت على الاقل يومين باه يتشرب وتكون قابلة للاستعمال وهناك من يدهنها بالشحمة وانت كيما تبغي
شكرا على الرد يا أختي بصح في علمي كي يديرو الشحمة تولي دخن و لا لا ؟؟؟؟
انا اقصد الشحمة تذوبيها وتدهني بيها الطنجرة مثل الزيت غير باه يتشرب اول مرة ومن بعد يسهل عليك الطياب فيه ان شاء الله تكوني فهمتيني اختي
أظن انه يجب أن تفيظي فيها الحليب أولا
ومن بعد أغسليها مليح وطيبي فيها بصحتك أختي
فيضي فيها الحليب برك ومن بعد طيبي فيها
نصيحة
ماتحطيهاش في الفريجيدار ومن بعد ديراكت للنار خاطرش تتطرطق
وكي تطيبي فيها نقصي للنار مليح خليها تطيب بعقلها باش ماتلصقلكش الماكلة وتجيك ماكلتك بنينة ومجمرة
يا اختي ديري فيها الماء عل الاقل 3 ايام كي تشرب هذاك الماء طيب مليح
يعطيكم الصحا خوتاتي شكرا على المساعدة ^^
diri elkadra ta3ak dakhal bassina ta3 maa khaliha tbat lili oumamba3d nahiha malma ahkmi hbila ou une lavette hakiha maldakhal bach ila k3ad fiha trab yatnaha apres diri fiha zit ou diriha fouk elnar ou dans Lefour tib apres sta3mliha
انا يا اختي من الاحسن انك تفيضي فيها الحلييب قبل ومبعد اغسليها وطيبي على روحك باه ترووح الريحة برك
بصحتك حنونة انا تاني عندي وحدة نستعملها من سنين اول مرة فيضت فيها لحليب من بعد غسلتها بعد ما بردت واستعملتها عادي كنت ندير فيها الشربة بصح عدت ندير فيها المرقة البيضا لانها ولات صغيرة على عائلتي نصيحة اختي ما تمرقيش بالما بارد بعد ما تقلي البصلة حتى وقت الصيف ما تقوليش الما راه سخون غلي الماء ومرقي باش ما تطرطقش وبصحتكم اختي وصح رمضانكم
اختي فيضي فيها لحليب كيما قالولك الاخوات ونصيحة مني ماتخليش فيها الماء مدة طويلة غير اغسليها بالخف وخليها تقطر مليح باش تقد صحيحة
أنا ثاني شريت وحدة وقالولي فيضي الحليب بالصح فيها la peinture من الداخل خوفتني مانيش عارفة اللي عندها وحدة كيما تاعي تفيدني.
أختي أنا موالفة نغلي فيها قشور الخضر باش ينحيولي ريحة الطين منها وندهنها بالزيت ياش يتغلقو المسامات وما تتكسرش