– اول شيئ لازم لكسكس يكون مفتول بحجم غليظ شوية على الكسكس في المناطق الاخرى ملازمش يكون رقيق سينو يكون سفة ومالازمش يكون غليظ بزاف باش مايكونش كيما لبركوكس اوكي .
– تاني شيئ لمرقة تكون عادية كيما نديروها كامل غير شوية اختلاف في المقادير + لازم تكون عاقدة ولا خاترة كيما تبغو تسموها.
– نستعملو فلطبخ هاد لقدرة ،لمرقة لتحت وطعام لفوق و بلاكم تعكسوها هههه
*نروحو للمقادير+طريقة طبخ ،وطبعا تزيد كمية على حسب عدد الافراد.
بصل، طوماط، كاغوت ،ولحم لغنمي بالاكم ديرو دجاج يرد لمرقة مارقة هههههههه .
ولعدس بصح ماشي نتاع لحانوت نيهي نيهي نتاع ادرار حنا نقولولو عدس لبلاد اممممممم تنقيه كيما روز من شوائب وتغسليه وترميه فلقدر وادا مصبتوهش مديروهش معليش نو بروبلام.
*نكملو مع المقادير كورجات( قرعة) ، وحبة بطاطا ،كابويا مقطعة على شكل طولي حبة حرور وطماطم مصبرة
1*نقليو لبصلة (مقطعة قطع صغيرة)مع لحم وزيت ،نزيدولها طوماط غابي مع كاغوت تكون مقطعة طويلة ماشي مدورة كيما مرقة زيتون ،ولعدس( منبعد منصفيوه )،ونديرو توابل ملح كمون ،كركم ،عطور نتاع طعام وهدا سر نتاع لكسكس لادراري ، لفلفل لحمر ولعكري باش يحمر لمرقة ،خليها تقلا مليح وادا نشفت زيدي غير شوية ماء ، زيدي لماء على حساب لي يغطي لحم ولا زيدي فوقو غير شوية وطوماط مصبرة ،خليها تطيب على خاطرها وكي تشوفيها بدات تختار غير شوية زيديلها لبطاطا وكورجات وكابويا وحبة حرور ، ونقصي نار وخليها تطيب فخاطرها ادا شفتي لحم مزال ماطاب معليش زيدي شوية ماء .
2*نروحو لكسكس المفروض انك قبل ماتبداي فلمرقة تغسليه كيما روز بصح غير غسلة وحدة باش مايتعجنش وتحطيه فلكسكاس باش يصفى من لما ،وكي ينشف حليه فقصعة كبيرة ، وترديه لكسكاس وتحطيه فوق لقدرة لي تكوني درتي فيها المرقة بلضبط فلوقت لي تكوني زدتي لماء……..كي تشوفيه بدا يفور ،ارفدي لكسكاس وديريه فوق صحن ورشي لماء على لكسكس حساب كاس ماء متكتريش باش مايتعجنش ويجي ناشف وكل حبة وحدها ،كي ينشف حطيه فلقصعة وحليه بشوية زيت وشويه كمون ،ومنبعد رديه لكسكاس وحطيه يفور وهادي لمرحلة الاخيرة فطياب ،غير شوية راكي تشوفيه بدا يفور وتشمي ريحة الكمون الله الله على هديك ريحة جيران كامل يعرفو بلي فطورك كسكس ههههههه …….
كي يفور حطيه ديريكت فلقصعة وزيديلومغرف سمن و شوية فلفل كحل (بزار) وكخطوة اخيرة ديريه فصحن التقديم خاص بلكسكس ،وسقيه بلمرقة لي تكون خاترة وبنينة تقدري تزيدي شوية بزار وسمن فلمرقة قبل ماتسقي لكسكس.
متنسوش تقيييييييييييييييييييييييييييييييييييييييييم
ملاحظة ،كاين لي يزيد لحمص ولا جلبانة ولا ينقص لبطاطا ولقرعة يعني كل واحد وكيف ،اكيد كل مازدتي لمقادير كلما تجي لمرقة همة وخاترة وبنينه
واي سؤال راني هنا ………………….. واسمحولي لي محطيتش ليفوتو
اولا شكرا على الوصفه اختي
ثانية طعام ادرار لازمه التمره اي ايضيفوا حبة تمر ولا زوج من المعجون في المرق حتى تمشي حموضة الطماطم المصبره
وما يديروش فيه البطاطه انا راني نتكلم على تاع المناسبات يجي لحم وجزر وكابويا وعدس لبلاد فقط
حتى طريقة التعطيع للخضر تختلف تقطع صغيره
وحسب ما ضقت من انواع الطعام او الكسكس في بعض المناطق تاع ادرار والبيض هوما الاحسن
بارك الله فيك
|
المشاركة الأصلية كتبت بواسطة الأمنيات
 اولا شكرا على الوصفه اختي
ثانية طعام ادرار لازمه التمره اي ايضيفوا حبة تمر ولا زوج من المعجون في المرق حتى تمشي حموضة الطماطم المصبره وما يديروش فيه البطاطه انا راني نتكلم على تاع المناسبات يجي لحم وجزر وكابويا وعدس لبلاد فقط حتى طريقة التعطيع للخضر تختلف تقطع صغيره وحسب ما ضقت من انواع الطعام او الكسكس في بعض المناطق تاع ادرار والبيض هوما الاحسن بارك الله فيك |
شكرا اختي على الاظافة متل ماقلت كاين لي يزيد حوايج اخرين يعني على حسب كل منطقة .
مشكورة على الرد
merci keltouma bessah t3am ta3 adrar mayhotouche fih el khodra mel fog lala??
فعلااااااااااااااا الكسكسي شهي بجميع طرق تحظيره بارك الله فيك على الافادة