راني حابة نتعلم نفتل الطعام وحدي في الدار
في الحقيقة فتلت مرة في حياتي 
لان العادة في عايلتنا ان هم يتجمعو كل عطلة ربيع في دار خالي في البلاد ويتعاونو فالفتيل
يفتلو العولة تاع العام كيما نقولو 
وانا ماكنتش نقدر نروح للبلاد في عطلة الربيع. كنت نقعد ندير les devoirs
وتفرت فيا 
شكون الفحلة اللي تقدر تشرحلنا طريقة الفتيل بالتفصييييييييييييييل وان امكن مع صور السواور اللي تستعملهم
انا عندي السواور حبيت نوريهملكم لكن مازال عندي مشكل رفع الصور من الكمبيوتر للموضوع
لكم الف شكر ودعوة في ظهر الغيب ان شاء الله
رني عملت موضوع الفتيل في عدة اجزاء بحثي في ملفي ونوعدك نصور الطريقة بالتفصيل
|
المشاركة الأصلية كتبت بواسطة touta2016
 رني عملت موضوع الفتيل في عدة اجزاء بحثي في ملفي ونوعدك نصور الطريقة بالتفصيل
|
بارك الله فيك اختي
اسعدني كثييييييييييرا ردك 
ان شاء الله نبحث في ملفك
وشكرااا جزيلا
انا نعرف نفتل و عندي طريقة حديثة و سهلة تخليك تخرجي ضعف الكمية بالفتل التقليدي و كذلك يجي خفيف و ما يخرجولكش الكور …
واش رايك اختي؟
|
المشاركة الأصلية كتبت بواسطة siham mokrani
انا نعرف نفتل و عندي طريقة حديثة و سهلة تخليك تخرجي ضعف الكمية بالفتل التقليدي و كذلك يجي خفيف و ما يخرجولكش الكور …
واش رايك اختي؟ |
ممكن الطريقة تعيشي
|
المشاركة الأصلية كتبت بواسطة labed93
ممكن الطريقة تعيشي
|
نعم ممكن جدا …
|
المشاركة الأصلية كتبت بواسطة siham mokrani
انا نعرف نفتل و عندي طريقة حديثة و سهلة تخليك تخرجي ضعف الكمية بالفتل التقليدي و كذلك يجي خفيف و ما يخرجولكش الكور …
واش رايك اختي؟ |
اهلا يا الفحلة
ما شاء الله… ماذابيك تنفعينا بطريقتك
انني في الانتظار بفارغ الصبر
شكراااااااا
|
المشاركة الأصلية كتبت بواسطة Louparadisa
اهلا يا الفحلة
ما شاء الله… ماذابيك تنفعينا بطريقتك انني في الانتظار بفارغ الصبر شكراااااااا |
iهههههه فحلة بالصح ماشي خير منك حبيبتي …
المقادير و الطريقة :
شكارة سميد تاع 25 كغ
نقسمها على 2
نفور نص و نخلي نص
نخلط النصفين المفور مع اللي ماشي مفور + 1 كغ فرينة
نفوت كلشي في سيار باش يختلط مليح و نحي كاش شوائب او كور تاع سميد بعد التفوار
نحتاج 3 سياير
الأول احنا نسموه السقاط الأول يجي مفتوح شوية
الثاني اسمو القاط الثاني هو للي يحددلك حجم حبات الكسكس كاين للي تحبو خشين شوية و كاين للي تحبو رقيق خلاص
الثالث اسمو الرفاد هو للي ترفدي فيه حبات الكسكس
نبداو
نحطو ايناء فيه ماء و شوية ملح
و نحط امامي قصعة
و شكارة تاع السميد نحي منها بالشوية في ايناء آخر يعني لا نحتاج لا سميد رطب لا نخلطو اي شيء آخر تفتلي بالشكارة كما وريتلك منها فيها
نحط حوالي حفنة صغيرة في القصعة و نظيف الماء بالشوية قيش كمشة يد نفرزع الماء و نفتل حتى يتشرب السميد
نزيد نشرب بالماء و نفتل حتى يتشرب مليح
نزيد شوية ماء و نفتل حتى يتشرب مليح مليح
هنا نبدا نضيف السميد بالكمشة ايضا
نفتل و ندور يديا
نظيف كمشة ماء ايضا حتى يتشرب
و هكذا دواليك مرة سميد و مرة ماء حتى يبدا يتشكل الكسكس بالشوية
نعاود العملية حوالي 3 مرات
درك دور السيار : رقم 01
نفوت كل الفتيل في السيار رقم 01
نزيد نفوته في السيار رقم 02
نظيف شوية سميد و نمحص الكسكس تاعي باش ينشف مليح
نفوتو في السيار رقم 03 يعني الرفاد
و نظيف شوية فرينة و نمحص كمية الكسكس المحصل عليها
و هاكي بديتي تعمري في الكسكاس للي مباشرة كي تعمريه
تفري الكسكس تاعك و من بعد
للي تحب تتنالو مباشرة تفوروا 03 خطرات
و اذاتحبي تيبسيه و تخزنيه تفوريه مرة وحدة
و تعاوديه و هو سخون و فاير في السيار رقم 02 يعني السقاط رقم 02
تنشريه على قماش نظيف في الهواء حتى تحسيه بدا ييبس
من بعد تنشريه في الشمس حتى يولي يتقرمش يعني جاهز للتخزين
ملاحظة ما تحطيش الكسكس مباشرة للشمس لأنه مراحش ييبس بالطريقة الصحيحة و راح يفسدلك مع الوقت
اظيفي حبات فلفل اسود و خزني الكسكس تاعك في كيس قماش او الكيس للي شريتي فيه السميد في مكان جاف
و بصحتكم
ان شاء الله الطريقة مفهومة
استفدت معاك شكراااااا
جزاك الله خيرا اختي سهام طريقة ذكية والله يعطيك الصحة يا ختي كيما يقولو نتيريلك شابو .يرحم البطن اللي جابك .
واش نقولك اختي سهام ……… ربي يجازيك الجنة
ويباركلك في صحتك واهلك واحبابك
ويحققلك كل نواياك الطيبة ان شاء الله
نزيد نزعجك شوية ……..اذا ممكن تقوليلي من فضلك نوع السميد .. يعني متوسط .. على ما اظن ولا كيفاش داير
سؤال ثاني ربي يحفظك .. جربتيه بماركة سميد اخر
لاني في الغربة ومانيش راح نصيب لا لويزة ولا ذهبية ههه … وراني حابة نسيي طريقتك
شكرااااااااااا جزيلا على سعة صدرك
حبيت نوريلك السواور تاعي
خذيتلهم صور مقربة باش يخرجو شابين و يبانو مليح هههههههه
الاول السقاط حنا نقولولو بوعيون
والثاني القاط .. وعندنا الخراّج
و هذا السماد * تاع الفرينة*……
والرفاد هو اللي خاصني .. كي شراولي السيار فيه 4 disques .. السقاط والقاط (ههههه راني حفظتهم ).. لكن جاوني معاه 2 تاع السماد
au lieu واحد سماد و واحد رفاد
ههههههههههههههههههههه تقتلو بالضحك يا لبنات
مام انا مانعرفش نفتل
مي والله فريمون يعطيكم الصحة
شكرا لصاحبة الموضوع و للمجيبة على السؤال شكرا شكرا
يعطيك الصحة سهام راكي 44444