زميلي في الدراسة يزعجني بتصرفاته 2024.

سلام حكايتي وحدها بون العام اللي فات كنت نقرى مع واحد كنت دايراتو كيما خويا وأصلا ما كونتش نgسر معاه خلاص (خااااااااااطرة فالفال) وهو أصلا يحب ينطقني درع كل صباح نفوت فيه نوغمال وهو ماتقوليناش صباح الخير ؟؟؟؟روح منبعد ندخلو للكلاصة يبدا أعطيني نكتبلك (صاحا مكالاه) أستاذة نكتبو التعبير تاعها هااااايل مال ري g ماشي شباب وزيد يقولها لوكان ما تكتبوهش هو مانكتبش(مهبول) يطرحو علينا لي بخوف أسئلة هو يقولهوم شوفو مع الشاطرة (سامط) نطلع للسبورة مع البخوف تاع الماط واعرة بزاف النفس ماكانش معاها طلعنا بالقائمة نحلو التمارين وواحد مايهدر سينو خلات عليه و هو دايما يجاوبلي وي حل فبلاصتي غير باش مانديش التبهدايل وزيد يقولي عادي علاه تحمري و يبدا علاه علاه يا أستاذة تحشميلنا الطفلة خلاص ماكان والو هاو حليتي وما صرا وااااالو (لتم أنا نرجع طوماطييييييييشةصح ) ، فالراحة مين ندور نلقاه مقابلني يسمطلي نهاري (يغزلني الناس على راحتها وانا نحس روحي مراقبة )ندير بروحي كي شغل ماشفتوش وكل صباح نلقاه يستنى فيا منين السيام غير يشوفني زعما يروح صايي (وعلاجالو دايما كنت ندير الروطار دايما 8 و5 وهكذاك نلقاه مازال يستنى (شحال ماشي سامط ؟؟؟؟؟؟؟؟؟؟؟)) ولوكان نحكيلكم في الإمتحانات يباصيلي الورقة بل خوف بلا والو وكل خطرة فالإمتحانات والفروض يدير فوطوكوبي عالورقة وزيد يكتب فيها آسمي كي شغل آنا حليتها صح (ميحششششششششمش) وقريب يمدها للبخوف زعما هو جمع الأوراق ويدس الورقة هاديك تم(أوووووووووف دايما نحرقو وهاكذاك مايفهمش روحو) و فالفصل 3 بدا يتقرب مني صح وكل خطرة يسمعلي و لبنات اللي معانا gاع قالهوم بلي( نحبها) بصح وحدة ماقالتلي وكل خطرة يديرولي مقلب و يحبو يقربوني منو وديرولي عفايس باش أوبليجي نحكي ولا نهدر معاه(آآآه كي نتفكر وش يديرو فيا) . شحال من خطرة يهزلي الكاغطابل زعما يقولي تغيظيني راهي بزاف عليك ثقيلة ) وكل ما نجل للدار ونفتح الكاغطابل نلقاها معمرة حلوة وكوجاك وفيطاجو وgوفرات بأسمو (لتم نرجع كي المهبولة )…………………………
و مازالو بزاف عفايس غي نتفكرهوم نرجع نبكي …فالفصل 3 بدللي الأستاذ بلاصتي (دارلنا مخطط جلوس وحاخور وياريتو ماداروش) رجعني مقابل فيه (هذا واش كان يخصني أووووف) الطفل رجع كي المهبول وانا عدييييت فيه دايما مدور الكرسي تاعو جهيتي (بالاك يشوف فيا السبورة والله العظيم) وانا رجعت صم بكم مانشارك وما والو والسبورة تاعي رجعت الحيط دايما مدورة للحيط ونستنى غير واقتاش تصوني باش يخرج وهو رجع يزكر فيا موالف كل ساعة برة وانا جامي خرجت من الكلاصة يرجع لاصق فالكرسي حتى هو مايحبش يخرج كي نلقى روحي وحدي وياه فالكلاصة نخرج غير ندخل نلقى جدو فبلاصتي ينحت فالطاولة (أوف خرجني من عقلي ) نقولو هز روحك من بلاصتي(بالزعاف) مايحبش ومبعد نسمط عليه ونروح يقولي صايي وبقعد فبلاصت حبيبتي و غير يدخل البخوف شغل أوبليجي نقعد فبلاصتي(معاه) (كان يتفاهم مع حبيبيتي) و كان وكان وكان……………………
ووحد النهار كنت نتبع فالدرس بتتلي طفلة ورقة وقالتلي كاين واحد آو حابك (كلاطيت بالضحك…) ماكزنتش دارة فبالي بلي هو هي تقولي والله غير مني وهو تاع السوريو . وماتصوريش شحال آو يحبك فالكلاصة هادي تخيلو (طفلة ماشي مليحة راسها معمر عفايس كيما هادو ) وزيد تقولي حرام عليك وهو مسكين ناويك اللحلال
قولتلها أنا أنت مريضة بيك بيه ودايما نفس الحكاية نحس روحي مراقبة ومين ندور تجيني الطفلة هاديك وتقولي خممتي رجعي عليه آو مازال يسنى (ياربي شحال ماتفهمش الطفلة هادي أنا نقولها لاااااااااالا وهي كل خطرة علاه علاه علاه حرام عيك الطفل عندو بيام ورجع مايقراش خلاص . عداو يامات ويامات نفس الحكاية (هي وهو ل2) بالجمعة النتس تحفظ باسكو كي ندخلو بالأحد عندنا الفروض اللخرانيين فالليل وانا نحفط لحقني آساماس (سالو… مي فغيمون جوثام باي و بون نوي) آنا تشوكيت والله العظيم غير ساعة وانا نرجف النيميرو تاعي عندو طلقت بركيت الحفيظة وبانتلي كي شغل قاعدة نحلم .
الليل كامل وانا نطلع ونهبط واليوم تاني هاكديك … كي دخلنا بالأحد جا يقعد مورايا وآنا كيشغل ماصرا والو مادورت ليه ماهدرت مع زريعتو ماوالو وهو يسمعلي يهدر مع صاحبو وحبيبتي زعفانين مننا دوك نروحو ولااااااااا حاشمتونا قتلتو بالترخاس (سمحولي) الساعة لوخرة رجع لبلاصتو وغير يتفرج فيا (الشوفة تاعو تخلعني) ومبعد انا كي شغل ماصراوالو قولتلو أعطيني التيليفون تاعك وعيطت للتيليفون تاعي باش نتأكد بلي هو وصح لقيت نيميرو جيزي تاعي عندو وصح هو الموبيليس هداك تاعو و مبعد فاقلي بلي مرgتلو آيا راح يجري وقالي دوك نفاصيه (زعما ماحفضوش)؟ سلام مبعد نكمل عييتكوم معايا أعطيوني رأيكوم و كملو القصة كيما تتخيلوها إلى حبيتو وبعدها نكمللكوم الكارثة في انتظار تفاعلكم
ملاحظة (دينا البيام ودوك رانا فالليسي)

مفهمت والو صدقيني

ههههههههههه قصتك فووووووووور ذكرتيني بصحبتي الانتيم في الباك قصتها كيفك
بصح المصيبة وين ؟؟؟ كنا نقولولها يحبك تقولنا حباتوا الحبوبة و تنقروا طوبة
و نهار تخرجنا و كملنا سمعت بيها تزوجاتوا و عندها طفلة و راهي بالحمل

ختي والله رانا تقريبا نفس البروبلام انا تاني رانب رايحة نهبل
10 خطرات نبدل النومرو تاع البورطابل باسكو ماعلااليش النومرو اللي نديرو يلقاه
وحد السماطة و زيد نتو على الاقل تقعدي مقابلاتو
حنا الشيخة كي دارت المخطط قعدتني قدامو
ربي يعينك مع هاد المصيبة

هههههههه معلاباليش الامة راهي تعاني ربي يصبركم تكبروا و تنسوهم
والله عندكم الحق كاين ناس لصقة كل متفهمش تكرهكم في الحياة بصح
كاين طريقة تجاهليه و خليه متكسروش راسكم بيهم

اختي نصيحة مني غير ولي معاه بان عليه يحبك بزاف مالجغي واش يديرلك مي يحبك بزاف انشاللعه انتي تانيك تحبيه قبل ما ينساك

C’est compliquée mais au futur
رايحة تتفكري هاذ لحكايات و تضحكي عليهم. ننصحك حاجة: ما تجرحيهش خاطش مازالكم صغار و ماتعرفي ربي سبحانو واش مكتبلك. باش ما تندميش.
حاولي تتجنبيه وما تقلقيش روحك بلي جاسث ديالو.
ربي يعين

ههههههههههه حكايتك فولا حنونة مي تاقلمي معاها شويا وبداي انتي تاني تتمسخري عليه وقوله انا تاني نحبك ونديرلك ونعملك مي غير من التحت للتحت وبالالغاز حتى يفهم بلي راكي غير تفوتي بيه الوقت ههههههههههههههههههههههههه مسكين

ربي معاك ننصحك تشكيلو ولي امرك هكا ميزيدش يدور بيك كامل
ياخي ســـــــــامط
ربي هديه {وانتي بلاك تسمعي لهذيك اللفعة لي تقولك اهدري معاه بسيف وسمطيه يدور الزمان ويكره ربي معاك ختي}

gwin rah elmoushkil hab y3abar we hadak ma 3talo rabi etfahmih we goulilou rayek bsaraha makansh ged essaraha

السلام عليكم

يا أختي …. الله يثبتك
الولد باين عليه يحبك … بصح راهو كيما نقولو ( قوا على ما وصاوه )
عادي جدا … الولد في مرحلة المراهقة و هو لم يجد طريقة ليعبر لك بها عن حبه سوى هذه
أنصحك بتجاهله دائما
لا تلقي بالا له
لأنه و كما قيل لك … سيأتي يوم و يمل
أنت ما عليك سوى الاهتمام بدراستك … و لا تسمحي لهذا الفتى بإلهائك عنها
تجاهليه دوما ….. و كفى
أرجو لك التوفيق
سلام

يا اختي الصغيرة تقراو في السنة الرابعة متوسط يعني راكم صغااااااار ومراهقين عادي المهم الا تنجري واهتمي بدراستك وفقط

بصح بيناتنا عجبتني حكايتكم ضحكتني بزاااااااف كي تكبري تتفكري وتضحكي

تحياتي والدراسة ثم الدراسة