تطبيقي ليوم الاحد
درت الكوراج و نضت صليت الفجر لاني صبحت مريضة غير صليت و رجعت رقدت وباقي الصلوات في وقتها اضافة الى الاستغفار
لولاد حضرو فطورهم وحدهم و راحو للمدارس ….كي نضت لميت الدار خفيف و درت لغدا طاجين جلبان و فريت و سلاطة تغدينا و صليت و رقدت طويييييييييلا
لعشية شربو لاتاي
مع الزبدة و المربي و لعشا غراتان الدنجال
نسخت لابني تمارين السنة الخامسة ووقفت معاه حل الرياضيات و العربية مليح و فهمتو درس الهمزة
تفريش الاسنان و ترطيب اليدين و الرجلين فقط
يوم الاثنين
صليت الفجر حاضر و درت الكوراج و قريت الاذكار و 2 احزاب من المصحف …..راني في الحزب الواحد و العشرين
كنت متمنية نصوم ما قدرتش من الحمى
اضافة الى الاعمال اليومية …نحيت الستائر نتاع الاوول و درتهم في الة الغسيل و درت تاني غلافات لمخاد و غطاوات السدادر و بلاصيت غطاوات نظاف
نحيت الطابي و هبطتو لل اراج باش نغسلو يوم اخر
سيقت الاوول و دخلت للكوزينة درت حريرة و سلاطة مشوية و بطاطا بوري
لعشية خيطت حجابات نتاع صلاة لصديقتي
بعد المغرب طويت القش المغسول و فرزت للي لازموا لكوي و للي لازمو الترقاع نخصصلو وقت في الصباح الباكر
ساعدت بنتي في رسم زخرفة عندها فرض في الرسم
دوش منعش و ترطيب للجسم
يوم الثلاثاء
الصلوات في وقتها وحث الاولاد على اداءها …الاذكار و الاستغفار اثناء الشغل
سيقت الاوول و المطبخ و الكولوار فقط كان عندي اكل في الثلاجة …رحت لجارتي بسست ليها المقروط و غدا ان شاء الله نروح نقطعو معاها (عندها مناسبة ختان ابنها)
عشية خرجت شريت حوايج خياطة و رجعت بسرعة فصلت مخاد باش كل ما يكون عندي متسع من الوقت نخيط وحدة
لعشا سفة باللبن
في الليل جمعنا الاب و قرا للاولاد مقتطفات من كتاب احياء علوم الدين يحكي قصة وفاة الرسول عليه الصلاة و السلام طبعا الكل انفجر بالبكاء حتى ملاك الصغيرة و هو كان هدفو من سرد القصة انو يفهم الاولاد انو اخر كلمات نطق بيها الرسول صلى الله عليه و سلم هي الصلاة الصلاة g
يوم الاربعاء
الاستغفار و الصلاة على النبي و سماع سورة البقرة + الاذكار
كي خرجو الاولاد درت على الدار كامل لميتها و نظمتها و دخلت للمطبخ درت لغدا يطيب طاجين دجاج و بطاطا في اكياس الشواء
غسلت ماعين لفطور و نقيت الكوزينة و درت طابي خفيف في الماشينة و رحت للاوول
خرجت الاواني كل للي في الخزانة و حتة التلفاز و الديمو و غسلت كلشي و خليتهم يقطرو
و غسلت لحصيرة و طلعتها للسطح
على 11 طفيت على لغدا …….
و سيقت و فرشت
بعد لغدا رحت لجارتي خدمتلها 4 كلغ مقروط كملت مع 5
رجعت للدار
عجنت الخبز للعشا
و رجعت الاواني للخزانة
حضرت مع ابني درس فرنسية le boulanger
الابن لكبير يدرس مع باباه و البنت جاو صديقاتها درسو معاها
عملت لرجليا ماء سخون + ملح و كمدتهم مليح و عملتليهم تقشير و ترطيب و النتيجة هايلة
يوم الخميس
دائما مع الاذكار و الاستغفار و الاستماع لسورة البقرة
بايت الامطار دايرة حالة و انا تدخلي للدار من باب السطح ………………………
قفزت بالغدا درت عدس …(صبح البرد هههه)
رفدت لفراش و سيقت الدار و نشفتها و عاودت فرشت
و قعدت في الماشينة خيطت مخاد
لعشا درتليهم هامبورغر
عادي تفريش اسنان و ترطيب اليدين و الرجلين
نهاية الاسبوع
دائما مع الاستغفار و الصلاة على النبي
بعد ما فطرنا درت لغدا يطيب طبعا طعام (كسكس)
و جندت الاولاد يساعدوني
عطيتهم الطابي هودوه لتحت و غسلوه
و انا مسحت حيوط الاوول (شهر نغسلو و شهر نمسحو)
فرغت الادراج نتاع الاحذية و غسلتهم
بعد ما نشفو رجعت الاحذية في مكانها
و دخلت لغرفة النوم فرغتها كامل من محتوياتها
نحيت الريدو و درتو يتغسل
و نحيت النافذة و غسلتها
و مسحت لحيوط كانو نظاف يبرقو
و غسلت الباب و سيقتها بالمعطر
بعد لغدا عجنت بريوش ام رامي و خليتو يخمر و جلست شوي عند النت
درت البريوش يطيب
و جاو عندي ضياف شربو الشاي و القهوة
النسا راحو و الرجال قعدو للعشا ….درت حريرة و سلاطة مشوية و فريت اوملات (الموجود في البيت)
00000000000000000
بارك الله فيك
انت رائعة اختي ماشاء الله عليك ربي يقدرك و يقويك خاصة مع الجانب الديني و الجانب التربوي هكذا نقول انو فعلا المراة هي كل المجتمع ماشي نصف المجتمع بارك الله فيك
- ما شاء الله عليك سمراء الله يبارك
- والصور تاعك تزيد تحمسنا
ماشاء الله ربي يحظك لوليداتك انت و الوالد تاعهم
ماء شاء الله أنتى نعم الزوجة وزوجك نعم الزوج ماشاءالله صدق فيكم قول الله تعالى * الطيبات للطيبين والطيبون للطيبات * ويعطيك الصحة بالرغم راكى مريضة وأنت تطبقين البرنامج نقولك طهورا إن شاء الله ربى يحفظك لزجك وأولادك
الله يبارك اعليك وربي قويك وجزاكي الله خيرا
6 لكل جانب
+ 3 للمقروط
+3 للخياطة