السلام عليكم و رحمة الله و بركاته
اخواتي الغاليات راني جيت و يديا ماشي فارغين
جبتليكم بعض الاطباق اللي ممكن نحضروها في الشهر الفضيل بما انو شهر الخير و هو فرصة باش العايلة تتلم و تاكل مع بعضها وفي نفس الوقت
سلطة الجزر و الطون
هي من اشهى و الذ السلطات و انا نديرها باستمرار حتى العايلة تطلبها في رمضان مرتين او ثلاثة في الاسبوع
تقطعي الزرودية الى دوائر و تفوريها
من بعد ديريلها الملح سنينة ثوم مفروم
شوية فلفل كحل
شوية زيت و خل
و كمية من المعدنوس المقطع و هاذا سر البنة
دريها في طبق التقديم فتتي فوقها علبة طون
وزينيها بالمايوناز و الزيتون الاسود اذا كان متوفر او بيض مغلي او ماييس
جربوها و مارايحينش تندمو
صلصة بكريات اللحم و الشومبينيون
هاذ الصلصة بنينة والاهم انها تتحضر بسرع او حتى في اخر لحظة
في شوية زيت تقلي نص حبة بصل و حبة طماطم مع شوية ثوم و ملح و فلفل كحل وزعفران زيدي ورقة رند وربطة صغيرة قصبر يعطيها بنة هايلة
مرقي بكاس ماء
و تكوني حضرتي كريات اللحم المفروم او حتى دجاج مرحي تقليهم في شوية سمن حتى يتحمرو تضيفيهم على هاذيك الصلصة اللي تكون تغلى
وفي نفس المقلاة ديري الشومبينيون مع شوية ملح وثوم وخلية يتشرب البنة تاع الكفتة
و ارميه مع الصلصة تاعك
خليها تعقد و زينيها بشوية معدنوس مقطع
قدميها مع فريت او بطاطا صوتي
بطاطا صوتي بالتوابل اممممممممم
راني عارفا باللي معظم النسا يعرفو يديرو هاذ البطاطا بالصح انا نضيف ليها لمستي الخاصة اللي تخليها ما تتشبعش
نقشرو البطاطا تاعنا و نقطعوها مكعبات متوسطين و نديروها تفور
من بعد نخلوها تبرد تماما باش ما تتفتتش
نديرولها الملح و نقليوها في زيت سخووووووون
ونقلبوها مرة على مرة حتى تتحمر في هاذ الوقت نحضرو سنينات ثوم صغار مرابيين
و بمجرد اننا نحطو البطاطا في الصحن بلا ما نديرو ورق المطبخ هي ما تشربش الزيت
نديرو عليها هاذاك الثوم شوية برك وشوية فلفل كحل و شوية كمون و معدنوس اذا بغيتي و خلطيها مليح وغطيها و خليها تتنكه بهاذوك التوابل و رايح يجي ذوقها روووووووووووعة
LES BROCHETTES DE DINDE
اعتذر على رداءة الصورة
بالصح البنة ماشي كيما الصورة ههههههه
المهم مرة على مرة يبغي الواحد يفحشش العايلة و يخرج على الروتين على هاذا جبتلكم مجموعة من المشاوي
تجيبي شرائح لحم او داند او دجاج كل واحد و مقدوره
انا درت داند
تقطعيه شرائح طويلة و اديريه في التتبيلة تاعه اللي هي
حبة بصل صغيرة و4 سنينات ثوم ومغرف موتارد ضرورية ملح كمون راس الحانوت فلفل كحل و زغفران و شوية زيت
تطحنيهم بالميكسور
و ديريهم مع الشرائح اللي كنتي قطعتيهم و تخليم اطول وقت ممكن
تحضري القضبان تاوعك و اذا عندك تاع الخشب ديريهم في الماء يتشمخو قبل ما تستعمليهم باش مايتحرقوش
انا شويتهم في الطاجين تاع المسمن المهم نقصي النار و مرة على مرة ديري فوقهم شوية زيت امممممممممم
دجاج محمر في اكياس الشواء
انا هنا ما استعملتش دجاج كامل كانت العايلة كبيرة وشرينا 10 تاع LES CUISSES
يعني كل الافراد يدو كيف كيف
تجيبي الدجاجة تاعك او القطع ملحيهم مليح تكوني موجدا التتبيلة تاعك اللي هي
راس ثوم مرحي
مغرف صغيرة راس الحانوت
فلفل كحل. كمون.زعفران زيدي شوية ملح
وخلطيه بكمية مليحة تاع سمن ما يكون ذايب ما يكون بارد ورايحا تتحصلي على كريمة
اطلي بيها الدجاج تاعك و ديريه في اكياس الشواء مع ورقات رند يعطيها بنة مميزة
وخليها وقبل وقت الاكل بساعة ونص شعلي عليها و خليها على نار هادية حتى تتحمر داخل
الكيس واذا بقات فيها شوية صلصة ممكن تقدميا مع بطاطا بيري او روز بالشعيرية
بوراك بكريمة الدجاج
ماكانش صورة بالصح والله راااااااااائع احسن من تاع اللحم المفروم
جيبي قطعة دجاج و دري بيها مرقة بيضا كيما موالفة
بلا ما تكثري المرقة
كي تطيب نحي الدجاج و فتتيه
وهاذيك المرقة كي تبرد ديريلها 2مغارف فرينة وحركيها على النار حتى تثقل طفي عليها و ديري فيها قطعة كبيرة تاع فرماج اة حتي الجبن اللي نستعملوه في البيتزا امممممممم
وخلطيه مع الدجاج اللي فتتيه وكي تبرد عمري بيها البوراك انا نبغي نديره مثلثات
و كي تقليه لازم الزيت يكون سخون و انقص النار شوية باش تتحصلي على اللون الذهبي
روز بالشعيرية
في كاسرونة ديري مغرف سمن تذوب
زيدي عليها كمشة من الشعيرية اللي نستعملوها في الشوربة
وحركيها حتى تتحصلى على لون ذهبي ديري عليها كاس روز و 3كيسان ماء بارد و الملح
كي يغلي نقصي النار وخليه يطيب ختى ينشف واذا لقيتيه مازال قاسح زيدي شوية ماء
تقدري تستعمليه مع الدجاج وتسقيه بالصلصة
وتقدري ديري بيه سلطة يجي خفيف
طريقتي في تحضير طاجين الحلو
انا نديره بلا لحم على خاطر العايلة كاملة ما ياكلوش اللحم الحلو
في طاجين صغير ندير مغرف سمن او زبدة
مع فنجان صغير سكر وندير عليهم كاس ماء
شوية زعفران وعود قرفة و نجمة الارض وحبات هيل
ونخليهم حتى يبدو في الغليان نكون موجدا البرقوق و المشماش و الزبيب او اللي كان متوفر عندك وانا نزيد معاهم حبة تفاح مقشرة ومقطعة و ايجاص
وكي تشوفي هاذيك الصوص بدات تعقد نزيد عليها نص فنجان صغير ماء زهر و مغرف صغيرة فاني و نخليه يغلى شوي و نطفي
و عند التقديم نزين باللوز او الجلجلان المحمص
واحيانا نقطع حبة كيوي ونديره معاه رايحا تجي روووووووووووعة
نتمني نكون افدتكم ولو بالقليل ولي عودة انشاء الله باش نزيد وصفات اخرى
