تحليــة بالليمون في مول السيليكون 2024.

سلامي لكل وحدة دخلت لموضوعي البسيط

تحلية الليمون في مول السيليكون منعشة ، مكوناتها بسيطة وسهلة التحضير ، بريزونتابل /// في الاول شفتها في مدونة واحد السيدة و وحدة تاني دارتها هنا في المنتدى نسيت هزيت الفكرة والشكل لكن المقادير والمكونات من عندي وبطريقتي ،،، نشرع في عرض المقادير وكيفية التحضير

مقادير عجينة الصابلي :

125غ مارغارين طرية + 2 م ك سكر ناعم + رشة ملح + 1 صفار بيض + م ص زاست ليمون + 1 م ك نشا + ربع م ص خميرة + نلم العجينة بالفرينة /// نخليها ترتاح ربع ساعة في الثلاجة /// نبسطها بالحلال وتكون سميكة شويا مانرققهاش لأنها هي القاعدة /// نطبعها بطابع قطر دائرته قد قطر دائرة المول لي راح نستعملو كل وحدة ولمول نتاعها /// نطيبو في 180° /// بعد مايبرد ندهن الجوانب بالمعجون ونمرمد في نواد كوكو ونحط الحبات بجنب

تحضير الكريمة :

كأس حليب بارد

عصير حبتين ليمون واذا الحبات صغار نحتاج عصير 3 حبات

2 صفار بيض

3 م ك سكر

باكي فلون

3 م ك ونصف نشا

1 م ص مارغارين

_ نعصر الليمون ونصفيه ونخليه بجنب

_ نحط الحليب في كاسرونة وعلى نار متوسطة يسخن

_ في صحن نخفق بالفوي (صفار البيض + السكر+ لفلون+ النشا ) حتى يتجانسو مليح مع بعض

_ كي يسخن الحليب نصبو بالشوي على خليط البيض مع التحريك المستمر ،،، مبعد نردهم في الكاسرونة نرجعهم فوق النار متوسطة ونحرك بدون توقف حتى تخثار وترجع كريمة ملساء

_ نحط الكريمة ف،،، نغطيها بورق شفاف غذائي ي بول نضيفلها م ص مارغارين ونحركها باش تبرد شويا ونضيفلها عصير الليمون الصفى نخلط حتى تتجانس /// نعمر لي مول وكي نكمل نغطيه بورق شفاف غذائي ونحطهم في الكونجيلاتوغ باش تكون متماسكة مليح وماتديش وقت

_ عند التقديم نجيب الصابلي نحط فوقو شوي لاجولي باش تلصق الكريمة مبعد ونحاول ننزع قوالب الكريمة من لي مول برفق وتكون سهلة جدا كيعاد كانت في كونجيلاتوغ ونزينها ونردها للثلاجة حتى حين التقديم

هاهي جاهزة

ملاحظة صغيرة نصيحة بياض البيض لي يبقالكم استعملوه في المطلوع او خبز الدار راهو يخفف ، او ديروه موزانغ للأولاد

في أمان الله