و الصلاة والشلام على حبيبنا محمد -صلى الله عليه و سلم-
هذه اول مشاركة ليا في المنتدى و نتمنى تعجبكم
هذا بريوش عملتو هاد الايام و جاني هايل هش و بنين حتى اني ندمت اني عملت كمية قليلة هههههه
تفضلو المقادير
للعجينة نحتاج بيضه نصف ملعقة كبيرة سكر نصف ملعقة كبيرة خميرة الخبز ملح نصف كوب حليب دافي ربع كوب زيت و نجمع الكل بالفرينة لازم تكون العجينة طرية باش نحصل على خبز هشوش نعجنها بضعة دقائق
نخليها تخمر حتى يتضاعف حجمها انا كنت مزروبة فاستعملت طريقة الكيس المبلل بالماء الدافي باه نسرع عملية التخمار
في هاذ الوقت حضري الحشو لحم مرحي قليه في شوية زيت و داويه عادي بالملح و الفلفل و التوابل اللي تحبي و الثوم و الدبشة مقطعة و ادا حبيتي البصل انا ما استعملتوش خليه حتى يتحمر و لازم يكون ناشف من الماء طفي النار و خليه يبرد شوية
بعدما تخمر العجينة نزليها بيدك و اقسميها كويرات و ادا عندك ميزان اوزني الكويرات باش يكونو نفس الوزن و ادا ما عندكش اقسمي العجينة على 2 ثم 4 ثم 8 هكداىيكونو نفس الحجم تقريبا
اضغطي على كل كويرة باليد و اعدليها باش تجي دائرية و حطيها في سنيوة مرشوشة بالفرينة ثم خدي الكاس و اضغطي في المنتصف رايح يتكونلك فراغو في هذاك الفراغ حطي الكفتة حوالي ملعقة اكل يمكن اكثر او اقل على حسب الخبيزات تاعك و فوق اللحم المفروم دردري جبن مبشور انا ما كانش متوفر عندي مالا خليتهم دون اضافات ادهني الخبيزات بالبيض خليهم 10 دقائق او اكثر حتى يخمرو قليلا و دخليهم الفرن حتى يحمارو
شوفو عن قرب
و هنا قطعتها من المنتصف باش تشوفوها لداخل
ملاحظة هاد المقادير عملتي 8 حبات و الكيلة المستعملة هي الاكواب و الملاعق الخاصة بالطبخ
نتمنى تكونو فهمتو الشرح جربو الوصفة و ما تندموش باذن الله
ya3tik saha chatra
اممم ان شاء الله نجربها فهاد الأيام خفيفة للعشاء ونردلك الخبر
يعطيك الصحه يشهي اختي لوكان توضحيلي اكثر كتقطعي بالكاس تنحي العجينه اللي في الوسط ولا اللحم يجي ما بيناتهم النقطه هادي مافهمتهاش
|
المشاركة الأصلية كتبت بواسطة khadouj_1985
 ya3tik saha chatra
|
الله يسلمك اختي شكرا لمرورك
|
المشاركة الأصلية كتبت بواسطة simassim
اممم ان شاء الله نجربها فهاد الأيام خفيفة للعشاء ونردلك الخبر
|
انشاء الله تنجحي فيها بالتوفيق
|
المشاركة الأصلية كتبت بواسطة رمرومة الصحراء
يعطيك الصحه يشهي اختي لوكان توضحيلي اكثر كتقطعي بالكاس تنحي العجينه اللي في الوسط ولا اللحم يجي ما بيناتهم النقطه هادي مافهمتهاش
|
الله يسلمك اختي لا ما تقطعيش العجينة اضغطي عليها بالكاس مقلوب لما تهزي الكاس تلقاي الوسط نزل و الاطراف بقاو عاليين يعني تشكلت حفرة في الوسط نتمنى تكوني فهمتي اني نحوسلك في النات على صورة تشرحلك لاني ما صورتش مراحل العمل
|
المشاركة الأصلية كتبت بواسطة amira43100
الله يسلمك اختي لا ما تقطعيش العجينة اضغطي عليها بالكاس مقلوب لما تهزي الكاس تلقاي الوسط نزل و الاطراف بقاو عاليين يعني تشكلت حفرة في الوسط نتمنى تكوني فهمتي اني نحوسلك في النات على صورة تشرحلك لاني ما صورتش مراحل العمل
|
اوكي خلاص فهمتك مرسي وان شاء الله تزيدلنا من وصفاتك الدهبيه
روعة يعطيك الصحة
و الله يسلمك r@k
رووووووووووعة يعطيك الصحة
امممممممممممممممممممم يشهي شكرااا
ماشاء الله بارك الله فيكي تعرفي غير كيما عملت اخوتهم فالشكل تعرفي كي شفتهم تخلعت علابالي طارو عندك lol
سبحان الله و بحمده سبحان الله العظيم ..