انا في امس الحاجة 2024.

السلام عليكم
انا طالبة 2 ثانوي احس دائما بالاحباط والكره ودائما اتلفظ قول كرهت حياتي ولم يبق لي عيشة في الوجود . كيف لا وانا فتاة لدي حرية في التمتع بحياتي اتمنى ان يكون لدي هاتف نقال او شريك حياتي واعيش فترة المراهقة لكي لا اندم عليها عندما اكبر
احب ان تكون لدي الحرية المطلقة لا احد يتحكم في . فمثلا الهاتف النقال مابغاوش اهلي ايديروهولي باسكو يقولولي مازالني صغيرة وراني نعرف صلاحي في عمري 17 سنة كي نشوف صحاباتي عندهم كل شي كيما البورتابل الفيسبوك شريك الحياة انا نبقى نتفرج ونسكت ولا نبكي نبكي نبكي حتى الرقاد ما يجينيش
انا نعتبر سن 17 اصعب مرحلة عندي نلقى روحي متخبطة بين زوج شخصيات اه اه اه
لراني في امس الحاجة اليكم والى نصائحكم وجزاكم الله خيرا

يا اختي ننصحك ان تعيشي هاته المرحلة بكل صفاء و حاولي ما تكثريش من الاخطاء باه كي تكبري ماتندميش و ساعتها عمرو الندم ما رح ينفعك انتي راكي حابه تتمتعي بهاد المرحلة بكل ايجابياتها و سلبياتها لكن حاولي تدي منها الايجابيات اكثر فمثلا الشريك الي راكي تحكي عليها هو اكبر اغلاط هاته المرحلة و رايحه تاثر عليك بشكل اكبر في المستقبل هدا غير المشاكل الي رايحة تصادفيها بسبب هاد العلاقات و سمعتك الي رايحة تخسريها فكري مليح و اخطيك من هاد الافكار السيئة و حاولي تعيشي هاد السن بعقلانية اكبر

اختي عندك الحق انا كي قريت واش كتبتي تفاجات انا تاني 17 كيفك عندي كلش اي واحد لازم عندو الحوايج هادي بورتابل فيسبوووك …..ميكرووو.. ماماك وباباك مزيرين عليك اكتر من الازم …….. واش ديري الله غالب ربي يكووون معاك

اقتباس:

المشاركة الأصلية كتبت بواسطة ikram-koukou اختي عندك الحق انا كي قريت واش كتبتي تفاجات انا تاني 17 كيفك عندي كلش اي واحد لازم عندو الحوايج هادي بورتابل فيسبوووك …..ميكرووو.. ماماك وباباك مزيرين عليك اكتر من الازم …….. واش ديري الله غالب ربي يكووون معاك

wallah vous les filles ta3 akhir azamane
normalement tethalaw bekrayatkoum bark
no comment!!!!!!!!

شريك الحياة انا هذا الكلمة مافهمتش نيشان واش معنتها واش راكي قاصدا بيها.اما على البورطابل قوليلي حنونة معامن راكي باغية تهدري صحاباتك كل يوم راهم مقابلينك و ماضنيتكش تقراي بعيد يخافو كاش مايصرالك و يتقلقو عليك .الفايس بوك هذا رانا دايرينو على جال الهدرة و انتي راكي تقراي كون تريحي فيه راح تضيعي قرايتك.ماليك ماشي ماراهمش فاهمينك و لا راهم مزيرين عليك ماليك خايفين عليك سوغتو كي راكي في هذا الاج .امالا تهلاي في قرايتك و خليك من البورطابل و من الفايس بوك و من شريك الحياة و ماتخمميش بزاف خلي عقلك غير في قرايتك

السلام عليكم

بالعكس والديك ما راهمش مزيرين عليك والديك لازم تشكريهم راهم شايفينك جوهرة و محافطين عليك

خاصة من كلمة شريك الحياة ختي لازملك تتلهاي بقرايتك ،نتي لي راها غايضاتك كي صحاباتك عندهم

ونتي ما عندكش والبورطابل والفايسبوك غير بالبسياسة وديري كلشي هادي مرحلة وتفوت وديري ربي

في خاطرك ونقولك كلمة مكاش لي يخاف عليك ويبغيك كيما والديك كلام الناس خليه موراك

اقتباس:

المشاركة الأصلية كتبت بواسطة ikram-koukou اختي عندك الحق انا كي قريت واش كتبتي تفاجات انا تاني 17 كيفك عندي كلش اي واحد لازم عندو الحوايج هادي بورتابل فيسبوووك …..ميكرووو.. ماماك وباباك مزيرين عليك اكتر من الازم …….. واش ديري الله غالب ربي يكووون معاك

لالا أختي ديها في قرايتك خيروسمعي لوالديك …عيشي وقتك normal ويجي نهار اللي دريهم ماتخافيش …وماتحتاجيش شريك ولا صاحب ça veut dire quoiماعندكش كامل هذ الأشياء …لازم تكون عندك ثقة في النفس وكبرياء أما الأشياء اللي ذكرتيها راهي ثانويات وقشوروفساد، المهم كي يكون رأسك مرفوع بالعلم والثقافة ماشي الشكي والرأس فارغ …الله يهديك أختي .

السلام عليكم ورحمة الله و بركاته
اختي العزيزة انتي طالبة ماشاء الله في الاول نقلك بلي انت فحلة علاش لانو عندك صراع داخلي انتي تصديه بقوتك وباش ما تخيبيش امل والديك فيك الله يثبتك و تبقاي هاكذا رايحة تسمعي البنات يقولو عليك معقدة و حابسة كامل فتنا عليها و واحدوخرين يقولو 17سنة تبع والديها و كافية وخلي برك صح عندك 17سنة ماشي متعرفيش صلاحك بصح نظرا لقلة الخبرة تقدري تغلطي روحك بنيتك تنوي حاجة مليحة تبانلك من بعد ضري روحك بيها
والديك يخافو عليك ماشي مزيرينك و البنات مادابيهم تكوني غلطانة كيما هوما باش ما يحسوش بالنقص كي شوفو واحدة مربية كيما انت
ديري في بالك الحرية ماشي كي نلحقو 18سنة الحرية مقيدة بحدود تاع ربي سبحانو
يكون عندك شريك مثلا علابالك بلي كي تزوجي يولي عندك شريك وغير ذلك ………………………. بلا مانقولك واعتقد انو المراة تقدر تكون فرحانة بلا شريك و انما دبري صديقات يكونو مربيات تقراو كيفكيف و يجوك للدارولا تعلمي قران في المسجد او احضري دروس ولا حاولي تروحي للجمعة تتبدل افكارك وتولي تشوفي بلي الدنيا بالطريقة الصحيحة
الهاتف النقال مليح كي تسحقي صديقاتك او اهلك لكن من الواضح ان استعمال الهاتف اصبح من اجل التكلم مع الشباب لما لا تقدر الفتاة على الخروج و فمن الهاتف يبدء الابتزاز فكمن فتاة عاقلة اتصل بها شاب و كلمها بكلام جميل حتى اوقعها في حبه وبعدها يسجل المكالمات ويبعثها ويهددها ان لم تطعه ان يخبر اهلها فتخضع له لا تقولي لي تعرفي صلاحك هذ الذئاب ما تقدريش تسلكي منهم عندهم دخلات و خرجات و يقدرو يجبدوك ليهم عن طريق فتيات هذي تمد الرقم ديالك زكارة و هذي حابة تتمسخر بيك ويسمعوك و الله يا اختي انا نصحك ما ديريش هاتف افضل لك واحدة قريبتي 21سنة باباها صعيب دار هاتف للبيت و هي تاخذو تهدر بيه مع العائلة و صحاباتها برك و في الليل باباها يديه عندو بعد مدة تمسخرت بيها وحدة و دارتلها مشاكلاما عن الفايس بوك واش نقولك انا عندي 28 ماعنديش فايس بوك و ما نحبوش فيه غير القرع و كلمة جيب كلمة احيانا بالفائدة وغالبا بال فايدة انما باب للوقوع في الاخطاء لكن اذا فتحتو كاش نهار باذن الله باش ندير شي يصلح ماشي للقصرة جارتنا قدك يماها منعت عليها ماشي فايس بوك الميكرو كامل واش تقولي ههههههههههههههه شافت بنتها رايحة ضيع بالاخير اعترفت لي قاتلي بلي عندها ماما الحق
اختي الحبيبة احمدي ربي على كل نعمة و حاولي تكون حياتك من صغرك مافيهاش غلطات وتكوني امراة صالحة محجبة مقيمة للصلاة ذاكرة لله و اياك و الفراغ لانه سيجعلك تفكرين باشياء غير مفيدة وانشاء الله ربي يرزقك زوج صالح يكون اول رجل في حياتك احبه قلبك
ااكد لك انه بعد مدة سوف تنضجين اكثر و كل ما هو محضور الان يصبح مسموح لك به و تكرهي منو بصح اصبري وركزي على قرايتك وديري في بالك احنا مسلمين و حياتنا في الثانوية ماشي كيما المسلسلات الامريكية وغيرها اقراي و تمتعي بوقتك واخرجي مع صحاباتك بعد موافقة الوالدين وكلو في الحلال
طولت عليك حبيبتي تهلاي في روحك انت لؤلؤة ما تكونيش ساهلة انما معقدة حابسة خير بالنسبة للحابسين المهم انت تعرفي واش تكوني و ما تزعفيش عليا نحبلك الخير كيما نحبو لنفسي وماشي لازم تغلطي باش تتعلمي اذا تبعتي نصيحة توفري على نفسك الوقت و التخمام .سلام اكرام

فكرتيني في روحي في هاد السن كنت عصبية بزاف وكارهة كلش بصح ديري في بالك بلي راهي فترة وتفوت و تفكري بلي ربي نعم عليك بصحة والعافية وبيت راكي عايشة فيه و باكل راكي تاكليه وباهل يخافو عليك و عندهم الحق الوقت راهو صعيب و اعرفي بلي كاين ناس راهم مشتاقين حتى لقمة ويتمناو يكون عندهم اهل يخافو عليهم..عيشي هاد الفترة و انتي فرحانة لاخاطرش واحد ما هو عارف واش الدنيا راهي مخبيتلو

ابنتي واختي الصغيرة انت جديدة على هذا العالم لتفهميه
انت خروف يسير في غابة قد تجدين فيها ارانب ظريفة وسناجب جميلة وعصافير مرحة ولكن لا ترين ان وراء كل شجرة او صخرة يختبئ ذئب
اياكي من السير في الاتجاه الذي لا تلمين عواقبه
اذا رايتي كل الناس يخطئون هذا لايعني انكي تتتبعيهم
تذكري صغيرتي انكي خلقتي لتصوني جسدكي بلبس يستره من ضعاف النفوس الطامعه في نهشه بكل شراسة
وانت ملزمة بتقوى ربكي وذلك حفاظا على نفسكي من الوقوع في الفواحش التي نهايتها انكي تعذبين في قبركي وتحرقين في نارجهنم
انتبهي لدراستكي واجتهدي في طلب العلم ولا تذهبي الى بئر مغلق فيدفعكي الفضول لرفع غطائه فتقعين وتغرقي
الفيسبوك والموبايل كانت سببا في وقوع ااالاف الفتيات في شراك الذئاب

السلام عليك اختي
اولا انا صغيرة عليك بسنة فقط و انا تاني مكانش عندي بورتابل و لا فايسبوك و كنت نغير من صحاباتي ..و لكن قررت باش هاديك الغيرة و الحزن و الكره نخرجه في القراية ايا بديت نقرا مليح و نجيب معدل 16..17..18 حتا والديا فرحو بيا و هوما ارواحم شراولي بورتابل و الغالي قاع و كانت مفاجئة ليا …انا ننصحك تهتمي بدراستك و تفرحي والديك و طيعيهم بارسكو هوما يعرفو صلاحك
*اما بالنسبة لشريك الحياة فهدا موضوع بعييييييييييد لازم ماتفكريش فيه بارسكو مازلتي صغيرة و ربي راه كتبلك واحد(ابن ادم) على حساب نيتك تعيشي معاه في الحلال
شكراا لكي اختي و الله يصبرك

شكرا لكم جميعا وبارك الله فيكم وجزاكم الله خيرا ساسال الله ان يوفقني على ان اعمل بنصائحكم
ادعولي معكم

شوف آآآآسيدي واش حابة ما فهمتش مليح ؟؟؟

معليش في الاخير ستبقون انتم الحلقة الاضعف …وستدفعون الثمن غاليا لوحدكم …ولن يشفق عليكم احد ..فقط تحملوا مسؤولية اختياركم …