السلام عليكم
هذي مدة و انا حابة نفرغ قلبي و لكن أتراجع و اليوم حبيت نسرد حكايتي أو بالأحرى مشكلتي لي مر عليها شهرين و مزالت تحرق و تقطع لي في قلبي ، كتب المكتوب و عرفت شخص ما شاء الله بعد ما فقدت الامل في الزواج في مدة أسبوع جاب أهلوا لدارنا بعد ما سقسى على أهلي و يماه كانت هي و ماما صحبات الحمد الله الناس كلها شكرت عايلتي و هو لي قال لي بعظمة لسانو الناس شكرتكم و حتى يما شكرتكم تفاهمت معاه على كل شي على صغيرة و على الكبيرة و هو بالذات قال لي كامل واش تمنيت كاين فيك لازم نجي في أقرب وقت باه العرس يكون في اقرب وقت انا صراحة حبيت الشخص بالرغم من انني عمري ما شفتو ولا سمعت بيه و لكن اسبوع كان كافي باه نتعلق بيه ، السيد لما جا لدارنا عاود مدحني و كا ن يبدو متفاءل بعد ما راحوا لدارهم عيطتلوا و قلتلو كيفاه ؟ واش قالوا الدار ؟ قالي ما نهدرش معاك و لي هي نقولها لباباك و هذي اول صدمة ليا بعدها بايام راح لبابا و قالوا ما كتبش ربي الوالد تاعي ما حوسش يعرف اعلاه ؟ مباشرة قالو الخير فيما اختاره الله
أنا ماقدرتش نعيطلوا و نقول واش هي السبة ؟ اذا عرف السبب بطل العجب ، بكييييييييييت و بكيييييييييييت لعلني أنسى ما حدث و لكن السبة لي ما خلاتنيش ننسى هو اني ماعرفتش السبة
البارح تلاقيت مع وحدة فاميلتي و قالت لي سمعت بفلان خطبك و رانا نستناو في العرس تشوكيت و قلتلها ربي ما كتبش لأن السيد هذا كي حب يخطب راح سقسى الزوج تاعها و انا كنت دايرة في بالي فاميلتي ما سمعتش امبعد قالت لي كون عيطتي و عرفتي واش السبة قلت لها انا ما نقدرش نعفس في راي بابا و صحبتي تاني قالت لي كون عيطتي و هذا كبرياء كي ما عيطتيش و لكن راني ندمانة لي ما عيطتش و عرفت السبة بلاك كون عرفت السبة كون راني نسيت
كلامو مزال في وذني ما قدرت ننسى كلامو و لا صورتو نوض نص الليل نلقى روحي نخمم فيه ، قاعدة ناكل نلقى روحي نخمم فيه غير نقعد يروح عقلي معاه يصوني تليفوني نولي نفيبري و نقول بلاك هو
مرة نحتسب و نوكل ربي و مرة نبكي أعلاه هكذا ؟ على الأقل كان يقول لي السبة
النار راهي شاعلة في قلبي ، الناس تنجرح و جرحها يبرا انا راني حاسة قتلني
ادعوا لي ربي يفرج عليا لقد تقدم بي السن
السلام عليكم
تعريفين لما لا يفارقكي الموضوع لأنكي انتي لا تريدين النسيان ………..
ضعي في نفسك يقين واحد هو ان الله عز وجل أختار لي أحسن منه …..عادي جدا
لكن عزيزتي لا تري الموضوع هو ظلم لكي لأنه من حقه الرجوع عن الخطبة مثل ما هو لكي هذا الحق …و لو لم يبين السبب هفذا حق مشروع لكليكما
وفقكي الله عزيزتي
و عليكم السلام و رحمة الله و بركاته
اختي ما تتصدمي ما والو راهي صارت لامود يخطبو و يبطلو مع العقد و الا يترطو و بعد الموافقة و التفاهم يتراجعووا بلا سبة
انتي ما يهمكش و يعطيك الصحة لوالدك لي ما حاولش حتى يفهم و قلو بالسلامة
قولي الحمد الله صراتلي و والدي حي و واقف و ان شاء الله ما يخلي حتى واحد يذلك و والدك احسن الرد
انتي اذا بقات في قلبك حاولي تخلي قريبتك تخلي زوجها يسأل لي كان راح يخطبك علاه بطل و في كل الحالات انساي … انتي راكي تخمي في عمرك و هذا لي زاد عليك
لا لا اختي الرزق على ربي سبحانه و الزواج رزق
لي يمد كلمة لازم يكون قدها
صح من حقو هو و غيرو ينسحب اذا ما عجبتهمش الفتاة مي ماشي يقول كلمة و من بعد تبانلو حوايج اخرى
يا اختي ربي يرزقك من اوسع ابوابه …. الراجل بكلمته و بلا كلمة ماع ندك ما تديري بيه
ربي معاك و يعوضك بما خير عاجلا غير اجل امين يا رب
الخيرة فيما اختاره الله ما تقلقي روحك ماوالو وان شاء الله ربي يبعتلك ماخير
اختي لا تستغربي الان اصبح الشاب يخطب في كل الجهات و يحاول يشوف الافضل و او لا ادري عما يبحثون الا من هو رجال باصح معنى الكلمة
اذا هو اختارك من بعد تراجع في قرارو يقدر تكون لسبب فيه شخصيا و ليس فيك المهم انه لم يطيل الانر و تكلم مع الوالد .اختي لازمك تحطي في بالك انو اكيد فيه خير و لي صرالك مقدر و فيه حكمة لا نعرفها
اذا حبيتي تنساي كلما تتفكريه استغفري و اكثري
بلعقل ان شاء الله ينشغل بالك باشياء اخرى و تبقى ذكريات فقط بدون ألم لان الخاطب اذا ماعرفش قيمة خطيبتو او راى انه لا يليق بمقامها فالافضل له الانسحاب وهذا له فائدة للفتاة
اختي الدنيا نتعرضو فيها لصدمات من جهات مختلفة لذلك تحلي بالصبر و الشجاعة و كثير من التفكير بالواقعية و الايجابيه
عرفتيه مدة اسبوع وهذا ردة فعلك.ماذا لو عشتي معاه وقالك نوضي نديك لدار باباك راكي مطلقة.وش تديري.لازلت صغيرة بنيتي
السلام عليكم
أختي قد نتعرض لأشياء و أحداث كثيرة من طرف الغير و لا نفهمها، و البحث فيها أحيانا يكون ضربا من الجنون لأننا و ببساطة ندخل متاهة الاحتمالات مع غياب الاجابة الصحيحة عن الحقيقة، لكن يبقى الأكيد أن هذه هي الحياة و نحن في امتحان دائم، لذلك تقربي من الله اكثر فأكثر ليوفقكي في امتحان الدنيا وكلما تذكرتي قولي فقط الحمد لله اني رضيت بما قسمته لي يا رب، و تذكري أن الله هو الادرى بأحوالنا فيختار لنا سبحانه و تعالى ما يناسبنا، ادعو الله أن يرزقك بالزوج الصالح،و قريبا ترجعي تفرحينا و تكتبي في قسم التهاني باركولي، وفقكي الله لما فيه خير.
وانت صدمتى ثم لم تتعلمي
اين اقتدائك بأبيك لمذا لم تقولي مثلما قال
او قولي قدر الله وما شاء فعل
لا اقول ربما و ربما وربما واخلق لك اعذارا
لكن اقول كوني محافضة على نفسك
كي لا يجرجك اي كان واستعيني بالصبر والصلاة
وأكثري من الاستغفار كلما تذكرتي هذا الشخص
واعلمي ان ما كان لك لن يصيب غيرك
وما كان لغيرك لن يصيبك ولو فعلت كل شيئ
والله المستعان
الله يفرج عليييييييييييييييييييييييييك
حكايتك جات بسرعة لذلك انتهت بسرعة أسبوع واحد واتصالات بينك وبينه لا يجوز لك ذلك أختي هو لم يكن زوجك حتى تسأليه عن رأي أهله فيكِ
من الآن وصاعدا حافظي على نفسك ولا تحسبي أن تساهلك وتعاطيك مع الشباب بالكلام أو الاتصال سيُسهّل الزواج عليك
الزواج رزق لا يُنال خيره إلا بطاعة الله فمن أرادك فليأت من الباب ولا يتصل بك أساسا وبعد العقد لكل حادث حديث أما الخطبة فهي وعد بالزواج فقط ولا يترتب عليها شيء بين الطرفين .. ربي يعوضك بمن هو خير لك
ناس ما تحشمش …ايجيب دارهم ويطلع ويهبط وامبعد ابطل بقولها لباباك مباشرة بدون حياء ودون مراعاة لاي شعور لدى هاته الفتاة واهلها …يا اخي مهما كان سبب الرفض كان واجب على الرجل تقصي كل الامور قبل الاقدام الرسمي على اي خطوة ..ياخي ربي عطالك عقل ماكش دابة فوق الارض …اجي اتحل روحك وتستقهوى والناس اترحب بيك واجيب معاك اهلك يسكانو فالمخلوقة وكانها سلعة معروضة ..وامبعد تطلق راسك كي شغل مكان والو …قمة الحقارة والدناءة في هدا السلوك …ونصيحة لاي شاب مقبل على الزواج ما اتحطش الفتاة واهلها في هكدا موقف وتقصى كل الامور من قبل واتكل عل ربي …عموما ربي يرزقك بواحد خير منو ان شاء الله
لا تستغربي يا اختي شباب اليوم ولات عندهم موضة يططبو من دار لختها اسئل الله ان يستر و يرزق جميع بنات المسلمين ازواج صالحة
عزيزتي يبدو انك غير متعودة على العلاقات وطريقك مستقيم لذلك تحسين بالانهيار وجرحك لازال عميق المهم يمكن ان يكون لاهله دور في رفض استكمال الخطبة ,,,,المهم باذن الله وبعد شهر فقط ستعرفين لم تم الرفض وستحمدين الله كثيرا لانه ازاح هكذا رجل عن طريقك ,,,,,,عوضك الله خيرا منه ,,,,والحياة تجارب