الدين أو الحب ، ماذا تختارين؟ 2024.

السلام عليكم ….. صح رمصانكم و ان شاء الله ربي يقدرنا على العشر الأواخر

كما هو واضح من العنوان,,, ملخص القصة اني فتاة أكمل في دراساتي العليا، ,,
محتارة بين موضوعين …عرضي زواج
الأول انسان يحب الدين، يصلي في المسجد لكن ليس دائما، مقبول الشكل ، وله مستقبل ، عائلته عائلة بسيطة، و لكن اباه حاد الطباع ,,, حالته المادية معدومة ,,,, لكن يأمل في العمل بعد التخرج خاصة وأنه انسان موهوب في مجال دراسته ، طلب مني قبل 6 أشهر أني ننتظره حتى تتحسن ظروفه ,, وانتظرته لكن لكثرة العروض كان لازم يجي ويهدر مع الوالد,, بعد رمضان,,, شاريني كيما يقولو والله أعلم

الثاني انسان دينه وخلقه أحسن بكثييييير ,,,, من أهل القرأن و المسجد ,,, يدرس و يعمل وهو أيضا موهوب في دراسته ,,,حالته المادية لا بأس بها ,,, انسان جميل و ترتاح له النفوس ,,, طيب جدا ,,, لكن لا اعرفه ,,, والحكاية انه ناس نعرفوهم اقترحوني عليه واقترحوه غلي

محتارة بين الموضوعين ,,, خاصة وأني وعدت الأول أني سأقبل به لما يتقدم للوالد و أني سأنتظره لحين تحسن ظروفه

ودرك راني عارفة اني نحب الدين بزاف ، وأنه هو الاساس باه نتفاهم مع زوج المستقبل ,,,,, ولكن كيما يقولو " تزوجي اللي يبغيك,,,,"

اشيروا علي برأيكم ,,,, راني في حيرة ،و لا تنسوني من دعائكم

اللي قالك الحب راه كذاب
انا اختار الدين لان الدين مناه حب الله ورسوله
تقبلي مروري

اقتباس:

المشاركة الأصلية كتبت بواسطة bibimoto6 اللي قالك الحب راه كذاب انا اختار الدين لان الدين مناه حب الله ورسوله تقبلي مروري

بارك الله فيك ,,,, وتحياتي

اقتباس:

المشاركة الأصلية كتبت بواسطة بسمة تحدي يا اختي اولا ارتكبتي خطأ انك وعدتي الاول بالانتظار والله هذا اكبر خطأ نديره حنا البنات وش يمكن الاول راح يتغير عليك يمكن والله رني نهدر وعن تجربة شفتها في حياتي متدري يجي يوم ويقلك خلاص تربحي يلقى وحدة اخرى احسن منك يخليك متدريش ثقة في حى وحد غير في ربي سبحانو يا اختي اذا راكي على علاقة مع الاول اقطعيها وتوبي لربي سبحانو واكثري من الاستغفار وتاني خمي بالعقل وماشي بالعاطفة هذا مستقبلك الزواج سجن اكثري من الدعاااء وقولي ياربي فوضتلك امري خيري ولا تخترلي موفقة حبيبتي

ربي يحفظك أختي ,,,, و الله كلماتك راهي تعبر عن الحالة بالتدقيق

العلاقة بيني و بين الأول ديما نحاول نحيطها بالشرع,,, بصح الخطأ يبقي خطأ ,,,, ولطالما يحد النقاش بيني وبينه من أجل أني أنا منحبش يتصل …. لأني أولا تحوس على رضي ربي ,,, و لأني عارفة اللي يحب الحلال باين الطريق ,,,, وكل مرة نقطع الاتصال ، ما يفوتش أسبوع و يرجع الاتصال من أجل أي سبب.

راني والله تائبة الى الله ، و ربي يعفو علينا …. لأنها كانت أول مرة في حياتي ,,, و ربي يتوب علينا و يتقبل منا التوبة

بارك الله فيك أختي ,,,,

لوكان طرحتي عليا هذا السؤال قبل ان اتزوج لاخترت بكل تاكيد الحب
اما الان ادركت ان الدين اهم من الحب
لان المتدين يمسك باحسان او يسرحك بمعروف والدين لا ينتهي الا بانتهاء الشخص ذاته ام الحب مكانه القلب والقلب يتقلب وعندما ينقلب عليك من احببته تسود الدنيا في وجهك وتخسرين الدنيا والاخرة معا

اقتباس:

المشاركة الأصلية كتبت بواسطة بسمة تحدي اختي من شرط وصدق التوبة هي الاقلاع من الذنب رني فهماتك يا اختي على الخط والله متقوليش تبت وانتي مزالكي تهدري معاه لالالالالالالا والف لا تاكدي يا اختي لو تكملي في كلامك معه راح ينزل غصب الله عليك وراح يبتليك والله انا من راي انك تغيري رقمك وتصدقي التوبة لله وتخليها على ربي سبحانو والله رني نهدر من قلبي ورني نحبلك الخير شرعاااااااااااا لا يجوز يعني لا يجوز اقعدي مع روحك وخمي مليح وراجعي مع نفسك وتاني متتلعبيش بمشاعر تع هذا الانسان الاول اذا شفتي متكلميش اقطعيهالو ومتتسمخريش بيه

الحيرة أختي راهي هلكتني

والله لم اقصد يوما أني أتلاعب بمشاعر انسان ,,, لكتي اختي لم ار منه الدين الذي يجعلني اتمسك بيييه ,,, و الله نتمني يقول لي مانزيدش نكلمك ,,, راني نخاف غليك من روحي ,,, لكن للأسف,,, ديما يسترسل ,,, و كي نذكرو ,,, يقول صح … ولكن ترجع ريمة لعادتها القديمة

واش جعلني نحير بينو وبين انسان آخر غير اني حابة نعيش مع واحد يقكرني بالقرآن و بالدروس … و يوجهني و يعلمني في ديني ,,, لكن وعدي ليه اصبح قيد كبييييييييرررر

اقتباس:

المشاركة الأصلية كتبت بواسطة زهورالفل لوكان طرحتي عليا هذا السؤال قبل ان اتزوج لاخترت بكل تاكيد الحب اما الان ادركت ان الدين اهم من الحب لان المتدين يمسك باحسان او يسرحك بمعروف والدين لا ينتهي الا بانتهاء الشخص ذاته ام الحب مكانه القلب والقلب يتقلب وعندما ينقلب عليك من احببته تسود الدنيا في وجهك وتخسرين الدنيا والاخرة معا

والله هذا ما أخافه أخيتي ,,,, بارك الله فيك على رايك ….

اقتباس:

المشاركة الأصلية كتبت بواسطة (الانسان الوفي) السلام عليكم ………..دائما ادخل المواضيع فأجد كلمة الدين التي يستعملها الكثير هنا …ووالله لا أعلم ما هي وما مغزاها …وكيف نعرف أن هذا انسان ذو دين او لا …أمجرد انه يدخل المسجد يعني انه متدين ؟؟ أم لمجرد حفظه القرآن يعني أنه متدين ؟؟ أم لمجرد أنه ملتحي أنه متدين ؟ الدين اكبر من هذا أختي الكريمة ..الدين هو الخلق …ان أردت تجربة دين الرجل فما عليك الا بقصة عمر بن الخطاب …الدين معاملة وحب واخلاص ووفاء وبشاشة …ان كان فيه كل هذه الخصال فهو متدين وان لم تكن فيه فهو غير ذلك ..أختي ليس المرء بمدى حفظه للقرآن ولا للمتون ولا لدخول المسجد *خصوصا في هذا الزمن* اتمنى أن تختاري الذي يرتاح له قلبك فالأرواح جنود مجندة ما تعارف منها أأتلف وما تنافر منها أختلف …شكرا

الصراحة أن الانسان الثاني هذا من اصحاب المسجد منذ الصغر,,, ومن معاملاته انه طيب جدا و انه جدا ودود مع اصدقائه … والعائله التي عرفتني على موضوعه من احسن الناس معاملة وطيبة في هذا الزمن ,,, و الله ترتاح له النفوس ,,,, له سجايا ترتضيها كل فطرة سليمة …. ان شاء الله خير بوركت اخي

اقتباس:

المشاركة الأصلية كتبت بواسطة (الانسان الوفي) اذن على بركة الله …الاستخارة وربي يجمع بينكما ……..

بارك الله فيك اخي الكريم ,,, لكن الوعد الذي قطعته هو ما يقيدني ……… تحياتي

استخيري المولى عز و جل و اتخذي قرارك

سمحيلي يا اختي

كون كنتي تحبي الاول و الله واحد ما يغرك باينة كنتي جايبة بيه الوقت حرام عليك

لالا و زدتي وعدتيه هو بالاك او قاتل روحو باه يرضيك

و الله عيب

الغلطة الاولى ما نحكيوش فيها بويسك علابالك حرام العلاقة بين الراجل و المرا

الغلطة الثانية انك قارنتيه بواحد اخر و ناوية تتخلاي عليه

قوليلي برك كيفاه رايحا تقوليهالو

و الغلطة الثالثة راكي تقولي الثاني مدين رايحا تتجراي و تقوليلو على الاول

و تبداي بالكذب معاه

راكي غالطة من الاول للاخير

صفي نيتك يبانلك الصح

الله يهديك و ينورلك طريقك

سمحيلي بالاك زدت فيها مي هادا واش راني نخمم