تقدمت الى خطبة فتاة منذ اسابيع قليلة وتمت الموافقة ولله الحمد بكل يسر وانا حاليا احضر نفسي للعرس…………لكني اصدمت بمشكل الهاتف لاني لم اتكلم مع خطيبتي منذ اللقاء الشرعي لقناعة مفادها ان الهاتف يسبب مشاكل كثيرة وانا انوي المحادثة بعد العقد الشرعي اي قبل شهر من الزفاف ……………………… لكن كيف اقنع خطيبتي بذلك لان كل الشباب في وقتنا يبداون الماكالمات حتى قبل الخطبة وانا احمد الله ان من علي بخطبة تقليدية واتمنى تواصلها الى الوصول الى بر الامان ………..وللاسف باد تصلني الاحدايث لماذا لم يكلمها هل هو غير مقتنع بها الى الكثير من الكلام الذي اخشى ان يفسد خطبتي
اصبر عليها وافرت حتى تعقد ساعات عيطلها فى بورتبال ختها والا اقراء عليها الفتحة عند الشيخ او حبس ما تعقدش عند البلدية حتى تعرف عقليتها
جميل وجيد جدا ما تفعله أخي الكريم
حاول توصللها عن طريق أهلك فكرة رفضك للهاتف بسبب عدم جواز ذلك إلا بعد العقد الشرعي أو المدني
إن كانت فتاة مطلعة على أمور الشرع سيعزز هذا مكانتك ويكون زواجك أنجح بإذن الله ربي يوفقك وييسر أمورك
أخي قناعتك لا يجب أن تتأثر باقوال الاخرين
خليهم يقولو واش يحبو لانهم بكل بساطة مراح ينفعوك ولا يضروك
هي حياتك وانت مشيها بقناعاتك لا افكار الاخرين
السلام عليكم اعتبر كلام ناس مثل مقولة دخلت في اذني اليمنى وخرجت من اليسرى لا تهتم بكلام ناس ومراقبة… فقط ابق مع هدفك والله يرزقك العشرة الزوجية والهناء وذرية صالحة ان شاء الله
انا مع كل احترامي لكم ضد فكرتكم الزمن تغير وصار ضروري الكلام قبل الزواج جد مفيد اسأل مجرب انا تحدث مع زوجي منذ الخطوبة وصدقوني تناقشنا في عدة مواضيع ومسائل فادتنا يوم الزواج الحديث مع الخطيب مش ضروري يكون مثل ما تعتقدون الحديث في مسائل الحياة جد مهم والله يا اخي عن تجربة هناك امور لازم تتناقشو فيها من اليوم افكار في راسك وراس خطيبتط اكيد عندكم اسألة عندكم فضول وراح يصير مخالافات لكن راح تتحل والجميل انك تكونو تفهمو بعضاكم قبل الزواج هذا يخليكم في غنى عن مناوشات في الزواج لا تهتم افعل الشء المقتنع بيه فقط
صديقتي عملت مثلك ولم تتكلم مع خطيبها قبل الزواج قنعتها لكن دون فائدة حتى بعد العقد لم تتكلم معه ولما تزوجت انصدمت بافكارو واهلله وصار مشاكل مالها اول من اخر والنتيجة طلاق و ببنت ضروري تعرفو عقلية بعضاكم حتى لا تشعر انك انخدعت ولا هي تشعر انها انخدعت
كلامي نسبي وانت ادرى بحياتك وتصرف بقنعاتك فقط وربي يتمم الزواج ويعطيك ايام كلها سعيدة
شكرا لمروركم جميعاااا …………….يبقى الشيء الذي نعاني منه هو المقارنة ……….تقولك البنت علاش اختي جارتي صحاباتي كامل كانو يحكيوا غير انا ……………..طرحت القضية على احد اصدقائي الاعزاء فكان جوابه : دير كيما جارك والا حول باب دارك……….
والكثير من المحيطيين بي يحذروني من ان تفسر خطيبتي اعراضي عن الهاتف اني اخفي شيء ما وا تعنبره انتقاصا من قيمتها عندي……………….. صراحة موضع يؤرقني كثيرا…….ان شاء الله نصيبو الحلول اللازمة اللي ترضينا جميعا
أخي كل الكلام يكون بعد الزواج أما قبله فلا فائدة منه.
أنا لا أقول لا تتكلم معها ابدا و انما تكلما في الضروريات فقط.
أما الانسان لي يقلك ديرا كيما الناس قولو يا اخي انا اللي رايح نزوج ماشي الناس.
ماشي كل الناس كيف كيف ديرها قاعدة في راسك.
نصيحة لكي ترتاح من كل هذا قم بتعجيل موعد العرس.
بارك الله لكما اخي مقدما و جمع بينكما في خير.
أستغرب ممن فعل هذا ويطالب كل خطيبين بالتواصل بالهاتف!!
أخي حافظ على دينك والهاتف لا يأتيك منه خير إلا ما رحم ربك
فهم هذه الخطيبة وجهة نظرك وحكم الشرع في الموضوع وإلا عجل بالعقد الشرعي ان أردت الحديث معها للضرورة
ربي يوفقك
اولا ربي يتمملك بخير اخي
ثانيا
لا تهتم لكلام الناس
دير واش تحب انت موش واش يحبو الناس
و بخصوص خطيبتك
ادا عندك اختك قوللها تحكي معاها و تشرحلها وجهة نظرك
و هي اكييييييد رايحة تفهمك
ثالثا
انا ايضا كان زواجي زواج تقليدي
او كما يسمونه الان // زواج الصالونات //
او كما اسميه انا // زواج العائلات موش الزنق //
المهم يوم الرؤية الشرعية سألني زوجي
تحبي نعطيك لو نوميرو دو تيليفون ديالي و لا حتى من بعد؟؟؟
انا قلتلو
الان ما يجوزليش نحكي معاك لانك اجنبي عني
و بعد العقد الشرعي ان شاء الله يسهل ربي
و كان كي يحتاج يسال على اي شي تعيط يماه لعندي و تحكي معاها ماما موش انا
و بعد العقد اعطاني الرقم ديالو و رجعت نحكي معاه و يعيطلي و نعيطلو
مي في الحقيقة
انا ما عرفتش شخصيته جيدا حتى بعد الزواج
لانه حنا مهابل ما كناش نحكو على حياتنا بزاف
و انما كنا نحكو على المقرئين و المشايخ و الشمائل المحمدية
و المجتمع و على صغرنا وعلى مغامراتنا و هكذا
لم نتحدث عن انفسنا كثيرا
لانه قالي
حتى و نحكيلك على روحي ما راحش نقولك انا ماشي مليح
كي تعيشي معايا تعرفيني
و انا قلتلو
علابالي لانه كما يقال
الخطاب رطاب
و كيما قالتلك الاخت لازم تحكو باش تعرفو بعضاكم
نقولك؟
جاااامي رايح تعرف الانسان من التلفون
و جااااااااااامي رايحة تقولك خطيبتك بلي هي فيها حاجة مهيش مليحة
و انت اكيييييييد نفس الشيء راح تخبي عليها
و بعد الزواج
هي تفقد ثقتها فيك بما انك كذبت او بالاحرى خبيت عليها حوايج فيك
و انت كيفكيف تصغر هي في عينك كي تبدا تكتشف المساوئ اللي فيها
اذن خوذ راي مجرب
و اخطيك من الهدرة الفارغة
نهار تعقدو و يفريها ربي
مي دركة مازالكم اجانب على بعضاكم
و ما تبداش حياتك الزوجة غلط
باش ربي سبحانه و تعالى يباركلك فيها
سلام
ربي يكون في عونك
انا لا ارى المشكل في الهاتف او في غيره اذا غاب الصدق والصراحة بين الخطيبين انهار كل شيئ
لا تتنازل عن مبادئك … لا مكالمات إلا بعد العقد الشرعي …
إلا في حال الاضطرار ويكون كلاما عاما أو للتفاهم على بعض الأمور المهمة
ربي يوفقك
أكمل في مسيرتك ففي التأني الّسلامة
اخى انت عندك كل الحق وحتى تخوفك فى محلو لانو زمانا صعيب مى لازم العبد يثبت على مواقفو خاصة فى الحق تبقى كاينة حاجة تقدر تعملها هى انك توصل لخطيببتك انك ماتحبش تحكى فى الهاتف خاطر الشرع يمنعك ومش لاى سبب اخر وقولها بلى راح نحكى معاك نهار نعقد عليك ووصللها رايك مع امك او اختك باه بالها يطمن ومتروحش بتخمامها لبعيد ربي يوفقكم ويرزقكم الذرية الصالحة