حبيت نعرف كل واحدة وش دير اليوم الأول تاع عيد الأضحى غدا
علابالي شوا
بصح كل واحدة عندها طريقتها
و أمر آخر وش ديرو معاه
سمعت كاين لي يديرو سلاطة مشوية ولا سلاطةى
أرجو الإجابة
احنا نديرو شواء على الغاز وعلى الفحم وسلائط و فريت و فواكهوووووووووو
نديروا الشربة و ساعات ما نديروش ندييروا شوا وحدوا
احنا نجتمعو عند العائلة لكبيرة ونديرو شوا على الفحم للحم ونديرو ملفوف بالكبدة وباقي الدوارة نديرو بيها كمونية ومننساوش الديسير
احنا نديرو الشوا و العشية بوزلوف
حنا لا استغناء عن الكسكسي
نقلو م الدوارة على العشرة وكاين لديروا الكبدة ملفوف
والغدا الكسكس بالكابويا واللفت ضروري مع الفول المفور واذا كان الترفاس كونجلي يديروا الترفاس
فلفلة حارة مقلية
والعشية يقطعوا الشاة ويشوا البوزلوف ويخبوه
وفي الليل ديروا شربة و ودوارة سلاطة خضرا
وكاين لديروا البوزلوف في الليل
انا في النهار ندير كبدة مشوية و المصارن و الكرشة نقليهم بالثوم و الكمون و في الليل ندير الشواء و البوزلوف نطيبو في الليل وناكلوه للغدوة نديرو بيه شطيطحة طبعا مع سلايط و الرقساس
الله يبارك فيكم الكل
و الله غير كاين تنوع في الغدا
كل واحد حسب المنطقة تاعو
حنا نشويو المرقاز وفريت و شلاضة
وحشية زليف شطيطحة
غدوا مناك الشواء وبكبوكة ولا عصبان
لكن اكثريتها عصبان
صحيتي علي موضوع
هنا نديرو مشرملة بالكبدة و نقلو المصران و سلاطة طبعا و في العشاء نديرو شوا و الغدوا من ذاك نديرو الكسكاس و نكثرو اللحم لانو اي وحد يدخل علينا لازم يدي قطعتو
اما انا كل عام كنت مع دار الشيخ نديروا شوا الكبدة مع لواحقها بالهريسة و المايوناز …..و في الليل البوزلوف و الدوارة طبعا واحد ما ياكل نتغداو بيه ثاني يوم
اما هذا العيد وحدي مع اسرتي الصغيرة لا ادري ماذا افعل ارجو مساعدتي…………………..
السلام عليكم
في بيت بابا أحنا نفطرو على الكبدة و في الغدا نديروا المصارن و الطحال و الرية شوية شوية ونقلوهم بشوية زيت و ثوم و توابل و ملح سلطة منوعة و فواكه ومشروبات طبعا مع خبز الدار
و في الليل نديرو بكبوكة و إلا الراس و إلا شواء على الفحم
لغدو ندير كسكس ونكثرو اللحم و في اليل غالبا شواء
عند بيت شيخي نتغداو طاجين الزيتون سلطة فواكه بخبز الدار و في العشاء الراس
وثاني عيد كسكس باللبن سلطة مشروبات
لكن هذا العام راح نذبح في داري و راح نطبق واش كنت ندير في دارنا
و الله أعلم
احنا نديرو مشرملة بالكبدة ونقليو المصارن وباقي احشاء الخروف
وفي العشاء نديرو بوزلوف أو شواء
وفي الغد نديرو كسكس لخاطر الضيف اللي يجي لازم يدي قطعة لحم
حنا للغذاء نديرو الكبدة و القلب و الكلى مقلية مع البيري و السلايط و الفاكهة ، و في الليل شطيطحة بوزلوف
و ثاني يوم العيد للغذاء عصبان معمرة بالمصران و الرئة مع المرقة والكسكس، و في الليل الشواء
و إن شاء الله يحل علينا العيد يالصحة و العافية
اليوم اللول الصباح الكبدة و في الليل الراس
و الغدوا الصباح بربوشة و في الليل الشوا و اللي حب يزيد كاينة البربوشة