[QUOTE=kika85]السلام عليكم ورحمة الله تعالى وبركاته
اولا وقبل كل شيء نبدا بمكونات الطبق
-باذنجان حوالي 1 كغ
– ارز طايب ابيض في الماء والملح
-لحم مفروم + صدر دجاج مرحي
-نصف حبة بصل
-راس فلفل حار
-معدنوس
– حبة بيض
-فطر
-ملح وفلفل اسود
-صلصة الطماطم حضرتها بحبة طماطم و شوية بصل وعكري وفلفل احمر حار وورقة رند مع زعيترة وشوية زيت
-نحتاج فرماج مرحي الخاص بالبيتزا
-وحبة بطاطا للتزيين مع حبات صنوبر محمصين
ننتقلو للطريقة
اولا نغسلو الباذنجان مليح ونحولو القطمير الي من فوق
بعدها نقطعو بهاد الشكل
ونحتاج في هاد الكيفية شكلين الاول كيما ظاهر في الصورة يكون على شكل باركات والتاني نقطع الحبة شرائح لكن متلاصقة في بعض
بعدها نقوم بقلي الباذنجان في شوية زيت بعد مانكون درتلها الملح وخليتها مدة نصف ساعة باش ما تتشربش الزيت وبعد ما نقلوها نحطوها على ورق ماص
هي راهي تقطر من الزيت وحنا نحضرو الحشو
نحطو اللحم المرحي + البصل مقطع + المعدنوس مقطع + الفلفل الحار مقطع رقيق + الملح + الفلفل الاسود + لب الباذنجان الي نحيناه من لي باركات باش ما نرمو والو وتاني نزكيو الحشو
ونحط الكل في مقلة فيها شوية زيت حتى يذبال البصل والفلفل
درك نروحو لحبة البطاطا نقشرها ونقطعها دوائر ونطبعها بطابع الوردة حتى نتحصل على وريدات كبار وصغار ونقليهم
اما هادوك البقايا ما نرموهمش نقطعوهم رقاق ونقليوهم في زيت مع شوية فطر ونضيفوهم لحشو اللحم المرحي مع كمشة ارز طايب مسبقا
نخلو الحشو يبرد ونضيفولو حبة بيض باش ما يخرجش الحشو بعدما نعمروه في الباذنجان ونخلطو نصف كمية الارز مع نصف كمية صلصة الطماطم
نعمرو ليباركات
نحطو كمية من الارز الاحمر الي معاه لاصوص ونكملو التعمار بحشو اللحم ويكون التعمار بشكل مقبب وذرذرو شوية فرماج مرحي والي تحب ممكن تستعمل لاصوص بيشامل من فوق
بالنسبة للباذنجان الي كنا قطعناها شرائح تاني نعمرو بين كل شريحة وشريحة بشوية حشو اللحم ونضغط على الشرائح ونفرغ على الباذنجان شوية صلصة الطماطم وفوقها شوية فرماج مرحي
نحطهم في سنية تدخل الفرن
نروحو درك للدجاج المرحي
نحطو كميو منو + شوية ملح + شوية فلفل اسود ونخلط ونصنعهم صبيعات
انا قعدلي شوي من حشو اللحم المرحي عمرت صبيعات بيه وقليتهم في ملعقة زيت مع شرائح من الباذنجان مقطعة للطول وحطيتهم على ورق ماص
نخرجو الباذنجان ديالنا من الفرن
شوفو الباذنجان المقطعة شرائح كيفاش نعمروها
بعدها نلفو صبيعات الدجاج في شرائح الباذنجان الطولية ونحطهم بجهة
ناخدو كمية من الارز الابيض في غرفية وفوقها شوية ارز احمر وهكدا بالتناوب حتى نعمرو كامل الغرفية ونقلبها في طبق التقدير ونقدم الطبق حسب الرغبة
انا قدمتو بهاد الشكل
شهية طيبة
يعطيك الصحة أختي يهبل شكلا ومذاقا
روووووووووووووووووووووووووعة روووووووووووووعة حبيبتي والله هاااايل سلمت الايادي
بسم الله ماشاء الله طبق رائع وجميل .ماشفتوش من قبل .نت صاحبة الطبق 6 .لأنه مطلعليش من البداية
سلمت يداك وتعطيك ألف عافية
طبق هايل وراقي يعطيك العافية.
يعطيق الصحة هايل و شهي
رووووووووووووووووووووووووووووعة يعطيك الصحة
يعطيك الصحة جا يهبل
يميم ماشاء الله تحفتي الطبق بطريقة جميلة حنونة و أكيد البنة كذلك هايلة يعطيك الصحة عزيزتي
444444444444444444
يعطيك الصحة اختي طبق رائع
والف شكر علي الوصفة
اممممممم ماشاء الله طبق راءع والله شكرًا جزيلا على المسابقة كانت رووووووعه بفضلكم
أبدعتي يعطيك الصحة اختي على المجهود
يعطيك الصحة اختي طبقك من الاطباق اللي اعجبتني وباينة تاعبة فيه
بارك الله فيك على الوصفة