اليوم نقدم لكم حلوة فاخرة ومنظرها شباب
تصلح للاعراس
بعجينة الفيلو
العجينة قدمتها اكتر من مرة
4كيلات فرينة
نصف كيلة سمن دايب وبارد
قرصة ملح
ماء ومازهر للم العجين
نخليها ترتاح ساعة
نقسمها الى 9 كرات صغار
ونفردهم بواسطة النشاء فوق بعض ومن بعد نرققهم حتى نتحصل على عجينة رقيقة سمك 3 ملم تقريبا
نقطعها مستطيلات
حسب طول وعرض الحبة لي حابينها
الحشو
هنا استعملت
جوز
3 كيلات جوز
كيلة الا شوية شكر
رشة قرفة
مغرف صغيرة زبدة
ونلما بماء زهر
نضع مستطيل العجين
ونحط على جنابو ليزاتاش
لي يربطوا بيهم الحلوة
نحط كرة من الحشو في الوسط
ونربط
ندهنها من فوق بسمن دايب ونطيبها ومن بعد نعسلها وتقدم
ان شاءالله نكون افدتكم
ما شاء الله أول رد لأحلى مشرفة و أحلى صحن بونبون لأحلى عضوة هههههههه أني ديتو
يعطيك الصحة 44444444444444444
ام كوثر نقدر نستعمل الزبدة في بلاصة السمن
أم أنس هاذي لعبوها بكري 
، أرجعي هنا رجعي الصحن 
، أنا اللي طلبت الوصفة منذ مدة وانا أصر على أم كوثر وهبلتها بالرسائل مسكينة 
أم كوثر ربي يعيشك حبيبتي والله ماحطيتها ساهلة هكذا ، شكرا رايحة نبدا نجرب وصفات حلويا ابتداء من الأسبوع القادم لا سهل ربي ، بصح صراحة شريت كاوكاو وقلت نتعلم بيه ومن بعد كي نحترف نطبق بالجوز واللوز كيما أنت ، أصلا ماما كون تفيق بيا واش نقلك 
راني شريت الطابع المربع باش ندير هذاك الشكل اللي في الصحن وفاتح فمو هههه وشريت الكاوكاو وخبيتو على ماما مع الطوابع ، كل خميش نشري شوية حوايج ونخبيهم باش كي نجي نطبق تلقى عندي المستلزمات 
حاجة أخيرة برك ، ماقلتيلناش الطياب كيفاه ، في الوسط أو في الأعلى ودرجة الحرارة والمدة ؟ نخاف تكون حساسة وتفسدلي عمري لادرت لابات فيلو 
جعلها الله في ميزان حسناتك وراني نستنى في السويسرول وبإذن الله كي نتزوج وندير الحلويات لشيبوخي نقلو راهي أم كوثر هي اللي علمتهملي 
ماشاء الله اختي ام كوثر راكي فوووووور
حبيت نعرف العجينة كيفاش تكوون طرية ولا ياسسة
وهل تعجنيها بزاف يعني تدي دليك
رائعة ام كوثر .خاصتا شكل البونبون .أنا جربة هذه العجينة في البقلاوة جات تحفه .ربي يحفظك ويسلم إديك يالغالية
هذه نقدروا نحطوها مع القازوز ولا لالا وواش تقترحيلي نحط مع القازوز في العرس .
شكرا حبيبتي
الله يعطيك الصحة يا ام كوثر هذا القاطو تحفة انا كون ما نحرقش القاطو كيفاش طيبتيه
اشكال جميلة
بصح راهم يبانو خضرين ومشي طايبين !! ولا هوما يجو هاكا ؟؟
هايلين بصح كيفاش يطيبو
راااااائع
و
الأشكال هااااايلين
بارك الله فيك
يعطيك الصحة ام كوثر راهي الوصفة عندي بزاف و انا نحوس عليها و هاذوك اللي في الوسط هي وصفة الشاميات او لا شكرا الف شكر
بارك الله فيك
يميم أم كوثر رووووووووووعة تحفتينا اليوم
يعطيك الصحة
بارك الله فيكم اخواتي
راني مشغولة علابيها مادرتش اقتباسات اسمحولي
الهام قتلتيني بالضحك
مش شرط ديريها بالجوز
انا نديرها حتى بالكوكاو او اي نوع مكسرات وادا تحبي تخلطي تان تجي مليحة
دك نحطلكم رابط العجينة بالتفصيل
اما الطياب
كثير من الاخوات يشوفو حلوياتي بلابات فيلو يقولولي راهم يبانو نيين مش طايبين
والاكيد هدا مش معقول
السر فيبقاء العجينة بيضاء
اولا لانها ممزوجة بكمية مليحة من النشاء وهدا يخليها تنشف بسهولة في الفرن
تانيا نسقيها بكميةوفيرة من السمن تكون الحلوى عايمة وبهدا ماراحش تتحمر شغل رح تتقلى في السمن
والطريقة
نسخن الفرن من قبل ملييييح مليح
منبعد نحط الحلوة على درجة 200 د
ندخل الحلوى 5 د حتى تبدى تتورق ونهدي النار الى 175 د
ونراقب الطياب
رح تلحظو بلي الحلوة تبدى تتورق وحدها وتبان الطبقات وهدا دليل على انها طابت والا ماتتورقش وتبقى عجينة
كي نلمس سطحها نلقى العجينة تتفتت هدا ايضا دليل على انها طابت
المهم تطيب غير من تحت من فوق ماتتحمرش
نهديلها النار ورح تطيب بعامل الحرارة من فوق
وهدا مكان
اي سؤال تفضلوا