السلام عليكم غالياتي
الكسكس او الطعام كل واحد كيفاه يسميه حنا في الشرق نسموه البربوشة هو من اشهر الاطباق التقليدية
كاين لي يعملو مرقة بيضا وكاين لي يعملو مرقة حمرا
حنا في الاعراس والمناسبات نعملوه مرقة بيضا باللحم والحمص والجريوات
حبيت اليوم نشاركم طريقتي في اعداد كسكس مرقة بيضا لان يجي بنين بزااااف لايقاوم بشهادة لي ذاقوه عندي
بدون اطالة نخليكم مع الوصفة
المقادير:
نحتاج لحم خروف ومن الاحسن يكون فيه شوية من الدهون يعني مشحم شوية
حبة كبيرة بصل
سنينات ثوم
حبة صغيرة طماطم ماتكونش حمرا يعني ماهيش طايبة مليح باه المرقة تجي بيضا
م ك كصبر مرحي
نصف م ك راس الحانوت
شوية فلفل اسود
ملح
زوج م ك زيت ما نكثروش خصوصا اذا كان اللحم مشحم
حبة صغير ةلفت
حبات من الجريوات
حمص
طبعا الكسكس و لازم يكون رقيق
الطريقة:
اولا نحضر المقادير
في طنجرة نحط اللحم ونرابي البصل والثوم والطماطم ونضيفهم ونضيف باقي المكونات
نحطهم على نار هادئة نضيف نصف كاس ماء ونخليهم يتقلاو جيييييييدا مرة على مرة نحرك
نقشر حبة لفت ونضيفلها للحم ونخليه يكمل يتقلا على نار هادئة حتى اللحم يدخلو الطياب كيما يقولو العجايز 
يعني مابقالوش بزاف يطيب
في هذا الوقت ناخذ الجريوات نقسمها بالطول وبواسطة سكين نشرحها
نتبلها بشوية ملح وفلفل اسود وكصبر ونخليها تتشرب
من جهة نرجع للحم بعد ما دخلو الطياب نصفيه
ناخذ طنجرة اخرى نحط فوقها الكسكاس ونفرغ المكونات لي في الطنجرة كامل
نرجع اللحم في البرمة لي طيبناه فيها وبواسطة ملعقة نرحي حبة اللفت باه تطلق البنة
ونضيف كمية الماء اللازمة
ملازمش نضيف بزاف الماء قيس مايتغطى اللحم فقط لاني كيما خبرتكم اللحم تقريبا طايب
نفرغ المرقة فوق اللحم وهذا لي يبقى في الاسفل نرموه حنا نسموه التخ نتاع البرمة
وهذا لي نرموه
الان ناخذ كمية الكسكس لي تلزمنا نغسلوه ونعصروه بالايدي ونحطوه ينشف شوية من بعد نضيفوله شوية زيت نحرك الكسكسي ونعملو يفور
بعد مايفور نضيفلو الملح وكمية من الماء باه يجي خفيف ونخليه يتشرب
في هذ الوقت نغسل الجريوات ونضيفها للمرقة
نعاود نرجع الكسكس يفور للمرة الثانية وبعد مايفور نريحوه بالزبدة يعني نضيفلو كمية من الزبدة ونحرك ونغطيه حتى وقت التقديم
في هذا الوقت تكون الجريوات طابت وهذي المرقة نتاعنا راهي واجدة
بالنسبة للحمص انا دايما نطيب كمية كبيرة في لاكوكوط نضيفلو الملح والماء كي يطيب نخليه يبرد ونحتفظ به في المجمد
ناخذ كمية من الحمص لي كنت طيبتو قبل نضيفلها شوية من المرقة ونحط على النار يسخن من بعد نزين به الكسكس
هذا النوع من الكسكس نقدوه مع الفلفل المرقد الحار
ناخذ فلفل حار نضيفلو الملح +القليل من الماء والخل والزيت وسنينات ثوم مقطعين بالطول ونحط داخل مقلاة ونغلق عليه حتى يطيب
والسلاطة الخضراء
وهذا المرقة لي نسقوه بها
تفضلو بسم الله الكسكس راه حاضر
نحط الكسكس في صحن التقديم ونزين بالحمص والجريوات
ونسقيه بالمرقة
ان شاء الله لي ماتعرفش تعمل الكسكسي مرقة بيضا تكون تعلمت ولي تعرف زادت استفدت اكثر
صراحة تعبت في تحميل الصور فقط لي تدخل الموضوع ماتنسانيش من دعوة خير لي ولعائلتي
في امان الله
يعطيك الصحة سخفتيني
يعطيك الصحة ام اماني الله يبارك مراة ونص
اوه لو تجو الى ماما تعملكم كسكسي على اصوله تأكون ولا تشبع وبالزبيب والحمص يالله على ذاك المذاق
الكسكس يوقف الركايب يبقى تاج المأكولات
الله يبارك روعة حنا في الغرب تقريبا نفس الكيفية لكن منديروش الثوم ونعملو البطاطة وزرودية
شكرًا ام أماني والله كل وصفاتك روووووعه يعطيك الصحه يامبدعتي انا من معجبينك بارك الله فيك
ممممممممم يشهي يعطيك الصحة بارك الله فيك
الكسكس راهو يبان مشري مش مفتول في الدار لكن حنا نديرو المرقة انتاعو حمرا
[quote=حنين40;1054724622]اوه لو تجو الى ماما تعملكم كسكسي على اصوله تأكون ولا تشبع وبالزبيب والحمص يالله على ذاك المذاق |
اهلا غاليتي
كل منطقة كيفاه تعمل الكسكس
حنا مانعملوهش بالزبيب ويجي رااااائع
ان شاء الله تفيدنا بالوصفة هكذا نتعرفوعلى تقاليد بلادنا
تحياتي لك وللوالدة الكريمة
[quote=بنت غليزان;1054724708]الكسكس راهو يبان مشري مش مفتول في الدار لكن حنا نديرو المرقة انتاعو حمرا[/quote
شكرا لمرزورك غاليتي
الكسكس مفتول مش مشري
انا نحب المفتول احسن من المشري
شكرااااا
شكرا غالياتي نورتو الموضوع
يعطيك الصحة
ام اماني
نستفاد بززززاف من مواضيعك و لو اكلات معروفة بلمستك الخاصة تجي غير
امممممممممممممم
يعطيك الصحة حبوبة
ما شااء الله عليك اخيتي روعة شهيتيني مي انا جامي جربت مرقة بيضاااء
اممممممممممممممممممم الله يعطيك الصحة دايما عندك لمسة خاصة بيك سخفتيني امممممممممممممممممممم
طريقة جديدة عليا عمرني ما طيبت طعام مرقة بيضاء
ربي يبارك فيك يعطيك الصحة على الشرح المممتاز