السلام عليكم
درت اليوم بيسكوي رولي بالشكولا غطيتو بلاكرام شونتي و ذرذرت فوقو الكاكاو قولولي رايكم حبيباتي
و هذا خليتو ابيض ما زدتلو والو
الوصفة ساهلة ماهلة
6 حبات بيض و ادا كان البيض كبير ممكن تستعملي 5 حبات + 150 غ سكر + 150 غ فرينة مغربلة + فاني + ملعقة صغيرة خميرة الحلوى
التحضير : اولا نفصل البياض عن الصفار ثم نضيف السكر و الفاني لصفار البيض و نضربو مليح مليح حتى يتغير لونه و يتكاثف قليلا ثم نضيف الخميرة للفرينة و ندخلها في الخليط فير بلعقل و بالسباتولا هنا اختي ما تتقلقيش كي تشوفيها
تلايمت لك العجينة اي ما شي سائلة المهك حطيها بجيه
اضيفي قرصة ملح لبياض البيض و ضربي بالباتوغ حتى تطلع المورانغ ثم دخلي المرانغ بالسباتولا في الخليط الاول بلعقل و خلطي بالشوي حتى تدخل المورانغ في الخليط و حركي السباتولا ملفوق للتحت و ما تكثريش الخلط بزاف غير تشوفي المورانغ دخلت خلاص
فرشي السنيوة نتاعلك تاع الفرن بورق الطبخ و فرغي الخليط فوقها و سرحيها مليح و دخليها للفرن لمدة 10 د فقط و حذاري تنحرق لك غير تخرجيها نحي منها ورق الطبخ و فرشي مورسو من ورق الطبخ و رشي عليه شوي سكر جلاسي و لويها على نفسها ثم زيدي لفيها في منديل مندي و خليها في الثلاجة
بعد ما تخرجيها افتحيها و شربيها مليح بالسيرو و زيدي معجون المشمش ثم عاودي ليها و طلعي لا كرام شونتي و غلفيها كامل ثم جيبي شوكة و شكلي خطوط متموجة على طول البيسكوي و قطعيها و بالهنا و الشفاء
هنا نحط ملاحظةادا حبتيه كحلوش كيما عملتو انا نحي ملعقة كبيرة من الفرينة و زيدي ملعقة كبيرة كاكاو و كملي بنفس الطرقة و في التزيين بعد وضع الشونتي و التخطيط بالشوكة ذرذري فوق البيسكوي كاكاو حطي الكاكاو في الصفاية و ذرذريه ثم قطعيه
نتمنى نكون وفقت في الشرح
بنين يممم
يعطيك الصحة
اختي كيفاش وصفة تاعو
انا يوم جربت واحد ’ ماجانيش مفشش ومنفخ ’’ جاني بحال crépe شكل تاعو رقييييق وماشي مفشش
شكرا حبيباتي على الردود
خرجلك روووعة يعطيك الصحة وشكرا على الوصفة
بارك الله فيك أختي
y3tik saha jat tsakhaf
يعطيك الصحة ممتاز
machaa allah
يعطيك صحة وصفتك نفس وصفة ام انس جربتو خرجلي هايل
شكرا لكن على الردود الرائعة حمستوني باش نزيد نحط وصفات حلوياتي
شكرا لكي اختي درتو ليوم وخرجلي رائغ.بصح درت 4بيض.كاس سكر .كاس ونص فرينة .لافاني 1خمارة.وخرلي هايل.
بارك الله فيك
صحة ليك ، خرج لك يهبل ، ألف شكر مرة أخرى و في ميزان الحسنات ان شاء الله
مرحبا اختي شكرا على الوصفة جربتها البارح و جاتني هايلة و راحا نحطها في قسم التطبيقات اليوم انشاء الله نعرف انزل الصور في القسم