.
أما في كيك الشكلاطة أضفت فقط على الوصفة شكلاطة ذايبة وكاكاو وزدت في كمية الخميرة لأنو الشكلاطة تخلي الكيك ثقيل .
مقادير كيك الفانيلا:
* نفس مقادير أم رامي بدون تغيير التغيير الوحيد في الطريقة:
لكل بيضة : 2 م ك سكر عادي، 1 م ك زيت، 1 م ك فرينة ، 1 م ك نشاء ، 1 قرصة خميرة كيميائية
+ قرصة ملح + فاني.
مقادير كيك الشكولا( مقادير كيكة كبيرة)
* 6 بيضات ممكن حتى 7 بيضات ( لكيكة كبيرة )
* لكل بيضة واحدة المقادير : 2 ملاعق كبار سكر ، 1 م ك زيت، 1 م ك فرينة ، 1 م ك نشاء
* قرصة ملح
* في كيك نتاع 6-7 بيضات نحط : 1.5 علبة شكلاطة سوداء ذايبة ( لازم سوداء ) نذوبها مع كمية قليلة جدا من الحليب لازم تبقى ثقيلة ماشي جارية.
* في كيك نتاع 6-7 بيضات نحط 2 م ك كاكاو معمرة مليح – الكاكاو أسود من نوعية جيدة ( ونقص 1 م ك فرينة + 1 م ك نشاء باش ماجيش ثقيلة ).
* الخميرة : في كيك الشكلاطة نحط 1 خميرة كيميائية في كيكة من 6-7 بيضات لأن الشكلاطة والكاكاو يثقلو عجينة الكيك لازم نزيد في كمية الخميرة.
* فاني.
طريقة عمل كيك الشكلاطة:
أولا قبل مانبدى نوجد كلش يعني نغربل الفرينة والكاكاو والخميرة ونكيل السكر والزيت ونشعل الفرن يسخن على 180°.
1- نحط البيض في ماء ساخن حوالي 5د باش يدفى ويطلع مليح كي نخفقو وفي نفس الوقت يذوب فيه السكر بسهولة.
2- في إنا عميق نحط رشة ملح ونفصل الصفار عن البياض نحط في الإناء فقط البياض ونحتفظ بالصفار جانبا.
3- نخفق البياض جيدا حتى يصبح كالثلج .
4- نبدى نضيف في السكر والفاني قليلا قليلا مع الخفق حتى يذوب السكر تماما.
5- تبعو هنا طريقتي مختلفة عن كل الطرق الأخرى ، باش مانزيدش نخفق الصفار وحدو ونكثر الأواني وفي نفس الوقت باش نختصر الوقت شوفو واش ندير :
بعد مانتأكد أنو السكر ذاب تماما في البياض نبدى نضيف في الصفار بالوحدة ونخفق 2-3 ثواني فقط حق مايختفي الصفار ونزيد الصفار الآخر حتى نكمل يعني نخفق ثواني قليلة فقط.
شوفو قوام الكيك كيفاش طالع وكريمي أحسن مانخفق الصفار وحدو والبياض وحدو ونخلطهم بالسباتولا من بعد يهبط البياض شوية هكذا يبقى محافظ على قوامو وربحنا وقت وجهد خاصة أنو الصفار كي نخفقوه مع السكر مايحبش يذوب فيه السكر بسهولة لأنو فيه الدسم هكذا أحسن.
هذي الطريقة ممكن طبقوها في أي وصفة كيك أو تحلية أو رولي تعطيكم نتيجة أفضل أنا عندي عام وأنا معتمدة هذي الطريقة .
6- الآن نضيف الزيت والشكلاطة نتاعي ونخفق 2-3 ثواني حذاري لو نبالغ في الخفق رايح يهبطلي البيض.
7- الآن نضيف الفرينة والكاكاو والخميرة على 2 دفعات أو 3 ، المهم يكونو مغربلين مليح من قبل . ونبدى الآن نخلط من الأسفل إلى الأعلى بالسباتولا برفق باش مايخرجش الهواء.
8- في كيكة الشكلاطة من الأحسن تفرشو في قاع المول ورق زبدة لأنو الشكلاطة والكاكاو يخليوها تلصق.
ندهن الجوانب بالزبدة أو الزيت ونرش بالفرينة .
9- نفرغ الخليط نتاعي في المول وندخل الكيك للفرن المسخن على 180° .
الكيك يطيب على 180° حتى تشوفوه طلع هنا نقصلو حتى 140° ونخليه يطيب مليح من داخل يستغرق حوالي 45د ممكن أكثر على حسب الفرن أنتوما دخلو فيها عود أسنان وشوفو إذا ناشف من داخل خرجوه من الفرن.
هذي الكيكة راهي جي خفيفة بزاف لازم تخليوها تبرد مليح قبل التقطيع.
المكونات : هذه الكمية تعطينا حوالي 6 كؤوس
1- كيك الشكلاطة بثلاث بيضات
2- كريمة شانتيي ( حوالي 100غ أنا مانوزنش نخدم عيني ميزاني )
3- قاناش الشكلاطة : 3 ( 1 علبة للشانتيي و 2 علب للطبقات ) علب شكلاطة سوداء أو شكلاطة بالحليب انا نحب نستخدم Mina Noir + شوية حليب أو كرام فراش
4- حبة موز مقطعة شرائح( اختياري )
الطريقة :
1- نحضر كيك الشكلاطة ، كيكة ب3 بيضات تعمل حوالي 6 كؤوس تحلية ( إذا حضرتو كيك لهذي الوصفة ممكن تعملوه في صينية كبيرة باش يجي رقيق يطيب أسرع ويجي خفيف بزاف ويبرد بسرعة ) ونخلي الكيك يبرد مليح.
2- نحضر الشاربات : عادة لكيكة نتاع 6-7 بيضات انا ندير كاس سكر متوسط مع 2 كيسان ماء ونخليها تغلي 15د. لازم تبرد الشاربات مليح قبل الاستعمال باش مايعجنش الكيك.
3- نذوب الشكلاطة في حمام مائي مع شوية حليب لازم تكون عاقدة ( اللي يحب يخلي الشانتيي بيضاء مايزيدش الشكلاطة ويذوب فقط 2 علب ) .
4- نطلع الشانتيي نتاعي مع الحليب ( القاعدة 100غ بودرة شانتيي مع كاس متوسط ماشي كبير نتاع حليب باش تبقى عاقدة وماجيش جارية ، انا عادة مانصبش الحليب كامل مرة واحدة نصب بالشوية ونطلع حتان نوصل للقوام المطلوب لازم الشانتيي ماتكونش جارية ).
5- نخلي الشكلاطة تبرد شوية ونفرغ مقدار علبة في الشانتيي ونخفق حتى تمتزج ونحط الشانتيي في الثلاجة.
6- باقي الشكلاطة نرجعو للحمام المائي ونزيدلو شوية حليب لازم هنا الشكلاطة تكون جارية شوية مالازمش تكون عاقدة باش كي نخليها تبرد في الثلاجة تبقى طرية ماتيبسش.
7- نسقي الكيك نتاعي اللي يكون بارد بالشاربات باردة .
8- التركيب :
* في كؤوس جوتابل نحط طبقة من قطع الكيك المسقي ثم كمية مليحة من قاناش الشكلاطة ثم نحط كمية من القاناش في جيب الحلواني ونحط طبقة من الكريمة ونركز على الجوانب باش تظهر في الكاس ويجي الشكل مليح.
* نعاود نفس المراحل حتى يتعمر الكاس .
* نزين بالشانتيي .
* بقاتلي شوية شكلاطة زينت بيها على شكل خطوط أو ممكن ترشو رشة كاكاو خفيفة على الوجه.
* نخليها تبرد مليح في الثلاجة قبل التقديم.
في الشكل جات بالشانتيي البيضاء أحسن لكن في الطعم : جاو في زوج ملاح بالصح بشانتيي الشكلاطة بان طعم الشكلاطة أكثر وأكثر.
صدقوني بنان روعة وخفاف وخير من اللي يتباعو والطعم شكلاطة في شكلاطة فعلا رائع لعشاق الشكلاطة.
إذا قدرني ربي إن شاء الله نزيد نحطلكم les ambassadeurs بكريم باتيسيير بالجبن ساهلين خلاص وبنان والكريمة باتيسيير نتاع الجبن خفيفة وسريعة ولذيذة خير من اللي تتباع.
تحياتي …………… لهومة
.مممممممممممم روعة الله يعطيك ما تتمناااااااي شكراااااااااااااااااا
444444444444444444444444444 راني اول واحدة ترد عليك لهومة راني كل ما نجرب وصفة تاعك ندعيلك
ما شاء الله وصفاتك يديرهم الواحد وعينيه مغمضين
تحــــفــة شكرا على الشرح حبيبة
اممممممممممممممممممم تقليشة هيييييييييييييييييييي الله يبارك فيك روووووووووووووووووووووووووعة
شكرااااا شكراااااا الله يعطيك ويرضيك تسلمى باين يشهى
روووووووووووووعه يعطيك الصحه
و جعله في ميزان حسناتك
اممممممممممممممممممممممم وامممممممممممممممممممممم و اممممممممممممممممممم
هايلة هايلة تبارك الله
اممممممممممممممممممممم
الله يعطيك ما تتمناي يامبدعة
44444444444444444444444444444444444444444444444444 444444444444444444444
merci abibti hadi ndirha f l’anniv nta3 khoya <3 <3 <3
شكرا الهام في ميزان حسناتك والله من اروع ما يكون انا من عشاق الشكولا شهيتني
أول حاجة نقولك بسم الله تبارك الرحمن أطباقك روعة راني من عاشقات تارتولات الليمون تاعك معتمدة الوصفة أكيد نحبهم موت والشاي المثلج والبطاطا سوطي ونحب طيابك كامل كامل ونصائحك الرائعة والله بدون مجاملة وهذي فرصة باش نوصلك شكر كبير كبير عليهم يا ريت ما تحرمينا من وصفاتك وما تغيبي علينا مرة أخرى
شكرا عاى وصفة لومباسادوغ بالرغم من أن معضم الصور ما بانوليش