هل اطلب الطلاق

مشكلتي اني اعيش مع اهل زوجي منذ 3 سنوات وعندي ولد وزوجي عنده سكن خاص لكن محبش نروحو نسكنو وحدنا لانو اهله محبوش ومنذ اكثر من شهر وقعت مشكلة بيناتنا وقالي صبري عليا حتى لشهر شعبان ونرحلو وانا قبلت .. ومن بعد حسيته بدل رايه ومراهش ناوي يوفي بوعده ليا ..وكي سألته محبش يرد عليا .. وانا قتله نفضل نطلق ومنبقاش عايشة في هادي الدار ( لوكان ندخل فتفاصيل العيشة لي راني فيها مراحش نكمل ابدا والله راني في معاناة اناوابني لي مكملش عامين .. ينضرب وكسروله العابه ونحوهم له و… و…. و…. ولوكان نحكي على روحي حدث ولا حرج )

حاولت نروح لدارنا ونحطه امام الامر الواقع .. زاد كبر المشكلة ودخلنا في امور اخرى وفي الاخير جا ابوه ورجعني للدار وانا واهلي حشمنا منه راجل كبير فوق 80 مقدرناش نردوه

المهم هل الطلاق هو الحل ؟؟؟ هذا حد طاقتي مقدرتش نصبر عندهم كتر من هاك .. والله كل يوم صباح نجلس نبكي قبل ما نخرج من بييتي .. كرهت لوكان معندهش سكن نحسن عونه لكن السكن موجود وهو محبش ينتقل

يا الاخت والله المشاكل لا تحل بالطلاق تفاهمي مع زوجك بالحوار
ربي يفرج عليك

أختي الطلاق ليس حل واش ذنب ابنك يتربي في بعد عن والدية حاولي مع شخص يقدره زوجتك هو لي يحاول ينصحو بسكن الصبر مفتاح الفرج ووعليكي بأدعية واستغفر وتوكلي على الله

اقتباس:

المشاركة الأصلية كتبت بواسطة مشكلتي المهم هل الطلاق هو الحل ؟؟؟

السلام عليكم الطلاق هو ضياع الاولاد والله يحاسبكم الدليل مشكلتك تكمن في صبرك وسيأتي يوم وترحلون وتعيشوا بهناء فراجعي حساباتك وفكري في اولاد

الطلاق ليس حلا وستكون عواقبه وخيمة عليك وعلى ابنك أكثر من زوجك
لم يعجبن قولك "ذهبت لبيت أهلي لأضعه أمام الأمر الواقع" هذه ليست طريقة امرأة صالحة!
إياك أن تكرريها ثانية لأنك الخاسرة الوحيدة في كل الأحوال
اصبري وحاولي تلتمسي لزوجك العذر ربما هو المتكفل بوالديه ولا يريد تركهم
ساعديه على البر بوالديه وأكيد لا يوجد من لا يريد السكن في بيت مستقل
ربما القضية تحل في أشهر وتنتقلوا تفائلي وتعاملي مع أهله بإيجابية .. ربي يفتح عليكم

الطلاق ابدا ابدا ماهوا حل الطلاق كارثة الا في حالات نادرة انصحك بكثرة الصلاة والصبر وان الله مع الصابرين وفهمي زوجك غير بالعقل وربي يهنيك ان شاء الله

السلام عليكم
اياكي و الطلاق تولي في ندامة كبيرة و خصوصا عندك طفل واش ذنبو انت ما عارفاش واش معنتها الطلاق على هادي لي راكي تقولي نطلب الطلاق انت لجئتي الى اسهل حل لكن شوفي للمستقبل انا نعرف اقارب ولادهم ضيعوهم غير على خطأ كيما هادا الدنيا بطولة ماتشوفيش غير للظروف الحالية بلاك ربي يفرج اصبري برك اما على راجلك حاولي تقنعيه لان ترديد الكلام على مسامعه هو لي يجيب النتيجة كريلو امر الرحلة مرارا و تكرارا ياك الصامط يغلب القبيح ما تروحيش تتسرعي و طلقي خصوصا ان مجتمعنا ما يرحمش المطلقة و ما يعرف معناها هاد الكلمة غير لي مر بيها لذالك فكري مليح قبل ما ديري خطوة كيما هادي و ما تنسايش ان ابغض الحلال عند الله هو الطلاق فكري في العواقب و النتائج اللي جي من بعد و انشاء الله كل من قرى مشكلتك يدعيلك باالفرج عاجلا غير اجلا
السلام

نفسيتك محطمة وهذا يؤثر على صحتك ، ولديك ابن يحتاج الى أم سليمة يحتاج اليك كثيرا ،المشكل ليس فيك وانما في زوجك أذن اضغطي عليه واذهبي عند أهلك ولا دخل لأحد في ما تريدين ولحسن حظك أن البيت المستقل متوفر ،فما المانع في السكن الفردي ؟؟؟
اضغطي عليه وهدديه بالطلاق ايه بالطلاق صحتك اولى وفي الاخير مشيئة الله هي التي تتحقق .

لازم تصبري وليس لك حل اخر …وما اجمل ان تخرجي بالطيب من دار اهل زوجك…ياخي زوجك راه مرتاح وراه داير حسابو وراح يخرج لبيته الخاص عاجلا ام اجلا …علاه بنات هدا الوقت يعملو المستحيل باش افرقو الابن عن اهله تقول النار راهي شاعلة فيكم ..ها استعقلي ولا اخلي جدك ثم واجيب زوجة ثانية للسكنة الجديدة.

تطلبين الطلاق؟ الطلاق ليس حل بل جحيما اكبر من الجحيم الذي تعيشينه لاتقولي لن يتخلى زوجي عني. وساضعه أمام أمر الواقع .سيتخلى ولن يمر شهر اواثنين سيتزوج ويسكن عروسته الصغيرة في الدار الجديدة وساعتها ستموتين من القهر والغيض..فأرجوكي أختي اصبري قليلا لأجل ابنك ومرري سنة أو اثنين.العام أصبح في رمشة عين يمر.لا تقولي رد قاسي لكنها اختي الحياة وهاذه الوقائع.

لالا ختى الطلاق عمرو ماكان حل مشكلتكم نتاع وقت اكيد يجي نهار وتخرجى اصبرى فقط عام ولا زوج ولا كثر متدمريش حياتك على سبب موقت

انا الشيء الذي لم استطع ان افهمه هو عقلية اهل الزوج اللي ميحبوش انه ابنه يستقل بداره و شؤونه
اختي لماذا تحطمين حياتك من اجلهم اصبري و ادعي ربي يفرج عليك مادام عندو دار وعلاش راهو باخل روحو يخرج وحدو

السلام عليكم أختي
لقد قرأت مشكلتك , إن الطلاق ليس بالحل الجيد , يمكن أن تُحل المشكلة بأن تكسبي زوجك و قصدي بهذا أن تتعاملي مع المشكلة بذكاء يجب أن لا تشتكي لزوجك بل أتركيه يرى بعينه المشاكل التي تعاني منها مع أهله لا تخبريه بأي مشكلة حدثت لك مع حماتك أو بناتها,,, أو غيرهم أتركيه يلاحظ دون أن تكوني أنت سبب ملاحظته يجب أن تكوني ذكية في هذه الأمور لأن الزوج أغلب وقته يقضيها خارج البيت لا يعرف ما يحدث بينك و بين أهله و إن أخبرته بالمشاكل سيلاحظ أنك أنت من تتسبب في المشاكل كي تخرج من البيت لا تلحي بالانتقال أتركيه هو من يقول لك
أختي كي تبني حياة جيدة يجب أن تعرفي كيف تتعاملي مع أهل زوجك و السر هنا هو السكوت و أن تلفتي نظر زوجك للمشاكل دون أن يحس

أرجو أن يكون المعنى واضح و أزيحي فكرة الطلاق من بالك اطلاقا أتمنى أن تُحل المشكلة بسرعة ان شاء الله

يا اختي الطلاق ليس حلا لمشكلتك بل سيزيدها تعقيدا حاولي كسب زوجك بالمعاملة الحسنة يعني حاولي تكسبيه ومنبعد تناقشو في هدوء في المواضيع اللي تخصكم واكيد رايحين تخرجو بنتيجة ترضي الطرفين
انت جيه بالسياسة وخيري الاوقات الملائمة واهدري معاه
واكيد تلاقي حل لمشكلتك